Dzied hałoŭnakamandujučaha USU Alaksandra Syrskaha naradziŭsia ŭ Biełarusi
Sam hałoŭnakamandujučy USU naradziŭsia ŭ Rasii.
![](http://d3kcf2pe5t7rrb.cloudfront.net/img/w840d4webp1/photos/z_2024_08/25260afc621550f26574a-485y3.jpg.webp)
Užo paŭhoda, z 8 lutaha, pasadu Hałoŭnakamandujučaha Uzbrojenymi siłami Ukrainy zajmaje hienierał-pałkoŭnik i hieroj Ukrainy Alaksandr Syrski. U miedyja časta možna sustreć zhadku pra toje, što vajskoviec naradziŭsia ŭ Rasii. A voś zhadki pra jaho biełaruskija karani — nie, piša Biełsat.
Alaksandr Syrski naradziŭsia ŭ 1965 hodzie ŭ vioscy Navinki Uładzimirskaj vobłaści RSFSR u siamji vajskoŭca. U 1970-ja baćku pieraviali słužyć va Ukrainu, kudy ŭśled za im pierajechała i ŭsia siamja. I mienavita ŭkrainski Charkaŭ ličyć rodnym Hałoŭnakamandujučy USU.
A voś baćka z maci i bratam Aleham paśla viarnulisia ŭ Rasiju. Ź imi Alaksandr, jak paviedamlajecca, kantaktaŭ nie padtrymlivaje. A ŭ RF paśla 1991 hoda byŭ tolki adnojčy — na pachavańni babuli. Pra adsutnaść kantaktaŭ ź im paviedamlaŭ i brat Hałoŭnakamandujučaha: «Ja ź im nie kamunikuju, ja navat nie viedaju, dzie jon».
Stanam na 2013 hod baćka Alaksandra Syrskaha — Stanisłaŭ Prakopjevič — byŭ vajskovym piensijanieram u zvańni pałkoŭnika, sudziŭsia z rasijskim Minabarony.
Prasačyć karani Hałoŭnakamandujučaha USU dapamahaje sajt «Pamiať naroda», na jakim u miežach prajektu Ministerstva abarony RF sabranyja źviestki pra savieckich udzielnikaŭ Druhoj suśvietnaj vajny ŭ 1941-1945 hadach. Uličvajučy spadčynnuju vajskovuju dziejnaść i toje, što Alaksandr Syrski naradziŭsia ŭ 1965 hodzie, jahony dzied Prakop (na padstavie imia pa baćku jahonaha baćki) Syrski musiŭ by być mabilizavany ŭ savieckaje vojska. I na sajcie sapraŭdy možna znajści zhadki pra Prakopa Siamionaviča 1906 hoda naradžeńnia. Heta adziny Syrski ź imiem Prakop na «Pamiať naroda».
Pra toje, što heta dzied ukrainskaha hałoŭnakamandujučaha, pisali i rasijskija «Arhumienty i fakty».
![](http://d3kcf2pe5t7rrb.cloudfront.net/img/w732d4webp1/photos/z_2024_08/da28e8dc054ff5b11e140-4d3ik.jpg.webp)
Zhodna z sajtam «Pamiať naroda» Prakop Syrski słužyŭ raźviedčykam. Za toje, što jon na terytoryi siońniašniaj Naŭharodskaj vobłaści vykryŭ znachodžańnie niamieckich vojskaŭ, što pieraškadžali ruchu savieckaj piachoty, byŭ uznaharodžany ŭ 1942 hodzie miedalom «Za Advahu». Vajnu skončyŭ u zvańni staršaha siaržanta ci staršyny, byŭ uznaharodžany taksama Ordenam Čyrvonaj zorki i miedalom za pieramohu nad Niamieččynaj. Pamior u 1984 hodzie.
Ale tut cikavić najbolš miesca naradžeńnie vajskoŭca. U dakumientach sustrakajecca roznaja infarmacyja. Naprykład, pasiołak Amucinski Amucinskaha rajonu Ciumienskaj vobłaści. Mienavita adtul jon byŭ pryzvany ŭ vojska ŭ 1941 hodzie.
![](http://d3kcf2pe5t7rrb.cloudfront.net/img/w732d4webp1/photos/z_2024_08/78edee1b3ed5b3ef69c96-ex07t.jpg.webp)
Pry hetym jak na sajcie «Pamiať naroda», hetak i na źviazanym ź im «Podvih naroda», paznačanaje taksama inšaje miesca naradžeńnie Prakopa Syrskaha — Biełaruskaja SSR, Mahiloŭskaja vobłaść, Čavuski rajon, vioska Kuźminičy. Mahiloŭščyna zhadvajecca i na sajcie prajektu «Doroha pamiati». Pra toje, što heta nie pamyłka, śviedčyć nacyjanalnaść Prakopa Syrskaha ŭ zahadzie pra ŭznaharodžvańnie — «biełarus».
Z čavuskich Kuźminičaŭ pachodzili i amal usie inšyja Syrskija z resursaŭ, pryśviečanych udzielnikam vajny 1941—1945 hadoŭ. Dyj biełaruski prajekt helper.archonline.by, jaki pakazvaje histaryčnuju raspaŭsiudžanaść proźviščaŭ u Biełarusi, łakalizuje proźvišča Syrski mienavita i vyklučna ŭ hetaj vioscy.
Što datyčyć Ciumienskaj vobłaści RF, to Syrskija mahli tam apynucca ŭ vyniku Stałypinskaj reformy 1900—1910-ch hadoŭ. Hety małazasieleny rehijon Sibiry byŭ miescam pryciahnieńnia dla šmatlikich biełaruskich sialanaŭ, jakija časta ŭ pošukach «novaj ziamli» skiroŭvalisia ŭ davoli dalokija padarožžy.
![](http://d3kcf2pe5t7rrb.cloudfront.net/img/w732d4webp1/photos/z_2024_08/2ed92a65eb3f45632c807-b4rku.png.webp)
Vioska Kuźminičy była dałučanaja da Rasijskaj impieryi ŭ vyniku pieršaha padziełu Rečy Paspalitaj u 1772 hodzie. Na pačatak XX stahodździa jana naležała da Bychaŭskaha pavietu Mahiloŭskaj hubierni. U 1897 hodzie tut žyło 586 asobaŭ. Susiednija z Kuźminičami Čavusy padčas vajny Rečy Paspalitaj z Maskovijaj 1654 — 1667 hadoŭ byli centram Biełaruskaha kazackaha pałka, što padnačalvaŭsia ŭkrainskaj Hietmanščynie. Połk spačatku vajavaŭ na baku maskoŭskich vojskaŭ, a ŭ 1658 hodzie pierajšoŭ na bok Rečy Paspalitaj.
Važna adznačyć, što proźvišča Hałoŭnakamandujučaha ZSU dazvalaje prasačyć historyju jahonaj siamji bolš hłyboka. Možna mierkavać, što pieršy jaho nośbit staŭ nazyvacca Syrskim u honar svajoj rodnaj miascovaści — vioski Syrsk Karmianskaha rajona Homielskaj vobłaści (ciapier u składzie Karmy). Jana znachodzicca pryblizna za 75-80 kiłamietraŭ ad Kuźminičaŭ. Akupavanaja rasiejskimi vojskami jana taksama była ŭ 1772 hodzie.
Kamientary