Nienavidzieŭ Rasiju, vielmi lubiŭ Ukrainu, chacieŭ svabody Biełarusi. Syn i siabar pamierłaha ŭ SIZA Alaksandra Kuliniča raskazali pra jaho
Siońnia, 11 krasavika, abvinavačany ŭ abrazie Łukašenki padpałkoŭnik Alaksandr Kulinič musiŭ śviatkavać dzień naradžeńnia — jamu spoŭniłasia b 52. Jon nie dažyŭ da jaho ŭsiaho niekalki dzion: 9 krasavika mužčyna pamior u SIZA № 7 Bresta. I siońnia zamiest śviatočnaha stała ŭ jaho rodnym Maładziečnie byŭ stoł paminalny. Jakim byŭ adstaŭny vajskoviec, jak pieražyvaŭ toje, što adbyvajecca ŭ Biełarusi i susiedniaj Ukrainie? Pra heta z synam i siabram niabožčyka parazmaŭlała «Lusterka».
«Kali b nie SIZA, usio było b u paradku»
Syn Alaksandra Kuliniča, 28-hadovy Mikita, užo niekalki hadoŭ žyvie za miažoj. Ź Biełarusi jon źjechaŭ jašče da padziej 2020 hoda. Ale zastavaŭsia ŭ ciesnym kantakcie z baćkam i astatniaj siamjoj. Ad siamji małady čałaviek jakraz i daviedaŭsia pra śmierć taty.
«Jon pamior u noč z 8 na 9 krasavika, — adryvista kaža małady čałaviek (razmova z žurnalistam dajecca jamu ciažka). — Jak heta adbyłosia — nichto nie razumieje. Nakolki ja viedaju, jon prosta nie pračnuŭsia ranicaj. Mabyć, heta zdaryłasia ŭ kamiery».
Siabar Alaksandra Siarhiej (imia źmienienaje) kaža, što ŭ zatrymanaha byli prablemy z sercam. Pra ich mužčyna daviedaŭsia dva hady tamu.
«U jaho ŭvieś čas byŭ vysoki cisk, — tłumačyć Siarhiej. — Ja pra hetuju prablemu viedaŭ, choć Alaksandr navat nie ŭsim blizkim pra jaje raskazvaŭ. Treba było rabić apieracyju, ale jon trochi pabojvaŭsia. Ja pierakonvaŭ, što bajacca nie varta, ale jon pryvodziŭ prykład adnaho z našych znajomych, jaki pamior praź niekalki miesiacaŭ paśla takoj apieracyi. Tamu Alaksandr šmat času baviŭ u vioscy na śviežym pavietry. Upeŭnieny, što znachodžańnie ŭ SIZA abvastryła jaho prablemy — heta ž mocnyja pieražyvańni, vialiki stres. Kali b nie heta, to ŭsio było b u paradku».
Mikita kaža, što siamji ŭdavałasia rabić miedycynskija pieradačy, patrebnyja baćku dla padtrymańnia zdaroŭja.
«Jamu pieradavali leki, rabili kardyjahramu serca, za im sačyli. U SIZA baćku dahladali, i ŭsio było dobra», — miarkuje jon.
«Jaho zatrymali tamu, što ŭ Biełarusi raście ŭzrovień represij»
Pra zatrymańnie padpałkoŭnika ŭ adstaŭcy surazmoŭcam «Lusterka» stała viadoma ad jaho blizkich u Biełarusi. Zdaryłasia heta 29 lutaha ŭ vioscy Dorahava Karelickaha rajona.
Užo 1 sakavika videa z mužčynam źjaviłasia ŭ adnym z telehram-kanałaŭ, nabližanych da siłavikoŭ. Praŭda, u im byli kadry zatrymańnia sa šmatkvaternaha doma.
«Videa sa šturmam kvatery — heta niešta nie toje, — tłumačyć Mikita. — Tatu zatrymali ŭ vioscy, dzie jon žyŭ apošnim časam. Tam naradzilisia jaho baćka i dziadula».
Siarhiej taksama kaža, što jahonaha siabra zatrymlivali ŭ Dorahavie, a videa šturmu, jakoje apublikavali siłaviki, vidavočna nie adtul i na im — nie Alaksandr.
Dalej na videa sam Alaksandr kaža, što jaho zatrymali «za kamientary ŭ internecie». «U adnym z akaŭntaŭ ja napisaŭ pad vystupam prezidenta «skot», — patłumačyŭ mužčyna. Mikita kaža, što kamientary ŭ internecie baćka pakidaŭ daŭno.
«Nakolki ja viedaju, heta byli kamientary ŭ Telegram, nibyta ŭ ich była abraza Łukašenki. Hetyja kamientary baćka napisaŭ u 2020−2021 hadach, kali ŭ Biełarusi byli aktyŭnyja pratesty», — kaža małady čałaviek.
Čamu Alaksandra zatrymali mienavita ciapier, praz try hady paśla padziej 2020-ha, jaho syn nie viedaje. Ličyć, što niejkaj kankretnaj nahody nie było.
«Dumaju, u suviazi ź blizkimi prezidenckimi vybarami ŭ Biełarusi raście ŭzrovień represij, — razvažaje mužčyna. — Baćka ŭ cełym nikoli nie byŭ miedyjnaj ci publičnaj asobaj, ale zaŭsiody mieŭ ćviorduju hramadzianskuju pazicyju, jakaja vyjaŭlałasia ŭ lubovi da svajoj krainy i radzimy i poŭnaj nianaviści da dziejnaha režymu jak u Biełarusi, tak i ŭ Rasijskaj Fiederacyi».
«Padyšoŭ da kamandzira bajcoŭ, i tyja prapuścili pratestoŭcaŭ»
Alaksandr — kadravy vajskoviec. Vučyŭsia ŭ Vajskovaj akademii Biełarusi, a potym — u rasijskaj Vajskovaj akademii imia Frunzie. Paśla hetaha viarnuŭsia ŭ Brest i pajšoŭ u 38-ju asobnuju hvardziejskuju desantna-šturmavuju Bresckuju bryhadu PDV. Tam słužyŭ da 2009 hoda, adtul syšoŭ u zvańni padpałkoŭnika.
«Apošnim časam jon zajmaŭsia svaim nievialikim biznesam — byŭ zarehistravany indyvidualnym pradprymalnikam. Padrabiaznaściaŭ jahonaj spravy ja nie viedaju, my nie asabliva abmiarkoŭvali heta, ale baćka raskazvaŭ, što pradavaŭ charčovyja dabaŭki dla vypiečki chleba i piačeńnia, jakija byli patrebnyja dla dadatkovaj karyści hetaj pradukcyi», — raskazvaje Mikita.
Siarhiej kaža, što Alaksandr užo daŭno prytrymlivaŭsia prademakratyčnych pierakanańniaŭ. U 2020 hodzie jon udzielničaŭ u pratestach u Breście.
«Asabliva aktyŭna heta było ŭ pieršyja sutki paśla vybaraŭ, — uspaminaje siabar niabožčyka. — Była situacyja, kali AMAP zahnaŭ ludziej na ačapleńnie, u jakim stajali bajcy 38-j bryhady, dzie doŭhi čas słužyŭ Alaksandr. Jon padyšoŭ da kamandzira, pahavaryŭ, i ŭ vyniku tyja prapuścili pratestoŭcaŭ. Ja viedaju heta ź jahonych słovaŭ, nie dumaju, što jon by chłusiŭ pra heta».
Pierasiakaŭsia na pratestach Alaksandr i sa svaim byłym kaleham — ciapierašnim pradstaŭnikom Abjadnanaha pierachodnaha kabinieta Biełarusi pa abaronie i nacyjanalnaj biaśpiecy Valeryjem Sachaščykam. Nahadajem, toj taksama słužyŭ u 38-j bryhadzie ŭ Breście. Siarhiej kaža, što blizkimi siabrami Kulinič i Sachaščyk nie byli, ale jon adhukaŭsia pra svajho sasłužyŭca vielmi stanoŭča: ličyŭ jaho vydatnym aficeram, sapraŭdnym desantnikam i čałaviekam ź vialikaj litary.
«Apošni raz jany bačylisia ŭ 2020 hodzie padčas pratestaŭ. Sustrelisia vypadkova, Alaksandr pieršym padyšoŭ da Sachaščyka, spytaŭ, ci paznaŭ toj jaho. Paznaŭ, adrazu ž nazvaŭ jaho imia, proźvišča i zvańnie, — uspaminaje siabar Alaksandra. — Saša raskazvaŭ, što tady niejkim čynam udałosia damovicca ź siłavikami, i jany adpuścili zatrymanych pratestoŭcaŭ u Breście».
«Chacieŭ, kab Biełaruś była svabodnaj»
Mikita adznačaje, što jahony baćka, jak sapraŭdny patryjot Biełarusi, mocna pieražyvaŭ praz napad Rasii na Ukrainu. Za padziejami ŭ hetaj krainie jon sačyŭ z 2014 hoda, kali adbyłasia anieksija Kryma i pačalisia bajavyja dziejańni na Danbasie.
«Toje, što adbyłosia 24 lutaha 2022 hoda, baćka ŭspryniaŭ u adpaviednaści sa svajoj pazicyjaj nakont padziej u Biełarusi, — tłumačyć małady čałaviek. — Dla jaho heta było šokam. Jon vielmi lubiŭ Ukrainu, časta jeździŭ tudy na adpačynak».
Toje samaje kaža i Siarhiej. Pa słovach mužčyny, Alaksandr šmat jeździŭ u Zakarpaćcie, tam u jaho byli dobryja siabry.
«Praz vajnu ŭ jaho była nianaviść da Rasijskaj Fiederacyi, absalutna žyvaja i nieŭdavanaja, — pryznajecca mužčyna. — My abmiarkoŭvali ź im toje, što Rasija čynić va Ukrainie. Nie budu pierakazvać — u jaho słovach było vielmi šmat maciukoŭ z hetaj nahody».
Pieražyvaŭ Alaksandr i za toje, što adbyvajecca ŭ jaho rodnaj krainie ŭ apošnija hady. Jahony syn kaža, što baćka maryŭ pra svabodnuju Biełaruś:
«Jon byŭ cudoŭnym čałaviekam i žadaŭ našaj krainie i našym ludziam być svabodnymi, žyć svabodna. Heta, mabyć, samaje karotkaje i jomistaje, što ja mahu skazać pra majho baćku. Jon chacieŭ, kab Biełaruś była svabodnaj. I za hetuju svabodu jon zahinuŭ».
Sachaščyk pra pamierłaha ŭ bresckim SIZA: Słužyli razam 30 hadoŭ tamu
«Biełaruś była i budzie žyć». Za jakija kamientary i jak zatrymlivali Alaksandra Kuliniča, jaki pamior u bresckim SIZA
«Viasna»: Alaksandr Kulinič nie byŭ pryznany palitviaźniem, ale heta niavažna
U bresckim SIZA pamior abvinavačany ŭ abrazie Łukašenki padpałkoŭnik-desantnik
Kamientary