Padazreńnie na virus Marburh u Hamburhu nie paćvierdziłasia

2 kastryčnika palicyja Hamburha na niekalki hadzin pierakryvała dva puci i prylehłyja płatformy na centralnym vakzale horada. Usiamu vinoj — padazreńnie na śmiarotnuju i nievylečnuju lichamanku Marburh u dvuch pasažyraŭ, u jakich raptoŭna pačalisia adpaviednyja chvarobie simptomy.

Mierkavałasia, što 26-hadovy student-miedyk i jaho siabroŭka, jakija pryjechali z Ruandy, mahli zarazicca niebiaśpiečnym virusam Marburh. Jany pryjechali ŭ Hamburh na ciahniku z Frankfurta-na-Majnie, u ich vyjavili simptomy, padobnyja da hrypu.

Da hetaha student prylacieŭ u Hiermaniju pramym rejsam z Ruandy, dzie jon lačyŭ pacyjenta, infikavanaha virusam Marburh.

Adnak abśledavańnie, praviedzienaje ŭ miedycynskim centry, pakazała admoŭny vynik na najaŭnaść śmiarotnaha virusa, paviedamlaje vydańnie Bild. 

Miedyki paviedamili, što ŭ studenta i jaho siabroŭki nikoli nie było nijakich skarhaŭ abo simptomaŭ, charakternych dla virusa Marburh. Sam student raspavioŭ, što kali jon kantaktavaŭ ź infikavanym pacyjentam u Ruandzie, na im byli ŭsie nieabchodnyja srodki abarony.

Lichamanka Marburh (Marburg Marburgvirus, abo MVD) upieršyniu ŭźnikła ŭ 1967 hodzie siarod rabotnikaŭ niamieckaj łabaratoryi ŭ Marburhu, fiederalnaja ziamla Hiesen. Chvaroba naležyć da taho ž siamiejstva virusaŭ, što i lichamanka Eboła, ale našmat bolš śmiarotnaja za jaje.

Pa infarmacyi SAAZ, śmiarotnaść Marburha składaje ad 25 da 90%.

Pamiž ludźmi pieradača virusa adbyvajecca praz pramy fizičny kantakt: praz paškodžanuju skuru ci ślizistyja abałonki. Akramia taho, padchapić virus možna pry ŭzajemadziejańni z zaražanymi pavierchniami i materyjałami, takimi jak paścielnaja bializna abo adzieńnie chvoraha čałavieka.

Inkubacyjny pieryjad lichamanki Marburh varjirujecca ad 2 da 21 dnia.

Na pieršych stadyjach zaražeńnia MVD ciažka adroźnić ad mnohich inšych trapičnych lichamankavych zachvorvańniaŭ z-za padabienstva ich kliničnych simptomaŭ. Zvyčajna jany takija: lichamanka, ciahličnyja boli, dyjareja i vanity, a pry ciažkim ciačeńni zachvorvańnia — unutranyja kryvacioki.

Akramia taho, praź niekalki dzion paśla źjaŭleńnia pieršych simptomaŭ skura chvoraha moža pakrycca vysypkaj. Na poźnich stadyjach vyjaŭlajucca žaŭtucha i pankreatyt, pacyjent imkliva hublaje vahu, u jaho raźvivajucca deliryj i inšyja niejrapsichičnyja parušeńni.

Lichamanka Marburh doŭžycca ad adnaho da troch tydniaŭ, paśla čaho albo prachodzić, albo zakančvajecca śmierciu chvoraha. Biez naležnaha dohladu i padtrymlivalnaj terapii śmierć moža nadychodzić praz vosiem-dzieviać dzion paśla źjaŭleńnia pieršych simptomaŭ.

Na siońniašni dzień nie isnuje efiektyŭnych mietadaŭ lačeńnia abo vakcyny ad lichamanki Marburh.

• 0
• 0
• 0
• 0
• 0
• 0
• 0
• 0