Małady dyzajnier z Babrujska razasłaŭ 657 reziume — i ničoha

«Ja małady kantent-kreatar z Babrujska, užo bolš za hod šukaju pracu. Adpraviŭ 657 reziume, ale ŭsio jašče nivodnaha ofiera. Raspaviadu pra rynak dla kreatyŭnych prafiesij i alternatyvy IT ŭ Babrujsku», piša małady čałaviek. Devby.io publikuje hety manałoh.

Šukaju pracu ŭsiudy, hałoŭnaje — zarobak

Na siońnia ŭžo adhuknuŭsia na 657 vakansij — i ničoha. Rynak vielmi pieranasyčany. Šmat vypusknikoŭ kursaŭ, jakija dumajuć, što jany vydatnyja prafiesijanały. U dadatak šmat niavopytnych rekrucioraŭ, jakija nie razumiejuć, na što źviarnuć uvahu ŭ reziume. Pracu šukaju ŭsiudy, mnie nie važnaja łakacyja. Hałoŭnaje — zarobak.

Apošnim časam aktyŭna adhukajusia na vakansii ŭ Polščy. Kali atrymaju ofier, to pierajedu. U Biełarusi šukaju pracu ŭ IT-kampanijach — tam lepšyja zarobki.

Na SND-šnych sajtach, typu rabota.by abo HH, kali adhukajusia na vakansii, to albo ihnor, albo prosta «prahledžana», albo adrazu admova. Praktyčna nikoli nie dachodžu da stadyi sumoŭjaŭ. Samaje śmiešnaje — heta adkazy botaŭ, jakija adrazu admaŭlajuć.

Na jeŭrapiejskich placoŭkach spravy iduć lepš. Tam choć by dajuć mahčymaść prajści sumoŭje. Ja nie pačatkoviec u svajoj prafiesii. Šmat fryłansiŭ, pracavaŭ u jeŭrapiejskich kampanijach.

U adnoj z apošnich kampanij ja rabiŭ hučnyja prajekty dla Google i Wargaming. Ale najmalniki ŭsio roŭna ihnarujuć reziume.

Ciapier dla mianie pošuk pracy — chutčej zabaŭka. Pryciahvaje fryłans — šmat pracy znachodžu na placoŭkach typu Fiverr. Ale fułtajm patrebien dla stabilnaści. I jašče chaču papracavać u kamandzie.

Vučyŭsia na raspracoŭščyka, ale staŭ dyzajnieram

Ja vučyŭsia na prahramista ŭ kaledžy, ale zrazumieŭ, što nie chaču być raspracoŭščykam. Heta zanadta sumnaja prafiesija, a ja bolš tvorčy čałaviek. Tamu vyrašyŭ pierajści ŭ hrafičny dyzajn i sacsietki. Bo hrafikaj zajmajusia ź dziacinstva, adtačyŭ navyk i ciapier užo niadrenna ŭ hetym raźbirajusia.

Ciapier moj hałoŭny navyk — stvareńnie vizualnaha kantentu. Ja stvaraju vizualny kantent, a taksama zajmajusia palapšeńniem SMM. Składaju kantent-płan, maderuju supolnaści, zajmajusia kapirajtynham, rablu hrafičny dyzajn.

U mianie byŭ dośvied pracy ŭ Varšavie, u biełaruskaj kampanii, jakaja vyrablaje mierč. Čamuści, kali pracavaŭ na ich u Biełarusi, zarobak płacili pa mierkach RB, a jak pierajechaŭ — zarobak staŭ «jeŭrapiejskim», choć abaviazki zastalisia takija ž.

Kali pracavać na Jeŭropu i žyć u RB — liču heta vydatnaj prapanovaj. Ale ŭ Polščy nie zastaŭsia žyć — skončyłasia viza, a dazvoł na žycharstva rabić ja nie chacieŭ. Prosta było cikava pažyć u inšaj krainie.

Z Varšavy ja viarnuŭsia nazad u Babrujsk i pačaŭ šukać inšuju pracu.

Abo ajcišnik, abo dalnabojščyk

U Babrujsku rabić niama čaho, na žal. Ja lublu hety horad, ja tut naradziŭsia. Ale ŭ płanie zabaŭ — zmrok. I zarobki tut nievialikija, asabliva pa majoj śpiecyjalnaści — 900—1200 rubloŭ. Heta ni pra što naohuł.

Ja ŭ šoku, jak ludzi na 800—900 rubloŭ žyvuć, kormiać dziaciej i płaciać za kamunałku. Horad raźvivajecca tolki ŭ płanie budaŭnictva: uzvodziać novyja spalnyja rajony. Mnohija maje adnahrupniki źjechali za miažu. Chtości zastaŭsia i pracuje tut na dystancyjcy.

Jość taki prykoł: kali ty dobra zarablaješ, ty albo ajcišnik, albo dalnabojščyk. Pałova maich adnakłaśnikaŭ — dalnabojščyki. Adnahrupniki — usio ŭ IT.

• 0
• 0
• 0
• 3
• 0
• 1
• 0
• 0