Čamu kiraŭnikom svajoj Administracyi Łukašenka pastaviŭ Dźmitryja Krutoha? Jon moža stać pierajemnikam?
Da pryznačeńnia kiraŭnikom łukašenkaŭskaj Administracyi Dźmitryj Kruty byŭ pasłom Biełarusi ŭ Rasii. Spytali ŭ analitykaŭ, čamu 43-hadovaha čynoŭnika zabrali z Maskvy ŭ Minsk.
Karbalevič: Hałoŭnaja zadača Krutoha — vybary 2025
Na dumku palityčnaha ahladalnika «Radyjo Svaboda» Valera Karbaleviča, Dźmitryja Krutoha pastavili kiravać Administracyjaj prezidenta dla taho, kab toj zabiaśpiečyŭ Łukašenku «elehantnuju pieramohu» na vybarach 2025 hoda.
«Hety čałaviek pavinien efiektyŭna pravieści vybarčuju kampaniju. Łukašenka ŭžo atrymaŭ ciažkuju traŭmu padčas prezidenckich vybaraŭ 2020 hoda. Jon nie choča paŭtaryć tuju dramu, jakuju pieražyŭ tady. Mienavita tamu Łukašenka vielmi staranna i vielmi doŭha šukaŭ čałavieka na hetuju pasadu».
Tak jon spyniŭsia na Krutym. Analityk ličyć, što dla Łukašenki, Kruty — heta čałaviek sa stanoŭčym dośviedam mieniedžarskich jakaściej.
«Jon pracavaŭ vice-premjeram, namieśnikam kiraŭnika administracyi. Taksama važna, što jon byŭ ambasadaram u Rasii. Heta značyć, što ŭ jaho jość peŭnyja suviazi z kramloŭskimi palitykami».
Karbalevič miarkuje, što maskoŭski bekhraŭnd Krutoha moža dapamahčy Łukašenku zabiaśpiečyć padtrymku Rasii ŭ hetaj prezidenckaj kampanii, navat u momant kryzisu.
Pasadu ambasadara ŭ Rasii analityk nazyvaje peŭnym tramplinam dla namienkłaturnaha ŭźlotu. Tamu jon raić sačyć za palityčnym losam Alaksandra Rahožnika, jaki źmianiŭ Dźmitryja Krutoha.
Ci možna razhladać Krutoha ŭ jakaści pierajemnika?
«Pytańnie pra pierajemnika ŭźnikaje tady, kali sam uładar źbirajecca sychodzić. Łukašenka nikudy sychodzić nie źbirajecca, tamu pytańnie pra pierajemnika prosta nie aktualnaje», — ličyć Karbalevič.
Naohuł havaryć ci namiakać pra pierajemnika — niebiaśpiečna, dadaje analityk. Bo ŭ takim vypadku čynavienstva pačnie hladzieć užo na novaha čałavieka, taho samaha pierajemnika, a sam uładar traplaje ŭ situacyi kulhavaj kački.
«Łukašenka heta dobra razumieje, tamu ja dumaju, što da samaha kanca nijakich pierajemnikaŭ nie budzie».
Frydman: Kruty małady, łajalny, im mohuć paśla zamianić Hałoŭčanku
Analityk Alaksandr Frydman taksama nie ŭsprymaje heta pryznačeńnie jak sihnał, što Łukašenka abraŭ sabie pierajemnika.
«Takija mierkavańni sapraŭdy možna pačuć, ale mnie takija historyi padajucca pierabolšvańniem.
Tak, heta vielmi ŭpłyvovy čynoŭnik, małady, łajalny Łukašenku, jaki nieadnarazova pakazaŭ svaju addanaść. Jon vidavočna zadavalniaje jak Łukašenku, tak i Rasiju, ale heta nie aznačaje, što jon musić być pierajemnikam.
Heta tyja maładyja kadry, jakija Łukašenka namahajecca prasoŭvać. Napeŭna, jon jašče i mientalna blizki Łukašenku, bo jany abodva z uschodniaj častki Biełarusi. Da taho ž u Krutoha jość peŭnyja prafiesijnyja jakaści, dośvied pracy na kiraŭničych pasadach.
Ale ja b tut nie pierabolšvaŭ z tym, što heta toj čałaviek, jakoha Łukašenka rychtuje ŭ pierajemniki», — vykazvajecca analityk.
Hetaje naznačeńnie nie źjaŭlajecca zahadam Kramla, bo pytańni, za jakija adkazvaje kiraŭnik Administracyi, heta ŭsio ž taki ŭnutranyja spravy.
«Jon adkazvaje za kadravuju palityku, za pracu Administracyi, za rašeńni, jakija prymajucca Łukašenkam. Tak, Kruty praciahnie zajmacca rasijskimi pytańniami, jale ja nie dumaju, što z boku Maskvy byli niejkija namioki.
Dumaju, što jany prosta pakazali, što jany im zadavolenyja, što jon dobra pracuje i znachodzić ahulnuju movu z rasijanami. Jon sprytny, vopytny i dosyć kreatyŭny čałaviek. U rasijskich miedyja Kruty kazaŭ toje, što rasijanie žadali pačuć. Svaje vykazvańni jon dobra ŭbudavaŭ u ideałohiju «ruskaha śvietu», sustrakaŭsia z ŁDNRaŭcami».
«Jon nie viedaje Jeŭropu i Zachad»
Taksama analityk adznačaje, što ŭ adroźnieńnie ad inšych palitykaŭ Dźmitryj Kruty aryjentavany vyklučna na Uschod. Jon nie viedaje Jeŭropu i Zachad. Heta toj čałaviek, jaki hladzić vyklučna na Rasiju. Tamu Maskva vidavočna nie suprać taho, kab taki čałaviek prasoŭvaŭsia pa karjernaj leśvicy.
Frydman razvažaje: kali Kruty budzie dobra spraŭlacca, jaho mohuć pastavić i na miesca ciapierašniaha premjera Ramana Hałoŭčanki.
Łatuška: Krutoha dobra viedajuć u Kramli
Palityk Pavieł Łatuška ličyć, što, pryznačajučy kiraŭnikom Administracyi Dźmitryja Krutoha, Łukašenka padaje miesiedž Kramlu ab tym, što jon pryznačaje absalutna praruskaha čałavieka.
«Kruty adkazvaŭ za padpisańnie 28 intehracyjnych prahram, nakiravanych na toje, kab bolš hłyboka inkarparavać Respubliku Biełaruś u Rasijskuju Fiederacyju», — adznačaje Łatuška.
Palityk nazyvaje Krutoha tym čałaviekam, jaki zabiaśpiečyŭ faktyčnuju inkarparacyju VPK Biełarusi ŭ VPK Rasii dziela taho, kab zabiaśpiečvać vajskovyja intaresy Rasii dla praciahvańnia ahresii suprać Ukrainy.
«Kruty padtrymlivaŭ rasijskuju ahresiju. Heta toj čałaviek, jaki padpisvaŭ pahadnieńni z akupavanymi Rasijaj rehijonami Ukrainy. Jon inicyjavaŭ adkryćcio biełaruskaha konsulstva ŭ Rastovie-na-Donie ź dziejnaściu konsulskaj akruhi, jakaja raspaŭsiudžvajecca na akupavanyja terytoryi Ukrainy».
Łatuška nazyvaje Krutoha čałaviekam, jakoha dobra viedajuć u Kramli.
«Jon maje vielmi šyrokija suviazi na samym vysokim uzroŭni. Tamu naznačajučy takoha čałavieka na faktyčna druhuju pasadu ŭ krainie, Łukašenka daje miesiedž, što jon praciahvaje hetuju palityku», — ličyć Pavieł Łatuška.
Kamientary
Łukašienko na odnom sojuźnikie 30 let propravił… a načnieš s eurokałchozam stasunki mieť.. šibko skinut..