Žychary Nihieryi i PAR zładzili samy sapraŭdny ździek z taksistaŭ estonskaj kampanii

Žychary Nihieryi i Paŭdniova-Afrykanskaj Respubliki, jakija časta ładziać vojny ŭ sacsietkach, pieranieśli hetyja «bajavyja dziejańni» na ni ŭ čym nie vinavatych kiroŭcaŭ taksi kampanii Bolt, zasypaŭšy ich falšyvymi zamovami. Kampanii pryjšłosia adklučyć mahčymaść zakazaŭ pamiž hetymi dźviuma afrykanskimi krainami, piša Bi-bi-si.

Karystalniki sacsietak ź Nihieryi i PAR, dźviuch najbujniejšych ekanomik Afryki, užo daŭno i rehularna trolać adzin adnaho.

U hety raz trolinh raspaŭsiudziŭsia za miežy sietak, i pačatak jamu moh pakłaści tvit adnaho paŭdniovaafrykanskaha karystalnika, jaki źjaviŭsia ŭ aŭtorak.

«Kali mnie sumna, ja zakazvaju Bolt u Nihieryi, bo ich braty nas nie pavažajuć», — napisaŭ hety karystalnik u sietcy X.

Inšyja paŭdniovaafrykancy padchapili ideju, nihieryjcy tut ža pačali adkazvać: rabić zamovy, naprykład, u Kiejptaŭnie, siedziačy za piać tysiač kiłamietraŭ u Łahasie, i admianiać ich, kali kiroŭca ŭžo pryjechaŭ.

Kiroŭca Bolt Muńjaradzi Čyńjama, zimbabvijec, jaki pracuje ŭ Kiejptaŭnie, raspavioŭ, što jon pryniaŭ try zamovy, nie zdahadaŭšysia, što jany — falšyvyja, i patraciŭ biezvynikova šmat času, paliva i hrošaj.

Akramia taho, pa słovach Čyńjama, nihieryjskija falšyvyja pasažyry zasypali jaho abraźlivymi replikami ŭ dadatku taksafirmy.

Taksist z horada Kano na poŭnačy Nihieryi skazaŭ, što achviarami hetaha złoha rozyhryšu stali i jon, i mnohija jaho kalehi.

«Ja telefanavaŭ, telefanavaŭ, a jon nie adkazvaŭ, — raspavioŭ hety taksist ab zamovie z zamiežnaha numara. — A potym jon admianiŭ pajezdku».

U kampanii Bolt skazali Bi-bi-si, što jany zabłakavali klijentaŭ, jakija ŭdzielničali ŭ hetym trolinhu taksistaŭ, a taksama adklučyli mahčymaść zakazaŭ u Nihieryi z paŭdniovaafrykanskich telefonnych numaroŭ i naadvarot.

«My razumiejem, jakija nastupstvy hetaja situacyja mieła dla našych partnioraŭ — kiroŭcaŭ u Nihieryi i Paŭdniovaj Afrycy», — abviaščaje zajavu Bolt.

Bolt — heta estonskaja kampanija, jakaja zabiaśpiečvaje zakaz taksi praz dadatak. Hety kankurent Uber, pavodle danych na jaho sajcie, pracuje ŭ 600 haradach u dziasiatkach krain śvietu.

U Nihieryi Bolt pracuje ŭ 33 haradach, u PAR — u 23.

U Nihieryi ŭ apošnija niekalki miesiacaŭ mocna padaražeła paliva, i nihieryjskim taksistam było asabliva prykra tracić kaštoŭnyja litry biezvynikova.

Zusim niadaŭna karystalniki sacsietak z PAR i Nihieryi zładzili virtualnuju svarku z-za finalistki konkursu «Mis Paŭdniovaja Afryka», jakaja, budučy napałovu nihieryjkaj, atrymała ŭ Internecie vał abraz ksienafobskaha charaktaru i źniałasia z konkursu.

Da hetaha nihieryjcy i paŭdniovaafrykancy bilisia ŭ sietkach za svaich pop-zorak, Ajru Star i Tajłu, a akramia taho, jany ŭvieś čas abmieńvajucca abrazami na adras svaich futbolnych zbornych.

• 2
• 2
• 7
• 22
• 0
• 1
• 3
• 0