«Donald, jak małady palityk, nie razumieje…» Što Łukašenka raniej kazaŭ pra Trampa
Jak składvalisia adnosiny Biełarusi z ZŠA ŭ pieršy termin Donalda Trampa i što havaryŭ Łukašenka pra Trampa tady?
Pieršy termin Donalda Trampa na pasadzie prezidenta ZŠA byŭ adznačany paciapleńniem — praŭda, vielmi abmiežavanym — adnosin ź Biełaruśsiu. Zrešty, praces pačaŭsia jašče pry libierale Abamie.
U 2017 hodzie biełarusy atrymali mahčymaść padać dakumienty na amierykanskuju vizu niepasredna ŭ Minsku, a z 1 lutaha 2018 hoda amierykanskaje pasolstva ŭpieršyniu za 10 hadoŭ stała pradstaŭlać «poŭny śpiektr nieimihracyjnych vizavych pasłuh».
«I nie nastolki jon durny»
U pačatku 2017 hoda, praź niekalki dzion paśla taho, jak Tramp aficyjna prystupiŭ da vykanańnia svaich prezidenckich paŭnamoctvaŭ, Łukašenka pravioŭ «Vialikuju razmovu», padčas jakoj zajaviŭ, što ŭ adnosinach da ZŠA Rasija «siadzić u dvaccać siomym vahonie».
«Ździŭlaje matyvacyja: vialikaja Rasija — «voś Tramp tam pryjšoŭ da ŭłady, i ciapier biełarusy mohuć nie raźličvać na mnohaje». Kolki razoŭ užo kazaŭ, u tym liku i kiraŭnictvu Rasii — nie rabicie hetamu Trampu horš! Ledź što nie jany pryznačyli prezidenta Złučanych Štataŭ Amieryki!
Tramp — prezident Amieryki z łozunham «Zrobim Amieryku mocnaj» abo jašče niejki. I kali my z Pucinym abmiarkoŭvali hetuju prablemu, ja jamu vykazaŭ svoj punkt hledžańnia na hetaje pytańnie: voś ujavicie, siadzim za stałom pieramoŭ, my z taboj i Tramp. Łozunh napisany — «zrobim Amieryku mocnaj».
U jakim vahonie budzieš siadzieć? U pieršy nie pasadziać, siadzi ŭ dvaccać siomym. Abo ŭ dvaccatym. Jak ekanomika Rasii: dvaccataje miesca — dvaccaty vahon. Pahodzišsia? Nie, i ja b nie pahadziŭsia. A jak potym reahavać na heta? Prezidenta ž vy pryznačyli!», — paviedamiŭ Łukašenka.
«Tramp što, taksama drenny? Jak Abama drenny, tak i hety drenny? Treba zrazumieć, što Amieryka abrała praamierykanskaha prezidenta, nie prarasijskaha i nie prabiełaruskaha. I nie nastolki jon durny, jak niekatoryja dumajuć! Chaj jon niespraktykavany — tak, jon robić niekatoryja kroki, nam adsiul zdajecca…
Ja ŭsio heta prachodziŭ. Tak, treba było spakajniej dzie-nidzie, ale heta nam adsiul zdajecca. Ale tam ža šmat razumnych ludziej! Vosiemdziesiat pracentaŭ jaŭrejaŭ, i nie skažaš, što heta durnyja ludzi. Nacyja daloka nie durnaja! Tamu nie treba znachodzicca ŭ ejfaryi, maŭlaŭ u Amierycy tam niešta adbyłosia. Tramp, jaki b jon ni byŭ mocny, uvieś śviet nie adviernie. Jak by nam ni padabałasia hłabalizacyja — heta trend na stahodździ, jaho nichto ŭžo nie adviernie», — śćviardžaŭ Łukašenka.
«Jamu treba dakazvać, što jon moža kiravać krainaj»
Praź niekalki miesiacaŭ, u krasaviku 2017 hoda, kamientujučy rakietnyja ŭdary ZŠA pa Siryi Łukašenka zajaviŭ:
«Siońnia Amieryka ŭ adzinočku i navat sa svaimi bližejšymi nataŭskimi sajuźnikami nie zmoža pierakulić abo kiravać usim śvietam. Treba abmiežavać apietyty i zajmacca tym, dzie vielmi vialikija tvaje intaresy. A jany — u Paŭnočnaj Amierycy pieradusim».
U toj ža čas jon pasprabavaŭ apraŭdać dziejańni Trampa, zaŭvažyŭšy, što toj starajecca vykonvać dadzienyja hramadzianam padčas pieradvybarčaj kampanii abiacańni, ale realizacyju hetych inicyjatyŭ usialak spyniajuć:
«Jamu treba dakazvać, što jon moža kiravać krainaj. A tam pieraškadžajuć, nie dajuć — i tyja, što prajhrali, i niekatoryja bahatyja, — źviarnuŭ uvahu Alaksandr Łukašenka. — I tady, kab vyrašyć unutrypalityčnyja pytańni i spadabacca ludziam, naciskajuć na knopku».
Mahčyma, svaimi zajavami Łukašenka spadziavaŭsia, što ZŠA admieniać sankcyi, uviedzienyja jašče ŭ 2006 hodzie ŭ dačynieńni da jaho i šerahu čynoŭnikaŭ i členaŭ ich siemjaŭ paśla prezidenckich vybaraŭ u Biełarusi. Ale ŭ červieni 2017 hoda stała viadoma, što novaja administracyja ZŠA ich praciahnuła.
Ale heta nie pieraškodziła Łukašenku praciahvać padchvalvać Trampa ŭ svaich intaresach. Tak, na piedahahičnaj naradzie ŭ vieraśni 2017 hoda jon vystupiŭ za žorstkaje abmiežavańnie svabody vykazvańnia ŭ internecie i manipulatyŭna staviŭ u prykład ZŠA:
«Raniej amierykancy napieradzie płaniety ŭsioj biehli, paprakali ŭsich u tym, što kantralujem internet. A siońnia Donald Tramp sam pryjšoŭ da hetaha i razumieje, što nielha dalej hetuju volnicu raspuskać. Nam treba prymać rašeńni, bo spoźnimsia».
«Ja ž vielmi mocna baleŭ za Donalda Trampa»
U žniŭni 2018 hoda ŭ intervju telekanału «Biełaruś 1», zhadvajučy pieradvybarčuju kampaniju 2017 hoda ŭ ZŠA, Łukašenka skazaŭ:
«Ja nie chavaŭ i nie chavaju, što ja ž vielmi mocna baleŭ za Donalda Trampa. I publična niekalki razoŭ vykazvaŭsia ab chodzie pieradvybarnaj kampanii ŭ ZŠA na karyść faktyčna Donalda Trampa».
«Donald Tramp sapraŭdy praamierykanski. Dla bolšaści hramadstva. Ale kahości ŭ elicie nie zadavalniaje. (…) Elicie, niejkaj častcy, asabliva demakratyčnaj, nie padabajucca pavodziny Trampa. Tak, jon nieardynarny palityk. Takoha jašče nie było, kab najbujniejšaja kraina ŭ śviecie i jaje prezident tak aktyŭna dziejničaŭ, i prytym takimi niestandartnymi mietadami. (…)
Ja nie va ŭsim jaho padtrymlivaju. Tym bolš, moža, ja čahości nie razumieju. Naturalna, niekatoryja pytańni schavanyja ad usich nas, i ad mianie ŭ tym liku. Ale vajavać z usim śvietam, u tym liku ŭ handli… Napeŭna, heta nie zusim pravilna. Ale — ja jašče raz padkreślivaju — nie ŭsie my, napeŭna, viedajem, što tam isnuje i što adbyvajecca», — dzialiŭsia Łukašenka svaim pohladam na Trampa.
«Ja byŭ prychilnikam Trampa, ale ciapier mnie zdajecca, što heta ŭsio hulnia»
Praź niekalki miesiacaŭ, u kancy kastryčnika 2018 hada Łukašenka aburaŭsia prapanovaj Polščy raźmiaścić na svajoj terytoryi amierykanskuju vajskovuju bazu (u vyniku jana tak i nie była pabudavana).
«Tramp naŭrad ci dumaje pra toje, što jość takaja maleńkaja Biełaruś, što tut ludzi žyvuć. Ja byŭ prychilnikam Trampa, ale ciapier mnie zdajecca, što heta ŭsio hulnia. Ale takija razmovy pra jadziernuju zbroju, pra razmachvańni rakietami škodnyja, a Donald hetaha, jak małady palityk, nie razumieje», — havaryŭ tady Łukašenka.
U žniŭni 2019 hoda Łukašenka sustreŭsia z daradcam prezidenta ZŠA pa nacyjanalnaj biaśpiecy Džo Bołtanam, padčas jakoj nie praminuŭ nahadać, što baleŭ na vybarach mienavita za ciapierašniaha prezidenta ZŠA: «Ja «ŭmiešvaŭsia» ŭ amierykanskija vybary i baleŭ za Trampa».
«Ja nie skažu, što ŭžo amierykancy ŭ nas takija vialikija siabry»
U vieraśni 2019 hoda Łukašenka sustrakaŭsia z namieśnikam dziaržsakratara pa palityčnych pytańniach Devidam Chejłam, a ŭ lutym 2020-ha — ź dziaržsakratarom ZŠA Majkam Pampiea.
Paśla hetych sustrečy z Pampiea Łukašenka zajaviŭ, što «pieryjad choładu» ŭ adnosinach dźviuch krain skončyŭsia:
«Ja nie skažu, što ŭžo amierykancy ŭ nas takija vialikija siabry. Ale pieryjad voś hetaha choładu, kali my hladzieli adzin na adnaho praź niejkuju ambrazuru, žalezabietonnuju toŭstuju ścienku, skončyŭsia. I nikomu nie treba ŭ hetym kirunku stahnać, pieražyvać i hałasić. My naładžvajem adnosiny z samaj vialikaj impieryjaj — viadučaj krainaj śvietu».
Łukašenka, jaki na toj momant dabivaŭsia ad Rasii źnižak na enierharesursy, adznačaŭ, što vizitam Pampiea ŭ Minsk byccam by byli niezadavoleny ŭ Maskvie i śćviardžaŭ, što z ZŠA ŭ jaho «zavočna daŭnija adnosiny»:
«Kali razhledzieć usie materyjały, to śviet nam apładziravać budzie. My z Pampiea, kali jon byŭ dyrektaram CRU, pravodzili tut samyja surjoznyja apieracyi».
«Amierykancy vielmi dobra viedajuć, navat časam lepš, čym ja, niekatoryja pytańni va ŭzajemaadnosinach z Rasijaj», — śćviardžaŭ Łukašenka i raskazvaŭ, što byccam by Pampiea jamu paabiacaŭ, što ZŠA dapamohuć Biełarusi i pastaviać naftu pa kankurentnaj canie.
U mai 2020 hoda Tramp unios na razhlad Sienata ZŠA kandydaturu pasła ZŠA ŭ Biełarusi paśla 12 hadoŭ adsutnaści. 20 lipienia 2020 hoda Łukašenka pryznačyŭ pasłom u ZŠA namieśnika ministra zamiežnych spraŭ Aleha Kraŭčanku.
«Ja sadžusia ŭ viertalot, a amierykancy z kosmasu, svołačy, bačać ža ŭsio»
Ale ŭžo praź niekalki miesiacaŭ Łukašenka pierahledzieŭ svajo staŭleńnie da ZŠA. I pryčynaj stali pratesty ŭ Biełarusi.
Tak, 23 žniŭnia 2020-ha hoda jon zajaviŭ, što za imi stajać amierykancy: «Ja sadžusia ŭ viertalot, a amierykancy z kosmasu, svołačy, bačać ža ŭsio. I jany adrazu ŭ svoj centr pad Varšavaj dali sihnał, što viertalot padniaŭsia».
U listapadzie 2020 hoda jon zajaviŭ, što ZŠA stvaryli centry sačeńnia za Biełaruśsiu nie tolki ŭ Varšavie, ale i ŭ Kijevie:
«ZŠA — jany pad Varšavaj centr stvaryli, a ciapier u Kijevie stvaryli. Dobra, ja b skazaŭ, ale my z rasijanami, raźviedki naša i rasijskaja papracavali, ubačyli hetyja centry. Nivodnaha palaka tam niama. Heta tolki terytoryja. Tam usie amierykancy siadziać — razumnyja, talenavityja, zdolnyja ludzi. (…) Voś vy stvaryli, vy kačajecie, vy ŭmiešvalisia ŭ čužyja vybary, voś atrymali sami. Heta im, razumiejecie, papiarok horła Biełaruś, treba skamiačyć. Nie ŭdasca!»
U kancy 2020-ha Sienat ZŠA zaćvierdziŭ Džuli Fišar pasłom u Biełarusi. Adnak pieryjad paciapleńnia skončyŭsia, i biełaruskija ŭłady nie dali joj vizy. Dypłamat vymušanaja była pracavać u Vilni.
Śluńkin: Adnym tolki vyzvaleńniem palitviaźniaŭ Łukašenka Trampa nie zacikavić
Łukašenka spadziajecca pierazapuścić adnosiny z Zachadam pry Trampie. Voś što napisaŭ pra jaho blizki paplečnik Trampa
Łukašenka: Tramp — heta siła
«Źmienaŭ u palitycy pa Biełarusi nie budzie, ale jość niuansy». Valer Kavaleŭski — pra toje, čaho čakać ad Trampa
Bondarava abrynułasia na muziej Janki Kupały i mastaka Sušu31
Kamientary