Rasiejskaje vojska za 10 km ad Pakroŭska, zaniało Navahrodaŭku, a USU praciahvajuć nastupać u Kurskaj vobłaści
Rasiejskaja armija raźvivaje nastupleńnie na Pakroŭskim napramku. Usiaho za niekalki dzion jana zdoleła ŭziać Navahrodaŭku — važny aporny punkt USU ŭ 10 km na paŭdniovy ŭschod ad Pakroŭska, i zaraz moža nastupać dalej na sam rajcentr. U Pakroŭsku i Mirnahradzie ŭžo niekalki dzion idzie masavaja evakuacyja nasielnictva.
Pakroŭsk i Mirnahrad ahulnym nasielnictvam kala 100 tysiač čałaviek — apošnija bujnyja harady Danieckaj vobłaści na zachad — paŭnočny zachad ad abłasnoha centra, jakija zastajucca pad kantrolem Ukrainy, piša BBC.
Pakroŭsk — važny łahistyčny vuzieł, praź jaki prachodziać trasy na Danieck, Kanstancinaŭku, Kramatorsk i ŭhłyb krainy.
Miž tym u Kurskaj vobłaści ŭ vyniku žnivieńskich bajoŭ ukrainskija vojski zachapili bolš terytoryi, čym rasiejskija ŭ Danbasie. Ale samy bujny nasieleny punkt, uziaty USU — Sudža nasielnictvam kala 5 tysiač čałaviek — amal utraja mienš, čym stračanaja za tydzień bajoŭ Navahrodaŭka, nie kažučy ŭžo pra Pakroŭsk i Mirnahrad, jakija mohuć paści ŭ bližejšy čas, kali ŭkrainskaje kamandavańnie nie pasprabuje vypravić situacyju.
«Pra prablemu ŭsio bolš pačynajuć havaryć»
Rasiejskaje vojska paśla ŭziaćcia Ačarecina i čarady pavolnych, krovapralitnych, ale ŭ cełym paśpiachovych nastupalnych apieracyj na Pakroŭskim kirunku praciahvaje prasoŭvańnie ŭ bok rajcentra. Na hetym učastku skancentravany hałoŭnyja siły rasiejskaj hrupoŭki vojskaŭ «Centr» i tudy ž uvodziacca jaje najbolš bajazdolnyja reziervy.
Mnohija, u tym liku i ŭkrainskija, vajennyja ekśpierty byli ŭpeŭnienyja, što Hrodaŭka i susiedniaja Navahrodaŭka ŭ chutkim časie buduć uziatyja nadychodziačymi rasiejskimi častkami, choć i raźličvali, što heta zojmie bolš času. Ale, miarkujučy pa ŭsim, kamandavańnie USU vyrašyła zasiarodzicca na abaronie samoha Pakroŭska.
«Haradskija rajony biez dastatkovych sił abarony nie źjaŭlajucca niepieraadolnymi pieraškodami, i ŭkrainskaje kamandavańnie, vierahodna, paličyła, što abarona Navahrodaŭki nie vartaje patencyjnych strat», — miarkuje amierykanski Instytut vyvučeńnia vajny.
Na dumku ŭkrainskaha vajennaha analityka Alaksandra Kavalenki, Navahrodaŭka mahła trymać abaronu niekalki miesiacaŭ:
«Pieršyja šturmavyja dziejańni na ŭskrainach Navahrodaŭki pačalisia 21 žniŭnia. Pahłybleńnie pa «žalezcy» za niapoŭny tydzień u RAV (rasiejskich akupacyjnych vojskaŭ — Bi-bi-si ) skłała 3,5 km».
«Adznaču, što šturmavyja dziejańni ŭ rajonie čyhunki supierniku zaŭsiody davalisia ciažka, i hetaja štučnaja pieraškoda supastaŭnaja z pryrodnymi, nakštałt rek i vadajomaŭ. Ale tolki nie ŭ hety raz», — praciahvaje analityk.
«I sprava nie ŭ tym, što Navahrodaŭku šturmujuć adbornyja śpiecyjalisty RAV, ničoha padobnaha. I prablema nie ŭ našych vajarach, jakija trymajuć tamaka pazicyi nastolki, nakolki heta mahčyma. Prablema inšaha charaktaru, pra jakuju ŭsio hučniej pačynajuć kazać tyja, chto ŭ adroźnieńnie ad mianie, hramadzianskaj asoby, maje na heta bolš pravoŭ», — piša Kavalenka.
Na karcie rajona bajavych dziejańniaŭ bačna, kudy naceliŭsia rasiejski nastupalny klin. Jon mocna vyciahnuty na zachad, i, pa paviedamleńniach z frontu, rasiejskaje vajennaje kiraŭnictva nie farsiruje prasoŭvańnie da Pakroŭska, a imkniecca zaścierahčy fłanhi.
Pa infarmacyi jak rasiejskich, tak i ŭkrainskich krynic, užo pačalisia žorstkija bai za horad Sielidava na poŭdzień ad Navahrodaŭki.
Prasoŭvańnie rasiejskich padraździaleńniaŭ adznačana i na susiednim napramku, Kurachaŭskim — tam, miarkujučy pa šmatlikich paviedamleńniach, rasijanie zaniali siało Kanstancinaŭku, bai za jakoje praciahvalisia niekalki miesiacaŭ.
Strata hetaha siała asłablaje pazicyi ŭkrainskich častak, jakija abaraniajuć jašče adzin važny aporny punkt, Vuhladar, jaki znachodzicca na paŭdniovym zachadzie.
Adciahnuć pakul nie atrymlivajecca
Na fonie adnosna chutkaha prasoŭvańnia rasiejskich vojskaŭ na Danbasie pośpiechi USU, jakija ŭvarvalisia ŭ Kurskuju vobłaść, u apošnija dni vyhladajuć bolš ścipłymi.
Ukrainskaja armija pa-raniejšamu sprabuje pašyryć zonu kantrolu, ale ŭ paraŭnańni ź pieršymi dniami apieracyi intensiŭnaść bajavych dziejańniaŭ prykmietna źniziłasia, a prasoŭvańnie zapavoliłasia ci źviałosia da nula.
U aŭtorak ukrainski hłaŭkam Alaksandr Syrski zajaviŭ, što ŭ Kurskaj vobłaści Ukraina ŭziała pad kantrol 1294 kv. km terytoryi, 100 nasielenych punktaŭ i pałaniła 594 rasiejskich sałdata. Hetyja ličby možna stavić pad sumnieŭ, ale ŭ cełym situacyja tam — nie na karyść Rasii.
Paśla źniščeńnia mastoŭ i ŭdaraŭ pa pantonnych pierapravach praz raku Siejm u składanym stanoviščy zastajecca rasiejskaja hrupoŭka prykryćcia miažy kolkaściu da 3 tysiač čałaviek.
Jana ŭtrymlivaje ŭmoŭny prastakutnik pa linii Ciotkina — Alaksiejeŭka — Kamaroŭka — Lizavietaŭka ahulnaj płoščaj bolš za 400 kv. km. Hetaja terytoryja z zachadu i poŭdnia ŭpirajecca ŭ liniju miažy, na poŭnačy šlachi zabieśpiačeńnia i adychodu zastupaje pakinutaja biez mastoŭ raka Siejm, a z uschodu jaje padciskajuć častki USU.
Ale pakolki ŭkrainskaje vojska nie viadzie aktyŭnych nastupalnych dziejańniaŭ na hetym učastku, niepasrednaj pahrozy adrezanym rasiejskim častkam u ciapierašni čas niama.
Razam z tym, jak zajaviŭ Syrski, «adnoj z zadač praviadzieńnia nastupalnaj apieracyi na Kurskim napramku było adciahnieńnie značnych sił praciŭnika ź inšych napramkaŭ, u pieršuju čarhu z Pakroŭskaha, Kurachaŭskaha».
Adnak, pavodle jaho słoŭ, rasiejskija čaści nie tolki nie pakidajuć Pakroŭski napramak, a, naadvarot, naroščvajuć tam kolkaść vojskaŭ.
Što za čamadan nosić kala Łukašenki jahony achoŭnik? Nie, tam nie jadziernaja knopka18
Kamientary
Ale padobny padychod pamyłkovy, bo praźmiernaha napružańnia dla Kramla jon nie stvaraje. Nu časova adjeli odnu marmieładku i chalera ź joju - Rasieja vialikaja, usio roŭna niejak vierniemsia i vierniem staruju ŭładu. A voś kali tam źjavicca nie akupacyjny, a sapraŭdny rasiejski ŭrad, jaki ahałosić alternatyvu pucinizmu - heta budzie vyklik dla ŭsich: dla pucinskich vajskoŭcaŭ, jakija hinuć niezrazumieła za što, dla pamiežnych rasiejskich rehijonaŭ, jakija ŭžo zaraz bačać, što Kramlu na ich nas....ť, dla nacyjanalnych rehijonaŭ, jakija ubačać, što Maskva jak mietrapolija znoŭ słabaja, i dla pucinskaha atačeńnia, jakoje upieršyniu za doŭhija hady adčuje pach ułady inakš čym ad Pucina. I heta budzie surjeznaja zajaŭka na ŭładu, a nie avantura Pryhožyna, jaki zdaŭ uzad, kali da pieramohi jamu zastavałasia zusim krychu.