Paśla taho, jak zakryli try punkty propusku na miežach Biełarusi i ES, čerhi z hruzavikoŭ na vyjezd u Jeŭropu vyraśli. Ale ŭpłyvaje nie tolki heta.
Litoŭski kirunak samy napružany
Pa stanie na 16 hadzin 20 kastryčnika, na vyjezd ź Biełarusi ŭ ES sabralisia bolš za 1800 hruzavikoŭ.
Najbolš zahružany punkt propusku — «Kamienny Łoh». Tam sabrałasia bolš za 740 hruzavikoŭ. Na druhim miescy iduć «Bieniakoni», dzie zajezdu na terminał čakajuć bolš za 580 vialikahruzaŭ. U «Pryvałcy» — bolej za 190, u «Katłoŭcy» — 110.
Na adzinym dahetul adkrytym punkcie propusku z Łatvijaj — «Hryharoŭščynie» — u čarzie na vyjezd ź Biełarusi sabrałasia bolš za 160 hruzavikoŭ.
Biełaruskija pamiežniki vinavaciać va ŭsim svaich bałtyjskich kaleh, pakolki tyja prapuskajuć praź miažu našmat mienš transpartu, čym praduhledžana normaj.
Tak, naprykład, za minułyja sutki, praz punkt propusku «Kamieny Łoh» prajechała 54 hruzaviki. Heta kala 11% ad normy. Dniami praź jaho prajechała ŭsiaho 48 vialikahruzaŭ, što nie daciahvaje i da 10% ad normy. Hety punkt propusku zdolny prapuskać pa 500 hruzavikoŭ ciaham sutak.
Na «Pryvałcy» za sutki aformili 75 hruzavikoŭ pry prapusknoj mahutnaści ŭ 230 mašyn. Na astatnich punktach propusku na miažy ź Litvoj i Łatvijaj za apošnija sutki supraćlehły bok aformiŭ kala 50-57% ad normy.
Pahraničny kamitet Biełarusi śćviardžaje, što ciaham tydnia kantrolnyja słužby punkta propusku «Miedzininkaj» («Kamieny Łoh») u siarednim afarmlali 14% transpartu ad normy. U troch inšych pierachodach na miažy ź Litvoj štodzień prajazdžała kala 35% hruzavikoŭ ad normy.
Na łatvijskim kirunku za tydzień zajechała 48% fur ad normy.
A što na miažy z Polščaj?
Admietna, što na polskim kirunku čarha faktyčna adsutničaje. U «Kazłovičach» pierad punktam propusku naličvajecca bolš za 20 hruzavikoŭ. I hetamu jość całkam łahičnaje abhruntavańnie. Za minułyja sutki polski bok pryniaŭ 669 hruzavikoŭ.
U cełym ciaham apošniaha tydnia, ličba hruzavikoŭ, jakija pierasiakajuć biełaruska-polskuju miažu, vahajecca ad 601 da 849 mašyn. To-bok praz adziny adkryty hruzavy punkt propusku na miažy z Polščaj, za sutki prajazdžaje bolš hruzavikoŭ, čym praź piać punktaŭ propusku na miažy ź Litvoj i Łatvijaj razam uziatyja.
Kali za apošnija sutki praz «Kazłovičy» prajechała 669 hruzavikoŭ, to praź piać astatnich punktaŭ propusku, prydatnych dla ruchu hruzavoha transpartu, — 501.
Jak zakryćcio miežaŭ upłyvaje na čerhi
Dniami biełaruski Pahraničny kamitet padvioŭ vyniki pracy paśla taho, jak prajšoŭ miesiac z momantu zakryćcia Łatvijaj punkta propusku «Sielene» («Urbany» ź biełaruskaha boku) i dva miesiacy z momantu zakryćcia dvuch punktaŭ propusku Litvoj. Za dva miesiacy čerhi transpartu ŭ Litvu vyraśli ŭ 2,3 raza, u Łatviju — u 5,8 raza.
«Najbolš zahružany maršrut u krainy ES pa-raniejšamu prachodzić praź litoŭski «Miadzininkaj» («Kamienny Łoh»). Jaho kantrolnyja słužby na praciahu apošnich dvuch miesiacaŭ štosutačna afarmlali kala 39% hruzavoha i lehkavoha transpartu», — havorycca na sajcie viedamstva.
Što tyčycca mienavita lehkavoha transpartu, to pa stanie na 16 hadzin 20 kastryčnika čerhi ź lehkavikoŭ jość tolki ŭ punktach propusku «Pryvałka» i «Bieniakoni». Tam zajezdu na terminał čakajuć 40 i 30 aŭto adpaviedna.
Stała viadoma, chto moža ŭvajści ŭ novy abmien źniavolenymi pamiž ZŠA i Rasijaj5
Kamientary