Urad Łatvii ŭznačalić Evika Silinia. Takim čynam, uradami ŭsich troch krain Bałtyi kirujuć žančyny
U čaćvier prezident Łatvii Edhar Rynkievič daručyŭ adzinamu aficyjnamu kandydatu ŭ premjer-ministry — ministru dabrabytu Evicy Silini, jakaja pradstaŭlaje kiroŭnuju partyju «Novaje adzinstva» — sfarmavać Kabiniet ministraŭ, piša Delfi.lv.
Edhar Rynkievič vyłučyŭ Siliniu pa vynikach kansultacyi ab farmiravańni novaha Kabinieta ministraŭ z palityčnymi partyjami, jakija majuć pradstaŭnictva ŭ Siejmie.
Jon na pres-kanfierencyi vykazaŭ upeŭnienaść, što Silinia zmoža vykanać zadaču — stvaryć urad — u karotkija terminy. «Dośvied i viedy Silini — dobry pačatak dla stvareńnia Kabinieta ministraŭ», — skazaŭ prezident Łatvii.
Rynkievič taksama vykazaŭ spadzieŭ, što da siaredziny vieraśnia hetaja zadača — farmiravańnie ŭrada — budzie zavieršanaja.
Evika Silinia naradziłasia ŭ 1975 hodzie. U 1997 hodzie abaraniła na jurydyčnym fakultecie Łatvijskaha ŭniviersiteta stupień bakałaŭra sacyjalnych navuk, kvalifikacyja — juryst. U 2001 hodzie ŭ Ryžskaj jurydyčnaj škole — stupień mahistra sacyjalnych navuk u śfiery prava, śpiecyjalizacyja — mižnarodnaje i jeŭrapiejskaje prava. Akramia rodnaj łatyšskaj movy, svabodna vałodaje anhlijskaj i ruskaj movami.
Da prychodu ŭ palityku — indyvidualna praktykujučy prysiažny advakat. Jaje muž taksama advakat.
U 2011 hodzie paśla rospusku Siejma bałatavałasia na pazačarhovych parłamienckich vybarach pa Ryžskaj vybarčaj akruzie pa śpisie Partyi reformaŭ prezidenta Vałdzisa Zatlersa (PRZ), adnak abranaja nie była.
Ale mienavita z hetaha momantu Silinia pačała rabić «kułuarnuju» palityčnuju karjeru. Paśla zaćviardžeńnia ŭrada Vałdzisa Dambroŭskisa ŭ listapadzie 2011 hoda stała daradcam pa jurydyčnych pytańniach ministra ŭnutranych spraŭ Rycharda Kazłoŭskisa. Z 2013 pa 2019 hod — parłamiencki sakratar MUS, pry ministru Kazłoŭskisie.
U 2018 hodzie bałatavałasia ŭ Siejm ad «Novaha adzinstva», ale nie była abranaja. U 2019 hodzie, paśla zaćviardžeńnia pieršaha ŭrada Kryšjanisa Karyńša, pakinuła pasadu parłamienckaha sakratara MUS.
Z 2019 pa 2022 hod Evika Silinia — parłamiencki sakratar premjer-ministra Kryšjanisa Karyńša. U Łatvii premjer-ministr maje vialikuju vahu.
Na apošnich parłamienckich vybarach Silinia była abranaja ŭ 14-y Siejm pa Vidziemskaj vybarčaj akruzie. U śpisie zajmała vysokaje druhoje miesca ŭśled za premjeram Karyńšam, pa vynikach vybaraŭ upała na treciaje, prapuściŭšy napierad tolki kiraŭnika parłamienckaj frakcyi «Novaha adzinstva» Ajnara Łatkoŭskisa. Vybarščyki pastavili Silini 63 840 plusoŭ, vykraślena jana była 2154 razy. Taki miechanizm hałasavańnia na vybarach u Łatvii.
Z 2022 hoda Silinia — ministarka dabrabytu ŭ druhim uradzie Kryšjanisa Karyńša. 23% respandentaŭ aceńvali dziejnaść ministra pazityŭna, 24% — niehatyŭna, 29% nie zmahli dać adkazu, a 24% nie viedali pra isnavańnie takoha ministra.
Pa danych dekłaracyi ab dachodach za 2022 hod Evika Silinia vałodaje kvateraj i ziamloj u Ryzie ŭ sumiesnaj ułasnaści, taksama ŭ karystańni — ziamla i budynki ŭ stalicy. Kandydatu ŭ premjer-ministry naležyć aŭtamabil «Miersedes GL 420» 2007 hoda.
Sumu bieznajaŭnych źbieražeńniaŭ — 10,6 tysiačy jeŭra — Silinia zachoŭvaje ŭ aŭstryjskim banku Grazer Wechselseitige Versicherung Aktiengesellschaft. Za hod u vyhladzie zarobku spačatku parłamiencki sakratar MUS, a zatym ministr dabrabytu atrymała kala 50 tysiač jeŭra.
Evika Silinia zamužam, u dekłaracyi paznačany muž — Ajhars Silińš. U ich troje dziaciej.
Takim čynam, try žančyny ciapier kirujuć uradami ŭ krainach Bałtyi.
Zrešty, Silinia nie pieršaja žančyna na pasadzie kiraŭnika ŭrada hetaj krainy. U 2014—2016 hadach Kabmin uznačalvała Łajmdota Straŭjuma. A ŭ 1999—2007 hadach prezidentam była Vajra Vikie-Frejbierha.
Premjeram Litvy ź listapada 2020 hoda źjaŭlajecca Inhryda Šymanicie, a ŭ 2009—2019 hadach prezidentam była Dala Hrybaŭskajcie. U 1990—1991 hadach premjer-ministram Kazimira Prunskienie, u 1999 hodzie v. a. premjera była Irena Dziahucenie.
Premjeram Estonii sa studzienia 2021 hoda źjaŭlajecca Kaja Kałas, joj 46 hadoŭ. Prezidentam Estonii ŭ 2016—2021 hadach była Kierści Kaljułajd.
Da červienia 2023 hoda premjeram Finlandyi była Sana Maryn, ale heta treci premjer u historyi krainy. U svoj čas prezidentam krainy była Tarja Chałanien.
U 2021—2022 hadach urad Šviecyi ŭznačalvała Mahdalena Andersan.
Urad Danii z 2019 hoda ŭznačalvaje Miete Frederyksen. Premjeram Isłandyi źjaŭlecca Katryn Jakabsdocir. U 2013-2021 hadach premjeram Narviehii była Erna Sulbierh.
Kamientary