Biełarus źniaŭsia ŭ papularnym amierykanskim sieryjale i raskazaŭ, što było na zdymačnaj placoŭcy
Biełaruski błohier Serge.titovv na svajoj staroncy ŭ tyktoku raskazaŭ, jak jon zdymaŭsia ŭ papularnym amierykanskim sieryjale Fallout. Rolik užo nabraŭ bolš za 360 tysiač prahladaŭ i 13 tysiač łajkaŭ, zaŭvažyŭ CityDog.io.
Chto hety chłopiec?
Siarhiej pierajechaŭ u ZŠA ŭ krasaviku 2022 hoda. Tam jon padzarablaje taksistam, a taksama zdymajecca ŭ roznych filmach i sieryjałach u masoŭcy. Naprykład, niadaŭna jon źniaŭsia ŭ papularnym amierykanskim sieryjale Fallout, da hetaha raskazvaŭ pra pracu na inšych placoŭkach. Časta Siarhiej nie ahučvaje nazvy prajektaŭ, tłumačačy heta sakretnaściu.
Pra svaje budni ŭ Amierycy Siarhiej viadzie błoh. Na jutubie ŭ jaho ŭžo kala 16,3 tysiačy padpisčykaŭ, u tyktoku ich jašče bolš — 99,5 tysiačy.
A što za sieryjał?
Fallout — amierykanski postapakaliptyčny telesieryjał, jaki źniali pa matyvach sieryi adnajmiennych videahulniaŭ. Premjera adbyłasia na płatformie Prime Video 10 krasavika hetaha hoda.
Siužet razhortvajecca na zachodnim uźbiarežžy ZŠA prykładna praz 200 hadoŭ paśla hłabalnaha jadziernaha kanfliktu 2077 hoda. Hałoŭnyja hieroi — Maksimus (pasłušnik vajskova-relihijnaj arhanizacyi «Braterstva stali»), Lusi Maklin (pryvilejavanaja dziaŭčyna) i mutant-palaŭničy za hałovami Kupier Hovard, u minułym zorka viesternaŭ. U sieryjale pakazanyja ich pryhody: hieroi daśledujuć razburanyja ziamli i na svaim šlachu časta sutykajucca z roznymi frakcyjami, mutantami i inšymi niebiaśpiekami.
Historyju navakolnaha śvietu hladač paznaje praz fłešbeki piersanažaŭ i adsyłki da hulniavoj franšyzy. Taki pryjom jašče hłybiej apuskaje ŭ cikavy postapakaliptyčny śviet Fallout.
Što adbyvałasia na placoŭcy?
Pa słovach Siarhieja, jaho možna ŭbačyć u nievialikim epizodzie druhoj sieryi. Akcior adznačyŭ, što ŭsie sceny z masoŭkaj hetaha epizodu zdymali kala piaci-šaści dzion.
U svaim roliku chłopiec taksama padkreśliŭ prafiesijanalizm ludziej, jakija pracavali z dekaracyjami i kaściumami. Pavodle słoŭ Siarhieja, u jaho navat uźnikła žadańnie skraści niešta dadomu ŭ jakaści suvienira. Mnohija elemienty byli zroblenyja dakładna jak u hulni, z prapracavanymi drabniutkimi detalami.
Siarhiej padkreśliŭ, što ŭsie dekaracyi, jakija možna było bačyć u druhoj sieryi, byli stvoranyja ŭručnuju. Naprykład, karkasy samalotaŭ i navat paŭrazburanyja apteki taksama budavali admysłova.
Padčas zdymak sieryjała, jak adznačyŭ błohier, na vulicy było kala 35 hradusaŭ ciapła. Dla masoŭki byli asobna arhanizavanyja stoliki z soncaachoŭnymi kremami i vadoj, a pobač stajali pałatki, u jakich pracavaŭ kandycyjanier.
Naprykancy chłopiec paraiŭ usim pahladzieć sieryjał, jak minimum dla taho, kab atrymać asałodu ad jakasnaj zdymki i krutych akcioraŭ.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary