ZŠA prytrymlivajucca prahmatyčnaj formuły «ničoha biez Ukrainy, ale nie ŭsio dla Ukrainy» — Le Monde
Niahledziačy na rehularnyja zajavy Vašynhtona ab padtrymcy Kijeva, zastajucca pytańni ab stupieni i praciahłaści hetaj palityčnaj i vajskovaj padtrymki.
Aŭtarytetnaje francuzskaje vydańnie Le Monde źviartaje ŭvahu na debaty, jakija razharnulisia ŭ ZŠA napiaredadni samitu NATA, jaki prachodzić siońnia i zaŭtra ŭ Vilni. Jany datyčać nie pytańnia nieabchodnaści vajskovaj i palityčnaj dapamohi Ukrainie, jakaja nikim nie asprečvajecca, a jaje mietadaŭ.
Aŭtar artykuła zaŭvažaje, što Złučanyja Štaty zajaŭlajuć ab svajoj prychilnaści pryncypu «adkrytych dźviarej» dla Paŭnočnaatłantyčnaha sajuza i ŭ toj ža čas supraćdziejničajuć nieadkładnamu ŭstupleńniu Ukrainy.
«Ja nie dumaju, što jana hatovaja», — cytuje Le Monde zajavu prezidenta ZŠA Bajdena CNN u hetuju niadzielu.
Karespandent vydańnia nahadvaje, što asnoŭnaja pryčyna nie ŭ vykanańni Ukrainaj kryteryjaŭ dla ŭstupleńnia, a ŭ 5-m artykule Dahavora ab Paŭnočnaatłantyčnym sajuzie. Jaho pałažeńni ab tym, što napad na adnaho člena źjaŭlajecca napadam na ŭsich, nie mohuć być raspaŭsiudžanyja na Ukrainu padčas vajny z-za aściarohi spravakavać pramy kanflikt pamiž NATA i Rasijaj.
Madel Izraila
Tamu Vašynhton razhladaje formu dvuchbakovaha partniorstva ŭ halinie biaśpieki z Ukrainaj u dadatak da abaviazacielstvaŭ Paŭnočnaatłantyčnaha sajuza. Takaja madel im vykarystoŭvajecca ŭ adnosinach da Izraila.
U adpaviednaści ź dziesiacihadovym pahadnieńniem (2019—2028 hady) Złučanyja Štaty štohod akazvajuć hetaj dziaržavie vajskovuju dapamohu ŭ pamiery 3,8 miljarda dalaraŭ, što, jak adznačaje vydańnie, u značnaj stupieni jość zamaskiravanaj subsidyjaj amierykanskaj vajskovaj pramysłovaści.
Le Monde cytuje słovy ekśpierta analityčnaha centra pry Radzie pa mižnarodnych adnosinach (Council on Foreign Relations) Čarlza Kupčana (Charles Kupchan) ab tym, što
«pamiž Ukrainaj i Izrailem jość vidavočnyja adroźnieńni. U Izraila jość jadziernaja zbroja, a ŭ Ukrainy jaje niama. Ale Ukraina susiedničaje z mahutnaj dziaržavaj, tamu izrailskaja madel moža być karysnaj dla zabieśpiačeńnia z boku ZŠA vajennaj pieravahi Ukrainy. I ŭ toj ža čas takaja madel dazvalaje paźbiehnuć harantyj biaśpieki, ekvivalentnych 5-mu artykułu».
Hetak ža Bieły dom zachoŭvaje aściarožnaść pierad prośbami ŭzmacnieńnia asabovaha składu Aljansu na svaich terytoryjach, jakija vykazali try krainy Bałtyi i Polšča. Jany prahučali na fonie zajavy ab raźmiaščeńni rasijskaj jadziernaj zbroi ŭ Biełarusi i chutkaha prybyćcia ŭ hetuju krainu vahnieraŭcaŭ.
Vydańnie adznačaje, što amierykanskaja administracyja pa-raniejšamu skieptyčna stavicca da hetych dźviuch pahroz.
Daradca pa nacyjanalnaj biaśpiecy ZŠA Džejk Salivan kaža pra «patencyjnaje razhortvańnie» jadziernaj zbroi. Što da vahnieraŭcaŭ, to vysokapastaŭlenyja amierykanskija čynoŭniki sumniavajucca nakont taho, ci zacikaŭleny jany ŭ tym, kab raźmiaścicca ŭ Biełarusi, hetkim sanatoryi paśla misij u Afrycy ci va Ukrainie.
Vajskovaja dapamoha
Aŭtar artykuła adznačaje, što maryć ab chutkim krachu rasijskaha režymu nie davodzicca. Dla administracyi Bajdena razmova idzie pra toje, kab zasiarodzicca na vajskovaj padtrymcy Ukrainy ŭ krytyčny momant kontrnastupleńnia.
«Heta budzie vielmi doŭha, i heta budzie vielmi, vielmi kryvava. Ni ŭ koha nie pavinna być nijakich iluzij z hetaj nahody», — cytuje karespandent słovy načalnika štaba abarony ZŠA hienierała Marka Mili (Mark Milley), skazanyja 1 lipienia.
Bieły dom pryznaje ciažkaści, ź jakimi sutyknułasia kontrnastupleńnie, abumoŭlenyja niekalkimi faktarami: intensiŭnym miniravańniem terytoryi rasijanami, stvareńniem ešałanavaj abarony i, narešcie, niedachopam bojeprypasaŭ va ŭkrainskaha boku.
Hetym abumoŭlena, jak adznačaje žurnalist, rašeńnie ZŠA pieradać kasietnyja bojeprypasy Ukrainie pry adsutnaści inšych rašeńniaŭ.
Le Monde pryvodzić słovy daradcy prezidenta ZŠA pa nacyjanalnaj biaśpiecy Džejka Salivana (Jacob Sullivan) ab tym, što
«va ŭkraincaŭ taksama jość značnaja kolkaść srodkaŭ, jakija jany jašče nie zadziejničali ŭ bajavych dziejańniach. Historyja hetaha kontrnastupleńnia jašče i blizka nie dapisanaja da kanca».
Ale aficyjnyja asoby ZŠA taksama viedajuć, jak adznačaje aŭtar, što Rasija ŭdzielničaje va ŭłasnaj honcy ŭzbrajeńniaŭ. Va ŭmovach vajennaj ekanomiki kraina maje namier na praciahu troch hadoŭ uznavić svaje siły: tanki, braniatechniku, artyleryju — i madernizavać uzbrajeńnie. Zdolnaść Rasii da procistajańnia, viadoma, pamienšała, ale nijakim čynam nie vyčarpana, zaŭvažaje karespandent.
Ničoha biez Ukrainy, ale nie ŭsio dla Ukrainy
Vydańnie adznačaje, što administracyja Bajdena, uvieś čas paŭtarajučy formułu «ničoha ab Ukrainie biez Ukrainy», admaŭlaje lubuju damoŭlenaść z Rasijaj, jakaja była b zaklučana za śpinaju achviary ahresii.
Ale niadaŭna stała viadoma ab sakretnych kantaktach pamiž niekalkimi ekśpiertami analityčnaha centra Rady pa mižnarodnych adnosinach i rasijskimi aficyjnymi asobami, u tym liku kiraŭnikom rasijskaj dypłamatyi Siarhiejem Łaŭrovym.
Pa danych NBC, były dypłamat Ryčard Haas (Richard Haass) i analityki Čarlz Kupčan i Tomas Hrem (Thomas Graham) byli siarod amierykanskich udzielnikaŭ kanfidencyjnaj sustrečy ŭ Ńju-Jorku ŭ krasaviku.
U adkazie na pytańnie, zadadzienaje Le Monde, Čarlz Kupčan nie paćvierdziŭ hetuju infarmacyju, ale adznačyŭ, što «niefarmalnyja ci paralelnyja kantakty adyhryvajuć rolu, kali aficyjnyja kantakty adsutničajuć abo małaefiektyŭnyja».
Aŭtary artykuła adznačajuć, što z pačatku vajny ZŠA ŭžo vydzielili Kijevu na 42 miljardy dalaraŭ vajskovaj dapamohi.
Amierykanskaja linija zaklučajecca ŭ formule «ničoha biez Ukrainy, ale nie ŭsio dla Ukrainy» — prahmatyčnaj prychilnaści, jakaja madyfikuje peŭnyja paramietry ŭ zaležnaści ad abstavin, jak zaŭvažaje karespandent vydańnia.
Kantekst budučych vybaraŭ
Le Monde cytuje słovy dyrektara pa daśledavańniach Brukinhskaha instytuta (analityčnaha centra ŭ Vašynhtonie) Majkła O'Chenłana (Michael O'Hanlon):
«Ja zhodny ź idejaj, što Ukraina pavinna zaŭsiody ŭdzielničać u razmovie, ale pry ŭmovie, što my nie adčuvajem siabie abaviazanymi zaŭždy davać im toje, što jany patrabujuć. Ja za toje, kab dać im balistyčnyja rakiety kštałtu ATACMS, samaloty F-16 i navat šturmavyja viertaloty. Ja nie padtrymlivaju, prynamsi, pakul, pradstaŭleńnie im statusu člena NATA, i ja nie padtrymlivaju abiacańnie taho ž uzroŭniu harantavanaj dapamohi, što i ŭ papiarednija razy».
U kamientaryi hetych słoŭ karespandent Le Monde adznačaje, što administracyja Bajdena pierad vybarami 2024 hoda nie ŭpeŭnienaja, što Pałata pradstaŭnikoŭ, u jakoj daminujuć respublikancy, pahodzicca prahałasavać za novy pakiet dapamohi ŭ śfiery biaśpieki.
Aŭtar adznačaje, što Zachad pryznaje prava Ukrainy na samaabaronu ad rasijskaj ahresii, ale taksama baicca, što kanflikt moža stać zaciažnym.
Sajuźniki viedajuć, što Uładzimir Pucin robić staŭku na stomlenaść ich hramadskaj dumki i vysokuju canu biezumoŭnaj padtrymki Ukrainy. Kreml razumieje, nakolki mohuć paŭpłyvać na tryvałaść sajuźnikaŭ budučyja vybary — jeŭrapiejskija ŭ červieni 2024 hoda, a zatym, pierš za ŭsio, amierykanskija prezidenckija vybary ŭ listapadzie.
Vydańnie adznačaje, što isnuje spakusa (jakaja publična nie ahałošvałasia) pahadzicca na zamarožvańnie kanfliktu na ŭzor vajennaj demarkacyjnaj linii pamiž dźviuma Karejami. U takim vypadku razmova budzie iści pra ŭmacavańnie suviazi Ukrainy z Zachadam biez členstva ŭ Jeŭrapiejskim sajuzie i NATA.
Košt hetaha — adsutnaść mahčymaści dla Ukrainy adnavić svaju terytaryjalnuju cełasnaść u najbližejšaj budučyni. Takaja forma stabilizacyi ŭjaŭlała b mienšaje zło dla administracyi Bajdena pierad prezidenckimi vybarami, jak adznačaje vydańnie.
Čytajcie jašče:
U Vilni pačynajecca samit NATA
Valeryj Sachaščyk — pra sustrečy padčas samitu NATA i Pryhožyna z vahnieraŭcami
Naŭsieda zaklikaŭ NATO zabycca pra akt ab supracoŭnictvie z Rasijaj i stvaryć bazy la jaje miežaŭ
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary