Francuzskaje vydańnie Le Monde ličyć, što ŭłada ŭ Kijevie trapiła ŭ ščamlotki: jana i zaležyć ad dapamohi Zachadu, i rasčaravanaja abmiežavańniami, ź jakimi Zachad hetuju dapamohu vydzialaje. Va ŭkrainskim hramadstvie panuje viera ŭ pieramohu i ŭ Jeŭropu. Heta mocna kantrastuje z razdražnionaściu ŭkrainskich elitaŭ z nahody zapavolenaści tempaŭ akazańnia dapamohi.
Jak adznačajecca ŭ artykule, niahledziačy na toje, što vajna ciahniecca ŭžo bolš za 500 dzion, 87% ukraincaŭ, jak śviedčać vyniki niadaŭniaha apytańnia Kijeŭskaha mižnarodnaha instytuta sacyjałohii, z aptymizmam hladziać u budučyniu i vierać u pieramohu.
Adpaviedna hetamu ž apytańniu, u 78% ukraincaŭ jość svajak ci siabar, jaki zahinuŭ ci byŭ paranieny na vajnie. Tamu bieskłapotny vyhlad vuličnych kaviarań padmanlivy. Stalica choć daloka ad frontu, ale, jak adznačaje aŭtarka artykuła, vajna zajmaje dumki ŭsich ludziej.
Va ŭradavych budynkach nijakaj biesturbotnaści nie adčuvajecca. Ministry i vysokapastaŭlenyja čynoŭniki padčas sustrečy ŭ pačatku lipienia z hrupaj ekśpiertaŭ ź Jeŭrapiejskaj rady pa mižnarodnych adnosinach (ECFR), jak adznačaje aŭtar, nie chavali svajho rasčaravańnia.
I čyńnikaŭ hetaha rasčaravańnia niekalki.
Pieršy — chod kontrnastupu, jaki całkam adroźnivajecca ad tryumfalnaj apieracyi vosieni 2022 hoda, kali, jak cytuje aŭtar słovy adnaho z aficyjnych asobaŭ, «my prajšli praź linii voraha jak praz masła».
Hetym razam «rasijanie nie zdajucca, jany vajujuć». Jany paśpieli ŭmacavać try linii abarony i pastavić dva miljony min. Ich avijacyja nanosić vialikija straty. Ukrainskija vojski prasoŭvajucca pavolna, nastup kaštuje našmat bolš čałaviečych žyćciaŭ.
Druhaja pryčyna rasčaravańnia ŭ vahańniach Vašynhtona. Niavyznačanaść samitu NATA ŭ Vilniusie, adznačaje žurnalistka, pieražyvajecca ź jašče bolšaj razdražnionaściu praź ciažkuju situacyju na miescach.
Ułada ŭ Kijevie trapiła ŭ ščamlotki. Vajujučy z našmat bolšym i lepš uzbrojenym voraham, Ukraina całkam zaležyć ad zachodniaj i asabliva amierykanskaj dapamohi. I jana vymušanaja raspłačvacca čałaviečymi žyćciami za niedastatkovaść hetaj dapamohi, prytym što ŭkraincy ŭpeŭnienyja, što vajujuć taksama za biaśpieku Jeŭropy.
«Amierykancy paŭtarajuć, što heta Ukrainie vyrašać, chto pieramoža, ale jany abmiažoŭvajuć našyja mahčymaści, zatrymlivajučy svaje F16 na miesiacy. Zialenski — heta žadany hość dla ŭsich, usie chočuć abniacca ź im na kamieru. Ale ŭ pracesie pryniaćcia niekatorych rašeńniaŭ z Ukrainaj abychodziacca tak, jak byccam by joj nie miesca ŭ hetym pakoi»,
— cytuje aŭtar słovy adnaho ź siabroŭ ukrainskaha ŭrada.
Takija nastroi, pavodle słoŭ kijeŭskaha palitołaha, jakoha cytuje vydańnie, prasočvajucca ŭ hramadskuju śviadomaść, źmianiajučy jaje:
strymlivajučy pastaŭki mahutniejšaj zbroi, «Zachad vymušaje nas vieści vajnu, jakuju jon sam nie staŭ by vieści».
Ukrainskija aficyjnyja asoby, piša žurnalistka, chacieli b zamianić «pakrokavy padychod», pry jakim prośby ab nastupnym vyšejšym uzroŭni vajennaj dapamohi spačatku atrymlivajuć admovu, a praź niekatory čas zhodu, na inšuju stratehiju.
«Kali my pačynali, pałovu taho, što my prasili, ličyli nieprymalnym»,
— cytuje žurnalistka słovy adnaho z ukrainskich čynoŭnikaŭ i dadaje, što heta było na pačatku, kali patrebnaja była aściarožnaść. Ciapier u Kijevie vitajuć «čaroŭnaje pieraŭtvareńnie» Francyi, ale čas nie čakaje. Jon nie hraje na karyść Ukrainy.
Treciaj pryčynaj rasčaravańnia na dumku aŭtara, źjaŭlajecca imknieńnie krain-partniorak Ukrainy ŭličyć intaresy Rasii.
«Našy partniory pavinny pierastać aziracca na Kreml pry pryniaćci važnych rašeńniaŭ»,
— cytuje žurnalistka słovy Uładzimira Zialenskaha, skazanyja im 28 červienia.
Siońnia na Zachadzie bajacca razvału Rasii, jak kaliści, u 1990—1991 hadach, bajalisia razvału Savieckaha Sajuzu.
Tym nie mienš, jak pieradaje aŭtar słovy adnaho z ukrainskich čynoŭnikaŭ: «Usie bajalisia Pucina. Vy karmili źviera. I što vy atrymali?»
U toj ža čas, piša žurnalistka, pierśpiektyvy ŭstupleńnia Ukrainy ŭ Jeŭrapiejski Sajuz akreślilisia. ES vyhladaje bolš ščodrym i bolš dastupnym, čym NATO, z bolš zrazumiełaj praceduraj. I na dadzieny momant, ličyć aŭtar, heta dapamahaje adahnać dumku, jakaja tryvožyć rozumy ŭkraincaŭ — dumku, što hetaja vajna nikoli nie skončycca.
Čytajcie jašče:
ZŠA prytrymlivajucca prahmatyčnaj formuły «ničoha biez Ukrainy, ale nie ŭsio dla Ukrainy» — Le Monde
Izrailski biznesmien staŭ iranskim špijonam dziela darahoj va ŭtrymańni biełaruski. Chto hetaja fatalnaja łedzi?11
Kamientary