Cichanoŭskaja pavinšavała biełarusaŭ z Dniom adnaŭleńnia niezaležnaści i źviarnułasia da namienkłatury i vajskoŭcaŭ
Śviatłana Cichanoŭskaja zapisała zvarot da Dnia abviaščeńnia niezaležnaści Biełarusi.
Cichanoŭskaja adznačaje, što ŭ historyi Biełarusi ŭ adnym šerahu zmahańnia biełarusaŭ za prava mieć svaju dziaržavu stajać padziei 25 sakavika 1918 hoda, kali była abvieščanaja niezaležnaść BNR, 27 lipienia 1990-ha, kali była pryniataja Dekłaracyja ab dziaržaŭnym suvierenitecie, i 25 žniŭnia 1991-ha, kali Dekłaracyja nabyła status kanstytucyjnaha zakonu.
«Ja časam čuju, maŭlaŭ, niezaležnaść «zvaliłasia ź nieba». Heta nie tak. Niezaležnaść Biełarusi stała mahčymaj dziakujučy zmahańniu i pracy pakaleńniaŭ biełaruskich patryjotaŭ», — kaža Cichanoŭskaja.
Pavodle jaje, usia historyja našaj krainy — heta historyja baraćby za svabodu.
«My paŭstavali, kali nas sprabavali paniavolić. My viali partyzanskija bai, kali vojsku nie chapała ruk. My pierachodzili da cichaha pratestu i nie dazvalali spynić bićcio svabodalubivaha biełaruskaha serca, kali zdavałasia, što ŭsio prapała.
U biełarusaŭ jość jakaści, jakija zaŭždy dapamahali nam pieražyć ciomnyja časy. Ciarplivaść i pracavitaść, talerantnaść i miralubnaść, imknieńnie da spraviadlivaści i luboŭ da svajoj ziamli. I ja vieru, što dziakujučy hetym jakaściam, a taksama našaj salidarnaści, my i ciapier zmožam viarnuć sabie naš dom, vyzvalić ludziej z turmaŭ i adstajać niezaležnaść našaj krainy. Jak pakazaŭ 2020-y, my, biełarusy, umiejem pakazać siabie i ździvić uvieś śviet», — davodzić Cichanoŭskaja.
Jana zaklikała biełarusaŭ praciahvać baraćbu i prajaŭlać salidarnaść.
Taksama jana źviarnułasia da tych, chto pracuje ŭ sistemie, u dziaržaŭnaj namienkłatury i armii.
«Ja viedaju, što siarod vas šmat hodnych ludziej. Niezaležna ad taho, jakija ŭ vas pohlady, pasady i abaviazki, pamiatajcie: niezaležnaść — najvyšejšaja kaštoŭnaść i najvyšejšy zdabytak našaha narodu. Nie dazvalajcie režymu źniščyć toje, što my zdabyli 25 žniŭnia 1991 hodu, pradać našuju krainu Rasii i ŭciahnuć naš narod u vajnu. Vy majecie słužyć biełaruskamu narodu, a nie złačynnamu dyktataru, jaki hatovy zapłacić niezaležnaściu krainy dziela zachavańnia asabistaj ułady», — napisała jana.
Kamientary