«Jość ludzi, jakim jość dziela čaho žyć, ludzi, jakim jość dziela čaho pamirać i ludzi, jakim jość dziela čaho zabivać. Džon Uik nie naležyć ni da adnych ź ich», — kaža markiz Viensan de Hramon, adzin z samych vytančanych kinošnych złydniaŭ ź biezdakorna zahannym załomam vusnaŭ. Ale jon pamylajecca.
Pa vodhukach krytykaŭ, «Džon Uik: Častka 4» staŭ najlepšym filmam va ŭsioj franšyzie — samym dramatyčnym, teatralizavanym, maštabnym i kamičnym. Hetym razam režysior Čad Stachiełski ździviŭ nie stolki siužetam, kolki vizuałam i ŭmieńniem pieratvaryć bajavik u estetyku i mastactva. Pierad nami toj vypadak, kali styl — heta i jość siužet.
Mnohija kinakrytyki paraŭnoŭvajuć novuju stužku z baletam — dzie karotkija fiłasofskija razmovy kileraŭ i «vialikich bosaŭ» pra sens žyćcia vystupajuć svajho rodu intermiedyjami pamiž zachaplalnymi scenami pajadynkaŭ, jakija razhortvajucca na fonie zamka ŭ Osacy, na rejv-viečarynie ŭ Bierlinie i na fonie hałoŭnych słavutaściaŭ Paryža. Niezadoŭha da finału bojki adbyvajucca na leśvicy, pa jakoj hałoŭny hieroj padymajecca da paryžskaj baziliki Sakre-Kior, — i ciažka nie paraŭnać hety padjom z uzychodžańniem na Hałhofu.
Viadoma, možna biaskonca ździŭlacca tamu, jak dobra vyhladaje kaścium Džona Uika paśla biaskoncych pierastrełak i kačańnia na padłozie ź niekalkimi dziasiatkami praciŭnikaŭ i jak całkam spakojna hałoŭny hieroj štoraz padymajecca paśla padzieńniaŭ z vyšyni, ale heta nie maje značeńnia: hledačam i tak zrazumieła, što bojki i kroŭ u filmie niesapraŭdnyja, śviet — vydumany, ale hety vydumany śviet zaciahvaje i ŭ im navat chočacca zatrymacca.
Režysiory — Čad Stachiełski i Devid Litč — raniej byli pastanoŭščykami trukaŭ tryłohii «Matryca». Mienavita Kianu Ryŭz pryciahnuŭ paru da pracy nad hetym filmam. Były kikbaksior Čad Stachiełski naohuł pačynaŭ svaju karjeru ŭ kino jak kaskadzior. I ŭ «Džonie Uiku» hałoŭnaj adzinkaj kinamovy stanovicca virtuoznaść truka.
Pryvid šukaje mahiły
Pieršaja častka «Džona Uika» vyjšła ŭ prakat u 2014 hodzie. U joj hieroj, viadomy kiler, jaki daŭno adyšoŭ ad «spraŭ», vymušany znoŭ bicca z mafijaj, kab adpomścić mužčynam, jakija zabili jaho sabaku — apošni padarunak niadaŭna pamierłaj žonki.
Z taho času siužet u filmie asabliva nie źmianiaŭsia: kab adpomścić kryŭdzicielam i zdabyć volu, Džon Uik u kožnym filmie bjecca z mafijaj. Ale dabracca da hałoŭnaha voraha jon zmoža, tolki kali projdzie pa dziasiatkach trupaŭ jaho pamahatych — jakich budzie źniščać z majsterstvam sapraŭdnaha prafiesijanała.
Biezumoŭna, hałoŭnaja postać u filmie — akcior Kianu Ryŭz, čyj charaktar i fiłasofija robiać jaho zabojcam, jakoha ciažka nie pryniać jak stanoŭčaha piersanaža. Džon Uik u čaćviortaj častcy — čałaviek-pryvid, jaki ŭžo daŭno nie žyvie paŭnakroŭnym žyćciom, jon u pošuku tolki adnaho — zbavieńnia. «Jość ludzi, jakim jość dziela čaho žyć, ludzi, jakim jość dziela čaho pamirać i ludzi, jakim jość dziela čaho zabivać. Džon Uik nie naležyć ni da adnych ź ich», — kaža markiz Viensan de Hramon, adzin z samych vytančanych kinošnych złydniaŭ ź biezdakorna zahannym załomam vusnaŭ.
Ale jon pamylajecca. Miarkujučy pa ŭsim, Džonu Uiku jakraz jość dziela čaho i žyć, i pamirać, i zabivać. Adnak pry hetym jon nie budzie skačvacca ŭ sientymientalizm ci ŭzvalvać na siabie misiju pa vyratavańni śvietu. Kali «matryčny» Nea zmahaŭsia ŭ imia čałaviectva, to Uiku ad ludziej daŭno ničoha nie patrebna. Jon maŭklivy, strymany i maksimalna adčužany ad śvietu, a Kianu Ryŭz davodzić vobraz «mocnaha, maŭklivaha typa» da krajnaści.
Jak padličyŭ Wall Street Journal, amal treć usich replik piersanaža ŭ novym filmie składajecca z adnaho słova. Pa słovach režysiora Čada Stachiełskaha, Ryŭz vyrazaŭ prykładna pałovu dyjałohaŭ, napisanych dla jaho piersanaža ŭ pieršapačatkovym scenaryi — kab pakazvać, a nie raskazvać. Ścisłaść — heta kluč da mistyki Džona Uika.
Niečakanaj detallu filma dla tych, chto nie hladzieŭ papiarednija častki, stanie toje, što ŭ niekalkich epizodach hieroj budzie razmaŭlać pa-rusku — jak stała viadoma z treciaha filma, Džon Uik naradziŭsia ŭ siamji cyhan u pasieliščy Padhorje ŭ Biełaruskaj SSR. Pry naradžeńni mieŭ imia «Džardani Javanavič». Va ŭkrainskim prakacie čaćviortaj častki hieroju źmianili nacyjalnaść. «Ja dzicia Ukrainy», — kaža hałoŭny hieroj hołasam ukrainskaha artysta.
Jak «Džon Uik 4» trapiŭ u rasijski i biełaruski prakat?
Uviesnu 2022 hoda nieaficyjna paviedamlałasia, što ŭ rasijski prakat film nie vyjdzie. Studyja Lionsgate, jakaja zajmałasia vytvorčaściu karciny, pryniała rašeńnie ab prypynieńni vypusku svaich filmaŭ u Rasii.
Adnak film usio ž vyjšaŭ: jak piša Deadline, heta adbyłosia tamu, što studyja praciahvaje vykonvać svaje abaviazki pa raniej zaklučanych kantraktach z kampanijami-dystrybjutarami, jakija nie znachodziacca pad sankcyjami. Takoj kampanijaj źjaŭlajecca maltyjskaja Unicorn Media Limited, jakaja vypuskaje John Wick: Chapter 4 u Rasii.
Čytajcie jašče:
Što pahladzieć. «Ryčar» — kryminalny sieryjał, ad jakoha navat krytyki ŭ zachapleńni
Liniejka filmaŭ Netflix na 2023 hod vyhladaje niebahata, ale cikava
Minčanka pakinuła stanoŭčy vodhuk na sumku — i raptam vykryła zdradu čužoha muža19
Kamientary