«Šumu šmat, a vidać mała». U Minsku prajšoŭ fiestyval ahniu, na jakim mnohija taho ahniu i nie pabačyli
U hetyja vychadnyja ŭ Bataničnym sadzie prajšoŭ Fiestyval ahniu «Fieniks». Try viečary zapar pierad naviedvalnikami vystupaŭ znakamity fajer-kalektyŭ «Kresiva». Byli zaprošany inšyja viadomyja artysty, pracavaŭ fud-kort, dla dziaciej prajšli biaspłatnyja tematyčnyja aktyŭnaści. Ale, niahledziačy na nasyčanuju prahramu, častka naviedvalnikaŭ pajšła ź fiestyvalu niezadavolenaja, piša «Anłajnier».
Asnoŭnaja pretenzija ŭ tym, što placoŭka, dzie vystupali fajerščyki, nie była pryznačanaja dla takoj vialikaj kolkaści hledačoŭ. Šmat kamu tak i nie ŭdałosia pahladzieć vohniennaje šou, dziela jakoha jany kuplali kvitki.
Naviedvalniki: «Hladzieli na šou praz ekrany telefonaŭ ludziej, jakija stajać napieradzie»
«Poŭnaje rasčaravańnie ad tak zvanaha fajer-šou, — napisaŭ u redakcyjny čat-bot Alaksandr. — Zrazumieła, što trybuny doraha stavić, ale pamost dla vystupu časovy možna było arhanizavać. Vidać niešta było tolki pieršym 2-3 šeraham, a narodu było niekalki tysiač».
«Na dziciačy majstar-kłas možna trapić pa papiarednim zapisie, jaki vioŭsia niejkimi błohierami, — praciahvaje čytačka Taćciana. — Vohniennaje šou možna ŭbačyć, kali zahadzia viedaješ miesca ŭ Bataničnym sadzie, dzie jano prachodzić, i zojmieš jaho ŭ samym pačatku.
Nabyŭšy kvitok u kasie, ničoha, akramia viačerniaj prahułki pa Bataničnym sadzie (kali jaho pryhažości asabliva nie razhledziš), i vialikich vydatkaŭ na fastfud, my nie atrymali. Rasčaravanaja ja, dzieci i našy hości, ź jakimi my chacieli cikava pravieści čas na mierapryjemstvie».
Pa fatahrafijach vidać, što niekatorym hledačam daviałosia załazić na drevy, kab ubačyć vidovišča. Taksama čytačy «Anłajniera» źviarnuli ŭvahu na vialikija čerhi na ŭvachodzie ŭ Bataničny sad i kala punktaŭ ź ježaj, niedastatkovaje aśviatleńnie ŭ sadzie.
Niekatoryja ŭzdymali pytańni biaśpieki: ci nie zanadta blizka fajerščyki pracavali pobač z hledačami?
«Učora pabyvali na słavutym fajer-šou ahniu «Fieniks». Šumu šmat, a vidać mała, — nastojvaje čytačka Śviatłana. — Navat tracina ludziej, jakija nabyli kvitki, nie ŭbačyli šou, tamu što pieršyja [naviedvalniki] abstupili ščylnym kołam palanu dla vystupu. Trybuny byli pierapoŭnienyja […] Narod zrazumieŭ, što ničoha nie ŭbačyć, i staŭ masava sychodzić z sadu».
«Na šoŭ ja i maja siamja zmahli pahladzieć tolki praz ekrany telefonaŭ ludziej, jakija stajali napieradzie, za što im vialiki dziakuj, inakš žonka naohuł nie zmahła b ničahutki ŭbačyć (jaje rost 171 sm). Ja z rostam 185 sm bačyŭ uryŭki šou, syn siadzieŭ na maich plačach, a dačka tolki da siaredziny šou zmahła siak-tak prabracca da treciaha šerahu.
Usio dziejańnie doŭžyłasia kala 35 chvilin. Takim čynam, što my mieli ŭ hety ciopły viečar:
- 30-40 chvilin pošuku miesca dla parkoŭki aŭto;
- 30 chvilin na prachodžańnie da kas i ŭvachod u sad;
- minus 60 rubloŭ za kvitki na čaćviarych;
- 15 chvilin pošuku miesca, kab choć niešta ŭbačyć».
Arhanizatary: «My nie čakali takoha ažyjatažu»
«Anłajnier» paprasiŭ kamandu arhanizataraŭ prakamientavać prablemnyja momanty, na jakija źviarnuli ŭvahu naviedvalniki.
«Fiestyval «Fieniks» pravodziŭsia z 17:00. Akramia vohniennaha šou na mierapryjemstvie byli taksama tematyčnyja łakacyi, fud-kort i vystupleńni artystaŭ. Placoŭka dla vystupleńnia fajer-kamandy była ŭzhodnienaja Bataničnym sadam sumiesna z MNS u biaśpiečnym miescy.
Sa svajho boku, paśla praviadzieńnia pieršaha dnia fiestyvalu my bačyli, što niekatorym ludziam kiepska vidać vystupleńnie, i apieratyŭna pastavili ŭzvyšeńni, kab raźmierkavać naviedvalnikaŭ.
Farmat takoha mierapryjemstva pravodziŭsia ŭpieršyniu. U subotu my nie čakali takoha ažyjatažu, kala siami tysiač čałaviek pryjšli adnačasova da vystupleńnia artystaŭ, a pieradprodaž kvitkoŭ byŭ tolki kala 1 tysiačy.
Što tyčycca fud-korta, na placoŭcy pracavała 10 udzielnikaŭ, jakija apieratyŭna rychtavali zakazy. Navat kali napłyŭ haściej byŭ vialiki, čas čakańnia zamovy razam z vydačaj składaŭ nie bolš za 10-15 chvilin. Ustanovy spraŭlalisia sa svajoj zadačaj.
Što tyčycca zapisu na majstar-kłasy: heta była asobnaja aktyŭnaść dla dziaciej na dziciačaj łakacyi ad Mamago, i jana pravodziłasia papiarednie ŭ zapisie błohiera. Zvyčajnaja praktyka takich aktyŭnaściaŭ na mierapryjemstvach. Majstar-kłas raźličany na peŭnuju kolkaść udzielnikaŭ.
Na nastupny hod sumiesna z Bataničnym sadam my ŭličym usie momanty, dadamo trybuny, pašyrym fud-kort», — adkazali na pytańnie žurnalista «Anłajniera» ŭ TAA «Kancert pradakšn».
Svaim bačańniem situacyi taksama padzialilisia śpiecyjalisty infarmacyjnaha siektara Bataničnaha sadu. Tam adznačyli, što košt kvitka na mierapryjemstva ŭklučaje taksama ŭvachod u Bataničny sad, jaki ŭ zvyčajnyja dni składaje 12 rubloŭ.
«Placoŭka dazvalaje prymać vialikuju kolkaść naviedvalnikaŭ adnačasova. Na mierapryjemstvie byli vykananyja ŭsie nieabchodnyja miery biaśpieki, pracavali ŭsie słužby: milicyja, MNS i chutkaja dapamoha.
Nadzvyčajnych zdareńniaŭ za čas praviadzieńnia fiestyvalu nie było, adnak niekatorych hledačoŭ šou davodziłasia zdymać z dreŭ.
My razumiejem, što ŭsim chaciełasia ŭbačyć artystaŭ, adnak nie varta zabyvać, što raśliny ŭ Bataničnym sadzie — heta vialikaja kaštoŭnaść, a samo šou — tolki častka fiestyvalu, jakoje ŭvachodzić u ahulny košt.
Taksama Bataničny sad u viačerni čas aśviatlajecca lichtarami, na placoŭcy praviadzieńnia mierapryjemstva arhanizatary ŭstalavali dadatkovaje aśviatleńnie. Šou ahniu pravodzicca ŭ ciemry», — kamientujuć arhanizatary.
Hrodna staić na vušach paśla pryznańnia papularnaha haradskoha sajta «ekstremisckim». Ale na hetym nie skončyłasia11
Kamientary