Dačka i muž pamierłaj biełaruskaj dyzajnierki pradoŭžyli jaje spravu ŭ Varšavie
Jany raźvivajuć brend viasielnych sukienak.
Maryja Kraśnier — 20-hadovaja studentka, jakaja vučycca na IT-mieniedžarku ŭ Polščy. Maci Maryi — Hanna Kraśnier — była dyzajnierkaj-kanstruktarkaj biełaruskich viasielnych sukienak, a taksama ŭładalnicaj šlubnaha sałona ŭ Viciebsku. U 2023 hodzie, užo ŭ emihracyi, žančyna pajšła z žyćcia. Hetaja padzieja šakavała siamju. U pamiać pra maci i žonku Maryja z baćkam vyrašyli praciahvać jaje spravu — zasnavali ŭ Polščy brend viasielnych sukienak Krasner. Pra maci, pierajezd u Polšču, zasnavańnie brenda i jaho raźvićcio Maryja raskazała MOST.
«Prachodziła šlach ad dziaŭčynki ź vioski da dyzajnierki z suśvietnym imiem»
Hanna Kraśnier pracavała kastruktarkaj adzieńnia na zavodzie, a paśla — šyła viasielnyja sukienki pa najmie.
— U 2010 hodzie, paśla naradžeńnia majho małodšaha brata, maci vyrašyła, što bolš nie choča pracavać na «ciociu» ci «dziadziu», i na hrošy, jakija im z baćkam padaryli na viasielle, zakupiłasia tkaninaj. U toj čas my žyli ŭ internacie ad baćkavaj pracy — jon byŭ nastaŭnikam u viciebskim univiersitecie — i mienavita tudy da maci pačali prychodzić [pieršyja klijenty], — raskazvaje Maryja.
Prykładna ŭ 2013 hodzie siabroŭka siamji prapanavała Hańnie pierajechać u svabodny pakoj svajoj trochpakajovaj kvatery. Jana pryniała prapanovu i ciaham nastupnych piaci hadoŭ ładziła tam svaju maleńkuju studyju viasielnych sukienak. A ŭ 2018 hodzie źniała pamiaškańnie ŭ histaryčnym centry Viciebska, zrabiła tam ramont i adkryła studyju — «svajo asabistaje miesca siły».
Sa svaimi pracami dyzajnierka prymała ŭdzieł u šmatlikich konkursach: Paris fashion week, Milan fashion week, Moscow fashion week i vyjhravała niekatoryja ź ich. Nakolki viadoma Maryi, u jaje maci byli padpisanyja ŭmovy z Vogue Paris.
— Pry hetym maci była vielmi ścipłaja. Ale było vielmi cikava nazirać za tym, jak jana prachodziła šlach ad dziaŭčynki ź vioski da dyzajnierki z suśvietnym imiem.
— Da 2020 hoda ŭsio było dobra. Potym pačaŭsia kovid, i kolkaść zamoŭ skaraciłasia. A za im — pratesty ŭ Biełarusi. U toj čas maci kazała, što ŭ jaje źnikaje žadańnie tvaryć i što ŭvohule bolšaść ludziej zaraz nie ženiacca, bo heta — śviata na kaściach, — uspaminaje Maryja.
«Było vidać, što jana znoŭ haryć svajoj spravaj»
U 2021 hodzie siamja pierajechała ŭ Polšču. Tam baćku Maryi zrabili dobruju prapanovu pa pracy — zaraz jon mieniedžar u IT. Tut da Hanny adrazu pačali źviartacca pa pašyŭ sukienak, ale jana vyrašyła, što pakul nie choča hetym zajmacca. U svaje 42 hady jana pajšła vučycca na teściroŭščycu, a paralelna vučyła anhlijskuju movu. U 2022 hodzie žančyna vyjšła na pracu.
U vieraśni 2023 hoda joj pastupiła prapanova paŭdzielničać u šlubnym kirmašy ŭ Varšavie (Targi ślubne) — heta mierapryjemstva, jakoje abjadnoŭvaje pad adnym dacham ad 100 da 300 ekspanientaŭ, jakija prapanoŭvajuć raznastajnyja viasielnyja pasłuhi.
— Jana vyrašyła viarnucca da spravy svajho žyćcia i za miesiac stvaryła kalekcyju viasielnych sukienak, — raskazvaje Maryja. — Było vielmi pryjemna, što na kirmašy palaki padychodzili i kazali: «Vaŭ, jak kruta, jak kłasna!» Jaje heta vielmi natchniała. Było vidać, što jana znoŭ haryć svajoj spravaj.
«Usio adbyłosia pa pstryčcy palcaŭ»
Praz dva z pałovaj tydni paśla ŭdziełu ŭ kirmašy, 5 listapada, Hanna pamierła.
— Byvaje, ludzi chvarejuć, i [svajaki] mohuć psichałahična padrychtavacca da taho, što čałaviek moža pamierci. U majoj ža maci raźvivałasia anieŭryzma ŭ mozhu, i ŭsio adbyłosia pa pstryčcy palcaŭ. I heta vielmi frustruje. Navat zaraz.
«Navat kali sprava praharyć, heta budzie lepš, čym usio prosta skončycca»
— Ideja praciahvać pracu maci — nie maja. U pieršyja niekalki tydniaŭ paśla śmierci maci baćka spaŭ u maim pakoi, bo častka hetaha pakoja była pieratvoranaja ŭ maminu majsterniu. Tam stajała jaje šviejnaja mašynka i ŭsie drobiazi, visieli viasielnyja sukienki. Padčas čarhovaj razmovy baćka skazaŭ, što było b dobra praciahnuć maminu spravu. I navat kali hetaja sprava praharyć, heta budzie lepš, čym usio prosta skončycca z maminaj śmierciu.
Siamja padzialiłasia dumkaj sa znajomaj, jakaja zajmajecca brendami adzieńnia ŭ Varšavie. Praŭda, viasielnymi sukienkami jana nikoli raniej nie zajmałasia, ale pahadziłasia pasprabavać. Akramia hetaha, siamja źviarnułasia ŭ kampaniju, jakaja dapamahła zarehistravać IP na imia Maryi.
Zaraz u kamandzie šeść čałaviek. Akramia Hanny i jaje baćki pracujuć markietołah, śpiecyjalistka pa kamunikacyjach u instahramie, śpiecyjalistka pa techničnaj častcy — jana dapamahła źviazacca sa šviejnym cecham, zrabić 3D-madeli sukienak, jakija Hanna šyła ŭ Polščy, i rekanstrujavać ich pad pamiery luboj klijentki. Jašče adzin člen kamandy zajmajecca stylizacyjaj sukienak, a ŭ budučyni budzie vieści kamunikacyju z klijentami i pravodzić prymierki.
— Darečy, jana zamaŭlała šlubnuju sukienku ŭ majoj maci ŭ 2023 hodzie, i apynułasia tak, što jany pasiabravali. A muž hetaj dziaŭčynki — kaleha majho baćki. Kali jana daviedałasia, što paśla śmierci maci my źbirajemsia praciahvać spravu, — zachacieła nam dapamahčy.
Na aŭtsorsie ŭ Maryi taksama jość buchhałtarka i jurystka.
Što prapanoŭvaje brend i kolki heta kaštuje
Zaraz možna kupić viasielnyja sukienki, aksiesuary da ich, nakidki i pieńjuary. Siaredni košt sukienki z ulikam indyvidualnaha pašyvu, prymierki i harantyi składaje 6-7 tys. złotych.
— Asablivaść našych sukienak u tym, što ŭsie jany zroblenyja ź luboŭju. Usia naša kamanda praniknutaja idejaj «Sukienki jak mastactva» i addanaja svajoj spravie. I kali maci była z nami, i paśla jaje śmierci my atrymlivali šmat paviedamleńniaŭ, što dziaŭčaty marać mieć šlubnuju sukienku ad majoj maci. I zaraz u nas jość mahčymaść hetuju maru ździejśnić.
Praz šeść miesiacaŭ pracy nad brendam kamanda maje dzieviać madelej sukienak. Jany taksama brali ŭdzieł u zdymkach dla Canon. Uvieś hety čas siamja inviestavała ŭ brend i nie atrymlivała prybytku. A pieršyja zakazy źjavilisia zusim niadaŭna.
— 31 žniŭnia naš małady brend budzie ŭdzielničać u Pieršym biełaruskim fiestyvali mody i pryhažości ŭ Varšavie. Tam my spačatku prezientujem jaho na kanfierencyi, a potym u miežach pakazu prademanstrujem niekalkich našych sukienak. U jakaści adnoj z madelej budu ja, — dzielicca płanami Maryja. — Zaraz u nas jość vialikija ambicyi i addanaść spravie, dziakujučy jakim, dumaju, u nas usio atrymajecca.
Biełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?18
Kamientary