Bitvy, seks i Baradzino. Raskazvajem, ci varta hladzieć novy «Napaleon»

Napaleon Banapart zrabiŭ z Francyi impieryju i najmahutniejšuju jeŭrapiejskuju krainu, ale skončyŭ svaje dni ŭ vyhnańni za sotni kiłamietraŭ ad bierahoŭ Afryki i za tysiačy ad radzimy — my pra vostraŭ śviatoj Aleny.

Brytaniec Rydli Skot viadomy svajoj luboŭju da histaryčnych filmaŭ. Zhadajcie jaho «Hładyjatara», jaki adkryŭ śvietu Chaakina Fieniksa (taksama ŭ roli impieratara), a taksama «Apošniuju duel», «Sychod: cary i bohi» i bahata inšych stužak — 85-hadovy režysior šmat nazdymaŭ za doŭhuju karjeru. Ale «Napaleon» pakazaŭ, što histaryčnaja dakładnaść jaho pry hetym chvaluje nie zaŭsiody. Na paproki historykaŭ spadar Rydli adkazaŭ biezapielacyjna: «Vy sami tam byli? Nie byli? Nu voś i zatkniciesia!»

A paprokaŭ chapaje. Uziać chacia b samy pačatak stužki, dzie Napaleon hladzić na śmiarotnaje pakarańnie karalevy Maryi Antuaniety — nasamreč karsikaniec nie moh tam prysutničać. Dy i byłaja karaleva nie mieła na toj čas doŭhich vałasoŭ, bo pierad śmierciu jaje koratka astryhli.

Skot i scenaryst «Napaleona» Devid Skarpa raspačynajuć film z pakazu hvałtu i śmierci. Heta sustreča dźviuch epoch, jakoj nie było, epochi Maryi Antuaniety i epochi Napaleona. Ale paźniej padajecca, što režysior prosta robić staŭku na hvałt i časam navat jaho smakuje — uziać sceny z paranienymi francuzskimi pratestoŭcami ci z dabivańniem sałdat na poli bitvy.

Ale ž Rydli Skotu nie admoviš va ŭmieńni zdymać uražvalnyja bajavyja sceny. Ich u stužcy šeść, u tym liku heta i sceny bitvaŭ pry Aŭsterlicy, Baradzino i Vaterłoa. I hetyja sceny zroblenyja tak, byccam u lubuju siekundu možna nacisnuć na paŭzu — i atrymaješ histaryčnaje pałatno pracy hienijalnaha mastaka ź dziasiatkami ci sotniami detalaŭ. Pa adukacyi Skot — mastak-dekaratar, tamu takaja prapracoŭka vizualnaha stylu nievypadkovaja.

I jak škada, što za formaj chavajecca praca z akciorami! U hetym «Napaleonie» vam nie patłumačać učynki Banaparta, nie raskažuć padrabiazna, jak heta — stać hałoŭnym u Jeŭropie i potym nizka ŭpaści. A to i padsunuć viersiju apošnich słoŭ hałoŭnaha hieroja, nie pryniatuju historykami.

Vialiki Chaakin Fieniks u roli pieršaha francuzskaha impieratara, jak i cudoŭnaja Vanesa Kirbi ŭ roli Žazefiny — adnyja ź niešmatlikich znachodak hetaj stužki. Nie treba nijakich bitvaŭ, strełaŭ i pažaraŭ u Maskvie, prosta pastaŭcie Fieniksa pierad kamieraj, i jon vam usio pakaža adnymi vačyma. Jaho Napaleon nie stereatypna vialiki i mahutny, jon składany, sa źviarynym pozirkam u čas bitvy, jon šaleje ad kryvi i seksu. Zdajecca, Fieniks moh by skazać jašče tak šmat u abliččy Banaparta, ale hetaja stužka nie daje jamu prastory, i jak možna było tak zrabić z hetym hienijem?

Z Žazefinaj usio jašče horš. Histaryčna pieršaja žonka Napaleona mieła niaprosty los i taki ž składany charaktar, ale ž, kali jana stała impieratrycaj, francuzy palubili Žazefinu. Hetamu spryjali jaje dabrynia i ščodraść, a taksama prykmietnyja ŭčynki: impieratryca dapamahała francuzskim emihrantam, pisała čynoŭnikam listy z zaklikam viarnuć byłym emihrantam ich majomaść i pravy.

U Skota, adnak, Žazefina pačynaje raskryvacca tolki ŭ momant razvodu z Napaleonam. Da hetaha jana ŭ filmie pakazanaja nieŭraŭnavažanaj i sa skačkami nastroju, zanadta pažadlivaj da mužčyn i niespraviadlivaj u hetym da Napaleona — čamu ž nie raskazać i pra jaho kachanak? 

Pavialičyć

Ale Žazefina — nie adziny nieraskryty piersanaž u hetym filmie. Ciaham jaho kudyści źnikajuć jaje dzieci, i znakamityja francuzskija asoby tych časoŭ (Talejran, da prykładu) — byccam blednyja kopii histaryčnych pratatypaŭ. Stereatypna nierazumnym namalavany rasijski impieratar Alaksandr I, ale heta nie pieraškodziła jamu razam z Kutuzavym i zimovym nadvorjem adoleć Napaleona — nie znachodzicie supiarečnaści?

Zatoje fajna vyhladaje hiercah Vielinhtan, brytanski vajskavod, adzin z adkaznych za razhrom Napaleona pad Vaterłoa. I možna zrazumieć francuzskaha historyka Patrysa Hanifi, jaki skazaŭ: «Dokazam, što hety film źniaty anhličaninam, źjaŭlajecca toje, što samyja paśpiachovyja epizody ŭ im — heta bitva pry Vaterłoa i pomsta Vielinhtana». 

Francuzy ŭvohule zasypali stužku krytykaj. Akramia histaryčnych pamyłak, adznačyli i toje, što ŭ filmie nie tłumačycca spadčyna Napaleona ŭ dziaržaŭnym kiravańni, palitycy i vajskovym mastactvie. Ci vy viedali, naprykład, što Banapart zasnavaŭ Bank Francyi, rearhanizavaŭ zakony, zajmaŭsia bujnymi reformami ŭ finansach, adukacyi i relihii?

Ale Skot razam sa Skarpam zamoŭčvajuć nie tolki heta. Jany nie biaruć na siabie pracu i patłumačyć jak śled hledaču nasyčany padziejami napaleonaŭski čas ad pačatku Vialikaj francuzskaj revalucyi da Vaterłoa. Hledaču prapanujuć Tułon, trupy, karanacyju, impieratarski seks pad stałom i hałavu Maryi Antuaniety, i chaj raźbirajecca sam. Skot i Skarpa nie raskazvajuć nam, što stymulavała Napaleona i Žazefinu dziejničać i adčuvać siabie tym ci inšym čynam.

Hladzieć «Napaleona» varta, kali vy amatar Rydli Skota, francuzskaj armii i kłasnych batalnych scen. Ale heta 157 chvilin, uličycie.

Dziesiać novych sieryjałaŭ: voś što možna pahladzieć

Film tydnia: «Kamon Kamon». Kranalnaja čorna-biełaja drama z hienijalnym Chaakinam Fieniksam

Nikałas Kiejdž u najlepšaj formie ŭ dzika śmiešnaj kamiedyi «Scenar mary»

• 6
• 0
• 2
• 4
• 5
• 2
• 3
• 0