U Rymie złodziej trapiŭsia na miescy złačynstva, začytaŭšysia knihaj pra Adysieja
Kali 38-hadovy kampjutarščyk, amatar kłasiki, a pa sumiaščalnictvie złodziej-recydyvist i vykradalnik kotak Daniel Likuory išoŭ na spravu ŭ prestyžnym rymskim kvartale Praci, jon i padumać nie moh, čym usio skončycca, piša Bi-bi-si.
Sprytna zabraŭšysia na bałkon z užo poŭnym pakietam raniej skradzienaha dyzajnierskaha adzieńnia, jon prakraŭsia ŭ pakoj i źbiraŭsia znoŭ dobra pažyvicca, jak jaho ŭvahu pryciahnuła kniha na tumbačcy kala łožka.
Heta była praca italjanskaha aŭtara Džavani Nučy, u jakoj toj razhladaje «Ilijadu» Hamiera z punktu hledžańnia hreckich bahoŭ i pakazvaje na pryviazki znakamitaj paemy da sučasnaści.
Ciažka skazać, što mienavita syhrała ź Likuory zły žart — jaho cikaŭnaść, cikavaść da kłasiki, upeŭnienaść, što jon u kvatery adzin, ci niešta jašče, ale jon prysieŭ i… začytaŭsia, pryčym nastolki, što nie zaŭvažyŭ, jak pračnuŭsia haspadar kvatery, jaki vyklikaŭ palicyju i zaśpieŭ źnianacku rabaŭnika, jaki siadzieŭ z knižkaj na łožku.
Likuory pasprabavaŭ źbiehčy, pieraskočyŭ na inšy bałkon, ale tut jaho zatrymali palicejskija.
Spačatku «intelektualny rabaŭnik», jak jaho chutka achryścili italjanskija ŚMI, sprabavaŭ apraŭdacca, śćviardžajučy, što ŭ jaho była pryznačanaja sustreča z adnym z žycharoŭ doma i, čakajučy jaho na dachu, Likuory lubavaŭsia vidami Ryma, ale vypadkova paśliznuŭsia, upaŭ na bałkon nižniaha paviercha, zajšoŭ u kvateru i zacikaviŭsia knihaj.
Adnak toj samy pakiet z dyzajnierskim adzieńniem, ź jakoha navat nie byli zrezanyja etykietki, vydaŭ jaho z hałavoj, i Likuory ŭ vyniku vystavili abvinavačvańni ŭ sprobie rabavańnia i zachoŭvańni kradzienaha.
Daviedaŭšysia ab hetaj historyi, aŭtar knihi, Džavani Nučy, jaki pa ironii losu žyvie za 300 mietraŭ ad miescach rabavańnia, u intervju haziecie Il Messaggero zajaviŭ, što ščaślivy zdabyć takim čynam novaha čytača.
«U pieršuju čarhu ja chacieŭ by sustrecca z hetym čałaviekam, złoŭlenym na miescy złačynstva, i padaryć jamu asobnik svajoj knihi,bo jaho napeŭna pierapynili ŭ pracesie, a ja chacieŭ by, kab jon zmoh dačytać jaje da kanca. Heta, viadoma, poŭny siur, ale pry hetym — vielmi čałaviečaja historyja».
Da taho ž, pa słovach Nučy, jaho lubimy boh — Hiermies, zastupnik litaratury i… zładziužka, tak što «ŭsio tut vidavočna».
Kamientary