Hramadstva44

Z dota pad Lachavičami ściaruć nadpisy, jakija prasłaŭlali «Vialikuju pieramohu»

Miascovyja ŭłady pryznali, što zbudavańnie pryznačałasia dla abarony ad tych, kaho jany chacieli ŭšanavać.

Daŭhačasny ahniavy punkt (dot) pad Lachavičami. Skrynšot videa

U pačatku krasavika «Naša Niva» pisała pra toje, što na dziaržaŭnym telebačańni vyjšaŭ prapahandyscki siužet «Daroha da Pieramohi. Partyzany Lachavickaha rajona», u jakim pakazali stary abarončy žalezabietonny bunkier, na ścianie jakoha vyviedzienyja ličby «1941—1945», piacikancovaja zorka i hieorhijeŭskaja stužka. 

Dot dosyć paznavalny, bo mieścicca akurat kala darohi Lachavičy-Baranavičy, mienavita tamu jamu i vyznačyli rolu prapahandysckaha stenda. 

Ale tyja, chto nanosiŭ patryjatyčnyja nadpisy i simvały, vidavočna, nie viedaŭ historyju.

Polskija doty kala darohi Baranavičy-Lachavičy. Fota: Sport i turyzm Lachavickaha rajona 

Reč u tym, što dot byŭ pabudavany ŭ 1937-1939 hadach palakami dla stvareńnia Baranavickaha ŭmacavanaha rajona ŭzdoŭž levaha bieraha Ščary. Kankretna heta ŭmacavańnie było ŭźviedziena kala vioski Dajniaki ŭ sistemie hrupy sučasnych dotaŭ na adrezku Darava-Łabuzy.

Raźmieščany doty byli tak, kab abaraniać pryhraničny polski rajon ad balšavickaj navały z uschodu, to-bok ad Čyrvonaj Armii.

U telesiužecie śćviardžajecca, što dot byŭ uźviedzieny ŭ časy Pieršaj suśvietnaj vajny, ale heta niapraŭda. Doty taho času budavalisia na inšym, zachodnim bierazie Ščary.

Pra toje, što polskija doty niejak vykarystoŭvalisia ŭ časy Druhoj suśvietnaj vajny, a tym bolš pry abaronie Biełarusi ad nacystaŭ — nijakich źviestak niama. Što nie pieraškodziła ŭklučyć ich śpis abjektaŭ miascovaha patryjatyčnaha panteona.

Zvarot čytača. Fota: telehram-kanał «Lachavickaha vieśnika»

Na histaryčnuju niedakładnaść źviarnuŭ uvahu adzin z čytačoŭ miascovaj rajonki «Lachavicki vieśnik», jaki aburyŭsia tym, što polskaje zbudavańnie biez anijakich dokazaŭ vydajuć za dot Vialikaj Ajčynnaj vajny. Praz tydzień hazieta ŭ svaim telehram-kanale apublikavała adkaz miascovaha ideołaha Volhi Burak.

Čynoŭnica pryznała, što naniesieny «niavyznačanaj asobaj» nadpis «1941-1945» nie adpaviadaje histaryčnamu pieryjadu, i paabiacała, što jaho prybiaruć z dota. 

Chto ž moh być hetaj «niavyznačanaj asobaj»? Na «dotach Pieršaj suśvietnaj vajny», jak ich nazyvajuć u dziaržaŭnych miedyja, uzdoŭž darohi Lachavičy-Baranavičy ŭvieś čas pravodziacca pracy pa naviadzieńni paradku. 

Staršynia rajsavieta Juryj Čarankievič i dziaŭčaty z BRSM na subotniku kala polskich dotaŭ. Fota: telehram-kanał «Lachavickaha vieśnika»

U kancy krasavika 2024 hoda na subotniku paradak vakoł ich navodzili miascovyja deputaty, supracoŭniki rajadździeła pa nadzvyčajnych situacyjach i aktyvisty Biełaruskaha respublikanskaha sajuza moładzi. Beeresemaŭcaŭ pryvozili čyścić doty i ŭ 2019 hodzie. Tady pieršy sakratar rajkama arhanizacyi raspaviadała padletkam, što ŭ časy Pieršaj suśvietnaj vajny tut prachodziła pryfrantavaja zona, choć hetyja zbudavańni nijakaha dačynieńnia da taho pieryjadu nie mieli.

Beeresemaŭcy čyściać polski dot. Fota: telehram-kanał «Lachavickaha vieśnika»

Daviedacca pra heta možna było prosta praz pošuk u internecie – infarmacyi pra hetyja abarončyja zbudavańni šmat, i jana dosyć kankretna ŭkazvaje na toje, kim i dla čaho doty byli pabudavanyja.

Tak što pytańnie, jakija «niavyznačanyja asoby» mahli biespakarana nanieści nadpisy na docie, što dobra vidać z darohi pamiž rajcentrami, čysta rytaryčnaje. U łukašenkaŭskaj Biełarusi histaryčnaja pamiać absalutna ślapaja — dla aficyjnaha naratyvu sapraŭdy isnuje tolki adna vajna.

Pra polskija doty mižvajennaha času mohuć raspaviadać jak pra doty Pieršaj suśvietnaj vajny, a paśla nanosić na ich nadpisy, što adsyłajuć da padziej Druhoj suśvietnaj — nijakaha dysanansu ŭ čynoŭnikaŭ heta nie vyklikaje.

«Naša Niva» — bastyjon biełaruščyny

PADTRYMAĆ

Kamientary4

  • Josik
    23.05.2024
    Kali kiraŭnik nieadukavany, dyk i ŭsio jaho atačeńnie pavinna takim być, bo nie daj boža, chto skaža, što nie moh jaho baćka zahinuć na vajnie.
  • Mch
    23.05.2024
    Cikavaja pazicyja va ŭładaŭ: kali što sami nie toje zrobiać dyk "nievyznačanaja asoba", a kali treba kahości "zakryć" dyk hatovy ledź nie z prybiralni pramuju tranślacyju ładzić.
  • Nacdem
    23.05.2024
    Biełyja amierykanskija zorki, dziakuj tupyja kamuniaki

Bajden vychodzić z prezidenckaj honki46

Bajden vychodzić z prezidenckaj honki

Usie naviny →
Usie naviny

Prarasijskaja aktyvistka aburyłasia, što nie moža apublikavać fota ź bieł-čyrvona-biełym ściaham5

Na Rastoŭskaj AES adbyŭsia vybuch i Rasiju nakryła chvala radyjacyi? Pasprabavali razabracca1

Ivan Kraŭcoŭ treci raz zapar staŭ sakratarom Kaardynacyjnaj rady40

Śledam za krasnadarcami vyjšli patrabavać elektryčnaści i žychary Anapy1

«25 litraŭ za 2 hadziny». Hrybnyja trafiei ź lasoŭ stali bolš raznastajnymi3

«Minskija Patryki? Nie, Bikini Botam». Najlepšyja tvity tydnia4

Źjaviłasia FOTA z suda nad Ryka Kryhieram

Zamiest SMS — vyćcio siren. MNS choča pamianiać sistemu apaviaščeńnia padčas niepahadzi2

Ołaf Šolc dahetul hladzić lampavy televizar6

bolš čytanych navin
bolš łajkanych navin

Bajden vychodzić z prezidenckaj honki46

Bajden vychodzić z prezidenckaj honki

Hałoŭnaje
Usie naviny →