88-hadovy apalny eks-kiraŭnik «Pinskdreva» Arynič žyvie ŭ Biełastoku ŭ zdymnaj kvatery za košt svajakoŭ
Były kiraŭnik pradpryjemstva «Pinskdreŭ» Łaran Arynič ciapier žyvie ŭ Biełastoku, dzie ź im parazmaŭlała vydańnie Most. Jon trapiŭ u apału paśla taho, jak na pradpryjemstvie, jakoje Arynič uznačalvaŭ, adbyŭsia vybuch z čałaviečymi achviarami, i ŭratavaŭsia ad biełaruskaj turmy tolki svoječasova vyjechaŭšy za miažu.
Vybuch na «Pinskdrevie» adbyŭsia 25 kastryčnika 2010 hoda, u vyniku jaho zahinuli 14 čałaviek. Trahiedyja adbyłasia na zavodzie «Pinskdreŭ-DSP» — sumiesnym pradpryjemstvie, stvoranym u 2004 hodzie.
Łaran Arynič niekalki razoŭ padkreślivaje, što nie mieŭ dačynieńnia da «Pinskdreŭ-DSP» — heta było jurydyčna i administracyjna niezaležnaje pradpryjemstva, jakoje arandavała ŭ «Pinskdreva» pamiaškańni.
Vinavacić u tym, što adbyłosia, jon partnioraŭ «Pinskdreva», jakija kiravali hetaj firmaj — kiraŭnika kiprskaj kampanii «Dalija Trejdynh KO Limited» biełarusa Alaksandra Jakubieniu i dyrektara vytvorčaści, pa słovach Aryniča, siabra Jakubieni Leanida Łohvina.
Łaran Arynič ličyć, što kiraŭnictva Biełarusi skarystałasia z trahiedyi, kab prybrać da ruk «Pinskdreŭ» — samaje paśpiachovaje pradpryjemstva ŭ halinie, dy jašče i pryvatnaje. 3 studzienia 2011 hoda Łukašenka padpisaŭ ukaz, zhodna ź jakim «Pinskdreŭ» staŭ naležać kancernu «Biellespapierapram», jaki padparadkoŭvajecca Kiraŭnictvu spraŭ prezidenta.
Abvinavačvańnie ŭ chałatnaści Łaranu Aryniču vystavili tolki 24 lutaha 2011 hoda. Paśla taho znajomyja i siabry paraili jamu vyjechać za miažu, što jon i zrabiŭ.
Vyjazdžaŭ u Maskvu na mašynie dački, a adtul, znachodziačysia, jak jon śćviardžaje, u pieradinfarktnym stanie, pajechaŭ spačatku ŭ kardyjałahičny centr u Ryhu, a paśla ŭ Druskieniki. Niekatoryja čas žyŭ u Varšavie, paśla ŭ polskim Radamie ŭ dalokaha svajaka, a kali pabačyŭ, što toj staŭ jaho abkradać, pierajechaŭ u Biełastok, dzie žyvie na zdymnaj kvatery z 2013 hoda.
Były hiendyrektar, ź jahonych słoŭ, žyvie za košt polskaj sacyjalnaj dapamohi — kala 500 dalaraŭ piensii, — jakaja idzie na apłatu žylla i kuplu lekaŭ. Taksama jamu dapamahajuć trajuradny plamieńnik i maładaja siamja, jakaja ŭ taho pracuje. Akramia taho, hrošy pryvoziać dočki i siabry, kali pryjazdžajuć u hości.
Biełaruskaja majomaść Aryniča znachodzicca pad aryštam: dom, lecišča i dvuchpakajovaja kvatera, jakuju jon kupiŭ unuku. Nie zastałosia ŭ vałodańni i akcyj «Pinskdreva».
Znachodziačysia ŭ Polščy, Arynič vioŭ pierapisku sa śledstvam, sprabujučy dakazać svaju nievinavataść. Jaho zaprašali pryjechać nazad u Biełaruś, ale jon na heta nie navažyŭsia. Tady jaho abjavili ŭ vyšuk Interpała i dva razy sprabavali zatrymać: adzin raz u Polščy ŭ 2012-m, a druhi ŭ Italii ŭ 2013-m.
Paśla niekalkich dzion u polskim śledčym izalatary jon pieražyŭ insult, a ŭ italjanskaj turmie mužčynu navat spadabałasia, bo da jaho tam było «pavažlivaje staŭleńnie, choć tam i zabojcy siadzieli». Pabytovyja ŭmovy byli dobryja, a ježu pryvozili z restarana.
Abodva razy vydavać Łarana Aryniča Biełarusi polskija i italjanskija ŭłady admovilisia.
U 2016 hodzie Śledčy kamitet paviedamiŭ Aryniču, što vyšuk u dačynieńni da jaho spynieny, a miera strymańnia źmienienaja z zaklučeńnia pad vartu na chatni aryšt. Jaho znoŭ zaprašali viarnucca ŭ Biełaruś, i znoŭ jon admoviŭsia. Ale pahadziŭsia pryjści na dopyt u Biełastoku, dla čaho ŭ Polšču adkamandziravali staršaha śledčaha pa asabliva važnych spravach Alaksandra Novikava.
Arynič adkazaŭ na ŭsie pytańni ŭ prakuratury Biełastoka ŭ prysutnaści Novikava. Toj ni ŭva što nie ŭmiešvaŭsia, a naprykancy prapanavaŭ Aryniču napisać zajavu ab pamiłavańni. Ale jon admoviŭsia, skazaŭšy, što nie ličyć siabie vinavatym. Paśla taho, jak śćviardžaje były hiendyrektar, ź im nichto bolš nie źviazvaŭsia.
Viarnucca ŭ Biełaruś jon choča i spadziajecca, tym bolš što termin daŭniny pa jahonym artykule — 15 hadoŭ, jakija nieŭzabavie minuć. Ale pajedzie Arynič na radzimu tolki kali budzie ŭpeŭnieny, što abvinavačańnie sapraŭdy źniata: «Budzie bačna, moža być, ja da taho času viarnusia na radzimu ŭ trunie».
Niadaŭna jon napisaŭ čarnavik lista ŭ prezidyum Usiebiełaruskaha narodnaha schodu i prapanavaŭ čatyrom svaim byłym supracoŭnikam, jakija ŭžo na piensii, sabrać podpisy pad hetym listom.
«Usie adkazali «nie». Skazali mnie, što nie čas, mahčyma, u nastupnym hodzie. A što ŭ nastupnym hodzie, ja ŭžo i nie staŭ pytacca», — padsumoŭvaje Arynič.
Kamientary
"Niadaŭna jon napisaŭ čarnavik lista ŭ prezidyum Usiebiełaruskaha narodnaha schodu i prapanavaŭ čatyrom svaim byłym supracoŭnikam, jakija ŭžo na piensii, sabrać podpisy pad hetym listom."