Biespracoŭny ajcišnik źbiraje na arendu kvatery praz «Bajsoł». U instahramie aburylisia, kali jon zapościŭ novyja krasoŭki

Ale pra ŭsio pa paradku. Šmat hadoŭ tamu Maksim pracavaŭ žurnalistam, paśla staŭ indyvidualnym pradprymalnikam u Homieli. Paśla vybaraŭ-2020 chłopiec udzielničaŭ u pratestach — zatrymali jaho ŭviečary 9 žniŭnia.

Maksimu prysudzili 15 sutak, ale jaho razam ź inšymi adpuścili raniej paśla taho, jak zatrymanyja padpisali papierku, što nie buduć bolš udzielničać u niesankcyjanavanych mierapryjemstvach.

Chłopiec kaža, što ŭ niejki momant jamu spatrebiłasia dapamoha ŭ apłacie sutak i jon źviazaŭsia z pravaabaroncam Leanidam Sudalenkam. Paśla praz hety vypadak Maksima vyklikali ŭ jakaści śviedki davać pakazańni ŭ sudzie pa spravie Sudalenki.

— Ja skazaŭ, što mnie sapraŭdy apłacili sutki. Paćvierdziŭ, što Leanid nie prasiŭ zrabić za heta niešta ŭzamien.

Maksim kaža, što ŭ Biełarusi jamu rehularna telefanavali siłaviki i zadavali pytańni nakont roznych kryminalnych spraŭ — šukali śviedak i padazravanych.

Tym časam jon pačaŭ pieravučvacca i ŭ vyniku trapiŭ u EPAM. Paśla pačatku vajny va Ukrainie jamu i inšym supracoŭnikam prapanavali rełakiejt, i litaralna na nastupny dzień — 2 sakavika 2022 hoda — Maksim užo byŭ u Vilni.

— Bližej da zimy ŭ mianie zakančvałasia druhaja litoŭskaja viza D. Moj dazvoł na žycharstva pa Blue Card jašče nie byŭ hatovy, tamu mnie treba było vyjechać z terytoryi Litvy. Na svoj strach i ryzyku ja vyrašyŭ naprykancy listapada pajechać u Biełaruś. Na biełaruskaj miažy mianie adpravili na dadatkovuju pravierku, paviali da načalnika mytni. Tudy ž pryjšli maładyja supracoŭnicy z kamieraj, stali pytacca, adkul ja jedu, dzie pracuju, kolki ŭ mianie z saboj hrošaj, pravieryli moj zaplečnik. Praź mianie aŭtobus zatrymaŭsia niedzie na hadzinu.

Atrymałasia tak, što DNŽ Maksima byŭ hatovy ŭžo praz try dni, ale na radzimie jon prabyŭ kala tydnia. Kaža, adzinaje, što paśpieŭ zrabić — padlačyć zuby. U pieršy dzień śniežnia chłopiec viarnuŭsia ŭ Litvu.

Na žal, u 2023 hodzie prajekt, u jakim pracavaŭ Maksim, skončyŭsia, a novy, pa jaho słovach, kampanija nie znajšła. Tamu ŭ žniŭni 2023 hoda jon zastaŭsia biez pracy. Z hetaha momantu chłopiec šukaŭ pracu samastojna.

— Nie viedaju, ci sa mnoj niešta nie tak, ci sapraŭdy popytu niama… Šukaŭ pracu i jak dydžytał-markietołah — ale ničoha. Sa mnoj zvyčajna źviazvajucca rekrutary ź inšych krain ES, i byccam usio dobra, ale kali daviedajucca pra maje prablemy z dakumientami (ja, naprykład, nie mahu adkryć IP, kab pracavać ź inšymi krainami) i što ŭ mianie niama 18 miesiacaŭ stažu pracy ŭ Litvie, kab ja moh pierajechać jašče kudyści, to razmova zvyčajna zakančvajecca. A prapanoŭ ad miascovych kampanij ja pakul nie atrymaŭ.

Maksim kaža, što ŭ rospačy vyrašyŭ rabić humanitarny DNŽ i źviarnuŭsia pa dapamohu ŭ pravaaabarončuju arhanizacyju.

— Jany mnie dapamahli, zrabili chadajnictva. Ja spadziavaŭsia, što jašče i akažuć finansavuju padtrymku. Ale heta niemahčyma — ja ž pryjechaŭ u Litvu jak ekanamičny mihrant. Dziakuj im vialiki, što dapamahli z dakumientami. Jany taksama prapanavali mnie kursy litoŭskaj movy, ja schadziŭ na dva zaniatki. Zrazumieŭ, što heta vielmi składana. I ja vyrašyŭ, što budu vučyć samastojna pa knižkach, bo na zaniatkach ja tarmaziŭ.

U sakaviku 2024 Maksimu pavinny byli anulavać jaho Blue Card, ale pakolki jon užo padaŭsia na humanitarny DNŽ, hetaha rabić pakul nie stali. Chłopiec spadziajecca atrymać novy dazvoł na žycharstva naprykancy krasavika.

— Kali nie atrymajecca da hetaha času znajści pracu pa śpiecyjalnaści, dyk budu dumać nad tym, kab źmianić śfieru.

Maksim kaža, što piać miesiacaŭ žyŭ na ŭłasnyja nakapleńni. A ciapier jamu patrebna dapamoha, tamu jon źviarnuŭsia ŭ «Bajsoł» i paprasiŭ 2500 jeŭra na apłatu kvatery i «padtrymku minimalnaj žyćciadziejnaści».

— Maralna było vielmi składana na heta vyrašycca. Ja nie pryvyk prasić ab dapamozie: ty zdarovy łob, a tut u takim stanoviščy… Hrošy na arendu kvatery skončylisia ŭ studzieni, na ježu jašče jość. Niejak atrymałasia damovicca z ułaśnikami, kab jany pačakali doŭh.

Žyvie jon u nievialikaj kvatery-studyi, jakaja razam z kamunalnymi pasłuhami abychodzicca ŭ 500 jeŭra. Chłopiec pryznajecca, što ŭłaśniki kvatery da jaho situacyi pastavilisia z parazumieńniem. Daviedaŭšysia pra prablemy z hrašyma ŭ Maksima, stali zaprašać jaho na viačery, a taksama kali-niekali pryvozili kvatarantu pradukty.

— Zaraz ułaśniki płanujuć pradać tuju kvateru, u jakoj ja žyvu, i pierajechać za horad. Ale prapanoŭvajuć mnie pierajechać u ich kvateru ŭ Starym horadzie i pažyć tam, pakul ja vyrašaju finansavyja pytańni. Nie ŭjaŭlaju, što rabiŭ by, kali b jany skazali, što pradajuć kvateru. «A ty rabi što chočaš». Dzie ž mnie ŭziać hrošy na novaje žyllo? Da siabroŭ? Nie fakt, što jany pahodziacca. Plus ja pavažaju asabistuju prastoru inšych.

Niadaŭna padpisčyki Maksima ŭ instahramie aburylisia: raspaviadajučy pra pierajezd na novuju kvateru i zbor hrošaj na «Bajsoł», chłopiec vykłaŭ u storys fota novych krasovak Puma, jakija stajać na viežy z abutkovych karobak, i padpisaŭ: «Z hetaj nahody šlifanuŭsia jašče adnoj Puma, inakš nijak».

Pavialičyć

Niekatoryja ludzi pačali kazać, što nie čas nabyvać novy brendavy abutak, kali ty prosiš ab danatach. Maksimu pryjšłosia tłumačyć svoj učynak u storys:

«Chacieŭ 15 chvilin słavy, ale nie tak. Zusim nie prosta pryznacca, što sa studzienia nie ciahnu apłatu arendy. Łob zdarovy, a praličyŭsia, hiedanist ch**ŭ. Mnie ŭžo prylacieła lutaść za krasoŭki, maŭlaŭ, ty danaty źbiraješ ci što. U apraŭdańnie skažu, što para nabytaja pa źnižcy i sa spažyvieckich zapasaŭ. I tolki na vypadak, kali papiaredniaja para parviecca, a takaja ryzyka ŭžo jość.

Pa červieńskaj pracy ja ŭsio jašče čakaju adkazu. Ciapier ja žadaju tolki adnaho: supakoju, prymireńnia i mahčymaści pracavać bieź niejkich abmiežavańniaŭ pa śfierach i zarobkach. Z ajciškaj nie vyharaje pakul, vyharaju sam».

Pavialičyć

Maksim patłumačyŭ hety vypadak «Našaj Nivie» tak:

— Ja fanaberysta viadu instahram, tak zdajecca niekatorym. Tak, ja vykłaŭ krasoŭki, jakija kupiŭ na dniach pa źnižcy za 54 jeŭra. Toje, što vykłaŭ fota na fonie piaci karobak… Heta prosta žart. Heta nie značyć, što ja kupiŭ čarhovyja krasoŭki za danaty. Tym bolš heta prosta zamiena pary abutku, jakaja taksama moža parvacca.

Niekatoryja ludzi pastavilisia da hetaha davoli surjozna. Ja navat tłumačyŭ situacyju adnoj dziaŭčynie, jakaja aburałasia. Zdajecca, jana ŭsio zrazumieła. A niekatoryja siabry ŭspryniali ŭsio jak žart. Adzin mnie navat skinuŭ hrošy na kartu, napisaŭšy ŭ pryznačeńni płaciažu «Na krasoŭki».

Chłopca ździviŭ hety vypadak chiejtu.

— Ja nie staŭ vydalać storys (choć mnie heta raiła advakatka, jakoj taja dziaŭčyna taksama napisała), pasprabavaŭ patłumačyć usim situacyju.

Pavialičyć

Maksim padkreślivaje, što inšych paradaŭ nakont taho, jak jamu treba žyć, jon nie atrymlivaŭ.

— U ludziej było nierazumieńnie, čamu ja vykłaŭ krasoŭki, kali mnie žyć niama na što. Jakoha chrena ja panty kidaju? Nie viedaju, jak skazać inakš. Ja pasprabavaŭ niejak supakoić. Kali mnie sumna, ja, musić, pierahinaju pałku, kali viadu voś tak instahram. Tamu što pakul ja byŭ z pracaj, mnie padabałasia pakazvać pryhožaje žyćcio.

Ja lubiŭ brać mini-adpačynki i jeździć na kancerty ŭ inšyja krainy. Naprykład, byŭ na kancery Chansa Cimiera ŭ Amsterdamie i litaralna moh da jaho dakranucca, kali jon hraŭ. I na kancercie Kiendryka Łamara byŭ, na kancercie Depeche Mode i mnohich inšych. Ja heta pakazvaŭ ludziam. Banalny instahramaŭski kantent — jak ja na śniadanki chadžu, jak ja pa vulicach špacyruju. Mnie niekatory čas było navat soramna heta ŭsio pakazvać — u 2022 hodzie asabliva — bo va Ukrainie vajna, u Biełarusi represii. A tut ja chadžu ŭ Jeŭropie z telefončykam… Kancerty byli maim sposabam nie zvarjacieć, pryjści ŭ paradak. Bo stres ad pierajezdu i treba było niejak dalej žyć. Ja pakazvaŭ padpisčykam biez retušy, jak ja žyvu. Mahčyma kamuści zdavałasia, što ja chaču ŭzvysicca, ale heta nie tak.

U instahramie chłopca sapraŭdy šmat fota z kancertaŭ u inšych krainach. Naprykład, u minułym śniežni, užo nie majučy pracy, jon jeździŭ u Bierlinie na Moderat i The Prodigy.

Tut Maksim znoŭ zhadvaje pra krasoŭki i kaža, što pierastaraŭsia. I što navat doŭha nie moh zasnuć paśla pretenzij, jakija prylacieli.

— A što było b, kali b ja skazaŭ, što na ježu traču bolš za raz, čym kaštujuć hetyja krasoŭki? Zamaŭlaju pradukty raz u 15 dzion i moj ček u Barbora prykładna 60 jeŭra. Redka mahu sabie dazvolić picu, schadzić kudy-niebudź ź siabrami — nie budu ž ja siadzieć doma ŭvieś čas, jak manach. Mahu schadzić na kviz. Ale ŭ cełym ja čytaju doma knihi i vučusia, niešta rablu pa pracy. Pa viečarach zajmajusia muzykaj. Voś taki voś sumny pobyt. Tamu niachaj ludzi nie sumniavajucca, što hrošy pojduć mienavita na arendu.

• 13
• 0
• 16
• 98
• 11
• 13
• 45
• 0