Biełarusy i palaki adnavili źniščany ŭ rasijskaj vioscy pomnik achviaram stalinskaha teroru
Jon byŭ razburany niekalki hadoŭ tamu nieviadomymi. Jak miarkujuć - praŭładnymi aktyvistami.
Pomnik achviaram stalinskaha teroru, rasstralanym u 1937-1938 hadach, u rasijskim siale Biełastok u Tomskaj vobłaści, dzie žyvuć vychadcy ź Biełarusi i Polščy, žychary adnavili za svoj košt.
«Vyrabili novyja tablički ź imionami 100 čałaviek: 93 žychary vioski i 7 ksiandzoŭ, jakija ŭ roznyja hady słužyli ŭ sielskim chramie. Usie jany byli rasstralanyja ŭ 1937-1938 hady padčas tak zvanaj «polskaj apieracyi» NKUS», — paviedamiła «Tavarystva Miemaryjał».
Udakładniajecca taksama, što tablički ŭstanavili paśla ŭračystaj imšy ŭ sielskim chramie ŭ prysutnaści miascovych žycharoŭ, pałomnikaŭ katalickaj abščyny Tomska i ich śviataroŭ.
Miemaryjał achviaram teroru byŭ ustanoŭleny ŭ 2003 hodzie pa inicyjatyvie žychara vioski Vasila Chanieviča. Manumient składaŭsia ź mietaličnych tabličak ź imionami rasstralanych NKUS ludziej, a taksama 4-mietrovaha katalickaha kryža, bo naščadki biełarusaŭ i palakaŭ pa-raniejšamu vyznajuć katalickuju vieru.
11 listapada 2022 hoda, u Dzień niezaležnaści Polščy, nieviadomyja śpiłavali mietaličny kryž i źbili tablički. Pa fakcie vandalizmu pa zajavie žycharoŭ vioski była ŭzbudžanaja kryminalnaja sprava, adnak vinavatych rasijskaja palicyja nie znajšła. Mnohija niezaležnyja rasijskija ŚMI śćviardžali, što miemaryjał byŭ źniščany praŭładnymi aktyvistami.
Žychary Biełastoka letaś svaimi siłami adnavili kryž, a ciapier viarnuli na raniejšaje miesca tablički.
Źniavoleny raskazaŭ, jak siadzieŭ u kałonii ŭ Hłybokim u susiedniaj kamiery sa Statkievičam3
Kamientary