Siońnia treciaja hadavina śmierci abaronca Płoščy Pieramien Ramana Bandarenki. Mužčynu žorstka źbili siłaviki ŭ cyvilnym, zavieźli ŭ milicyju, adkul nieprytomnym jaho zabrała chutkaja. Pamior jon u balnicy. Paśla śmierci jaho sprabavali dyskredytavać.
11 listapada 2020 hoda blizu 22 hadziny nieviadomyja ŭ maskach pryjechali na Płošču Pieramien (nieaficyjnaja nazva dvara ŭ Minsku na skryžavańni vulic Čarviakova, Kachoŭskaj i Smorhaŭskaha traktu) z namieram zrezać bieł-čyrvona-biełyja stužki.
31-hadovy žychar adnaho z damoŭ mastak Raman Bandarenka, pačytaŭšy ŭ čacie, što adbyvajecca ŭ dvary, vyjšaŭ pahavaryć ź nieviadomymi. Pierad vychadam pakinuŭ zapis: «Ja vychodžu».
U dvary ŭžo sabrałasia hramada žycharoŭ, jakija aburalisia dziejańniami nieviadomych u maskach. Tyja ŭ adkaz nakinulisia na ludziej. Zaviazałasia bojka.
Byłyja siłaviki z «Bajpoł» pieraličyli imiony tych, chto ŭ toj viečar byŭ u dvary na Płoščy Pieramien, ich vyličyli pa bilinhu telefonnych numaroŭ.
Pavodle źviestak byłych siłavikoŭ, heta Dźmitryj Baskaŭ, Dźmitryj Šakuta, Natalla Ejsmant, Hanna Ejsmant, Pavieł Voŭčak, Žaneta Voŭčak.
A taksama ich achova — supracoŭniki SACHR Siarhiej Sarman, Siarhiej Anciufiejeŭ, Aleh Bujkievič, Raman Savienka, Jaŭhien Cimanoŭski. I supracoŭniki AMAP Rusłan Kulašoŭ i Raman Kryvašein.
Pavodle vidavočcaŭ, na Bandarenku napaŭ adzin ź nieviadomych. Heta bačna na apublikavanym videa. Raman ad mocnaha šturška ŭdaryŭsia hałavoj ab dziciačuju horku i ŭpaŭ, ale jaho praciahvali źbivać. Paśla za ruki i nohi zanieśli ŭ mikraaŭtobus.
Paźniej stała viadoma, što Bandarenku schapili bajcy śpiecyjalnaha atrada chutkaha reahavańnia.
Pavodle rasśledavańnia abjadnańnia byłych siłavikoŭ BYPOL, jakoje abapirajecca na aŭdyjazapis hutarki topavych čynoŭnikaŭ, kamandzir hrupy AMAPa Rusłan Kulašoŭ paviedamiŭ kamandziru AMAPa HUUS Minharvykankama Dźmitryju Bałabie, što kikbaksior, instruktar čaści 3214 Dźmitryj Šakuta traŭmavaŭ adnaho z žycharoŭ dvara. Heta byŭ Bandarenka.
U ciažkim stanie jaho pieradali supracoŭnikam AMAPa. MUS śćviardžała, što jon byŭ u stanie ałkaholnaha apjanieńnia, ale heta było niapraŭdaj.
Z Centralnaha RUUS Ramana Bandarenku nieprytomnaha zabrała chutkaja dapamoha. U jaho byli cialesnyja paškodžańni i čerapna-mazhavaja traŭma ciažkaj stupieni.
Dyjahnastavanaje krovaźlićcio ŭ tyja adździeły mozha, jakija adkazvajuć za žyćciova važnyja pracesy arhanizma. U balnicy chutkaj dapamohi zroblenaja trepanacyja čerapa.
Pavodle miedykaŭ, charaktar paškodžańniaŭ ułaścivy, naprykład, achviaram avaryj, jakija atrymali mocny ŭdar pa hałavie. Abo achviaram pabojaŭ i padzieńniaŭ.
Śledčy kamitet nastojvaŭ, što pamierły byŭ dastaŭleny ŭ milicyju pabitym, u stanie ałkaholnaha apjanieńnia.
U adkaz miedyki apublikavali ŭ telehram-kanale «Biełyja chałaty» dakumient, jaki śviedčyć, što ŭ Ramana Bandarenki było 0% ałkaholu ŭ kryvi.
Pamior Raman Bandarenka 12 listapada 2020 hodu.
13 listapada Łukašenka vykazaŭ spačuvańni rodnym Ramana Bandarenki i, pa jaho słovach, daručyŭ hienieralnamu prakuroru Andreju Šviedu ŭziać pad kantrol rasśledavańnie.
Pa śmierci Ramana jaho cieła niekalki dzion nie addavali rodnym.
18 lutaha 2021 hoda Hienieralnaja prakuratura Respubliki Biełaruś raspačała kryminalnuju spravu pa fakcie naŭmysnaha pryčynieńnia ciažkaha cialesnaha paškodžańnia, jakoje paciahnuła śmierć pa nieaściarožnaści.
Pavodle viedamstva, «datyčnaść supracoŭnikaŭ orhanaŭ unutranych spraŭ da pryčynieńnia Bandarenki Ramana Iharaviča cialesnych paškodžańniaŭ nie ŭstanoŭlena».
20 listapada Ramana Bandarenku pachavali na Paŭnočnych mohiłkach Minska. Raźvitacca ź im pryjšli tysiačy ludziej. Mahiła patanała ŭ kvietkach.
26 listapada na siesii Jeŭraparłamienta adbylisia terminovyja debaty na temu «Niaspynnyja parušeńni pravoŭ čałavieka ŭ Biełarusi, u pryvatnaści zabojstva Ramana Bandarenki», padčas jakich deputaty rezka asudzili represiŭnyja dziejańni biełaruskich uładaŭ i zaklikali da pašyreńnia pakieta sankcyj.
17 vieraśnia 2021 hoda Hienieralnaja prakuratura prypyniła spravu, bo nibyta nie zmahła znajści, kaho pryciahnuć da adkaznaści.
Kryminalnaj spravy tak i nie adnaŭlali, a vinavatyja ŭ śmierci Ramana Bandarenki dahetul aficyjna nie ŭstanoŭlenyja.
«Naša Niva» — bastyjon biełaruščyny
PADTRYMAĆHladzicie taksama:
«Na raźvitańnie my z synam abnialisia» — maci Ramana Bandarenki. VIDEA
Jany adyšli ad nas u 2020 hodzie
Na płoščy Pieramien iznoŭ byli siłaviki. Zatrymali adnaho mužčynu
Azaronak vypuściŭ «rasśledavańnie» pra śmierć Ramana Bandarenki. Što ź im nie tak?
Kamientary