Z-za rastavańnia arktyčnych ildoŭ biełyja miadźviedzi stali čaściej chvareć
Novyja daśledavańni pakazali, što pa miery rastavańnia ldoŭ u Arktycy biełyja miadźviedzi stali padviarhacca pavyšanaj ryzycy zaražeńnia virusami, bakteryjami i parazitami, ź jakimi jany radziej sutykalisia jašče 30 hadoŭ tamu, paviedamlaje Bi-bi-si.
Vučonyja vyvučyli analizy kryvi miadźviedziaŭ u Čukockim mory — pamiž Alaskaj i Rasijaj. Byli praanalizavanyja proby, sabranyja ŭ pieryjad z 1987 pa 1994 hod, a potym proby pieryjadu z 2008 pa 2017 hod.
Vučonyja pravieryli kroŭ miadźviedziaŭ na piać roznych patahienaŭ — virusaŭ, bakteryj abo parazitaŭ, jakija ŭ asnoŭnym fiksujucca ŭ suchaputnych žyvioł, ale byli zarehistravanyja ŭ nasielnikaŭ mora, u tym liku tyja vidy, na jakich palujuć biełyja miadźviedzi.
Daśledavańnie zaśviedčyła, što ciapier značna bolšaja kolkaść miadźviedziaŭ akazałasia infikavanaj. Siarod piaci patahienaŭ, jakija stali čaściej sustrakacca ŭ biełych miadźviedziaŭ, — dva parazity, jakija vyklikajuć taksapłazmoz i nieasparoz, dva vidy bakteryj, jakija vyklikajuć lichamanku i bruceloz, a taksama virus, jaki vyklikaje sabačuju čumu.
Adnak vučonyja havorać, što pa probach kryvi ciažka vyznačyć, jak hetyja virusy i bakteryi adbilisia na zdaroŭi miadźviedziaŭ.
Śpiecyjalist pa dzikaj pryrodzie Keryn Rode z Hieałahičnaj słužby ZŠA ličyć, što padvyšanaja ryzyka infikavańnia biełych miadźviedziaŭ złučanaja sa źmienami va ŭsioj arktyčnaj ekasistemie. Pavodle jaje słoŭ, u miescach pasialeńnia papulacyi biełych miadźviedziaŭ kolkaść lodu značna skaraciłasia, a ziemlekarystańnie pavialičyłasia.
Papiarednija daśledavańni z vykarystańniem kamier-našyjnikaŭ na miadźviedziach zaśviedčyli, što ŭ suviazi sa źniknieńniem arktyčnaha lodu jany pravodziać usio bolš času na sušy i im nie chapaje kałoryj.
Mižnarodny sajuz achovy pryrody ŭnios biełych miadźviedziaŭ u śpis vidaŭ, jakim pahražaje vymirańnie. Klučavym faktaram skaračeńnia ich kolkaści ličycca strata asiarodździa pražyvańnia — arktyčnaha lodu — z-za źmianieńnia klimatu.
Hrodna staić na vušach paśla pryznańnia papularnaha haradskoha sajta «ekstremisckim». Ale na hetym nie skončyłasia31
Kamientary