«Budzie adbyvacca vymušany, ale ŭsio bolšy pavarot u bok Rasii». Sacyjołah pra ŭpłyŭ novych sankcyj na nastroi biełarusaŭ
Jeŭrasajuz uvodzić usio bolš abmiežavańniaŭ u dačynieńni da Biełarusi. Apošniaja chvala niepasredna zakranuła mienavita zvyčajnych žycharoŭ, a nie režym Łukašenki. «Naša Niva» spytała ŭ sacyjołaha Hienadzia Koršunava, jak padobnyja kroki z boku ES mohuć paŭpłyvać na nastroi biełarusaŭ.
Simpatyj da Jeŭropy zastaniecca mienš
Koršunaŭ ličyć, što ŭsio heta biezumoŭna adabjecca na palityčnych nastrojach biełarusaŭ.
«Raniejšyja sankcyi taksama dachodzili da prostych ludziej, ale nie naŭprost, a bolš pasredna. A ciapier my nazirajem toje, što jany, hruba kažučy, bjuć u łob.
Tamu heta ŭ lepšym vypadku adabjecca ŭ bok nieparazumieńnia taho, što robiać našy zachodnija partniory, a ŭ horšym — adabjecca na struktury hieapalityčnaha vybaru», — ličyć sacyjołah.
Pa jaho słovach, u Biełarusi i raniej značnaja častka hramadstva hladzieła na Rasiju, bo ličyła, što biełarusaŭ u Jeŭropie nichto nie čakaje.
«Asabliva ŭ tych, chto nie vielmi cikaviŭsia palitykaj, pazityŭnaha prajeŭrapiejskaha naratyvu nie było. Zaraz hetyja ludzi ŭbačać padmacavańnie hetaha tezisu, što biełarusy ŭ Jeŭropie nikomu nie patrebnyja.
Na žal, hetyja naratyvy ciapier budzie vykarystoŭvać i biełaruskaja prapahanda», — upeŭnieny analityk.
Nie kožny adšukaje pryčynna-vynikovuju suviaź
Koršunaŭ ličyć, što fakt taho, što pieršapačatkova ŭ źjaŭleńni sankcyj i inšych abmiežavańniaŭ u dačynieńni da Biełarusi vinavaty režym Łukašenki, va ŭsprymańni mnohich budzie vynosicca pa-za dužki.
«Da hetaha prostamu čałavieku dajści budzie ciažka. Heta davoli składany šlach ź niekalkich etapaŭ.
A ŭ taho, chto zmoža prajści hety šlach i adrefleksavać, uźnikajuć inšyja pytańni: «Čamu, z adnaho boku, uvodziacca takoha kštałtu sankcyi, jakija bjuć pa prostych ludziach, a ź inšaha boku — dobraja častka našych susiedziaŭ praciahvaje handlavać ź biełaruskim režymam?»
Heta taksama pytańni, na jakija treba było b adkazać, ale majem, što majem», — kaža Hienadź Koršunaŭ.
Welcome to Russia
Padobnyja abmiežavańni, jakija faktyčna zakryvajuć Jeŭropu dla biełarusaŭ, značna zvužajuć šyryniu mahčymaściaŭ, akno vybaru, dzie pravieźci vychodnyja, jak pravieści vakacyi i hetak dalej.
«Tut možna kazać, što budzie adbyvacca choć i vymušany, ale ŭsio bolšy pavarot u bok Rasii. Na žal, heta tak», — ličyć analityk.
Taksama Hienadź Koršunaŭ nie vyklučaje, što padobnyja dziejańni Jeŭrasajuza mohuć niehatyŭna adbicca na rejtynhu demakratyčnych siłaŭ u vačach biełarusaŭ.
«Ale jak jano budzie dakładna raźvivacca, pakul składana skazać, bo treba hladzieć, ci atrymajecca ŭ našych demakratyčnych siłaŭ niešta zrabić u hetym napramku».
Stała viadoma, kolki studentaŭ adličyłasia z adnaho sa staličnych univiersitetaŭ za apošnija hady. Ličba ŭražvaje2
Kamientary
Jon sacyjołah ci pradkazalnik?
"... budzie, budzie budzie..." A kali nia budzie? Niama anijakaje patreby "šukać pryčynna-vynikovyja suviazi". Tut mazhavy šturm nie patrabujecca, bo pryčyny viadomyja. Dla samych "rozumam prostych" važna tolki jano abo ciabie zakranuła, albo nie. I nichto nie budzie šukać alternatyvu Jeŭropie ŭ Rasiei, bo paprostu nie znojdzie, chiba što peŭnaja kolkaść hastarbajtaraŭ pa inercyi čšče paprecca na uschod, ale taho dabra, vybačajcie, i nie škada.