Pajšli biarozavik i klanovik. Raskazvajem, dzie i pačym ich pradajuć lashasy
Najtańniejšy biarozavy sok — u Homieli i Hrodnie. Najdaražejšy — u Minsku i na Viciebščynie. Niatanny jon i na Brestčynie. Biudžetnuju canu abiacajuć vystavić za biarozavik na Mahiloŭščynie.
Najdaražejšy biarozavik — u Minsku
Na zachadzie i poŭdni lashasy ŭžo pačali źbirać biarozavik. Jak kažuć leśniki, intensiŭnaść sokavydzialeńnia zaležyć ad nadvorja. Plusavaja tempieratura spryjaje bolšamu pradukavańniu biarozami ŭlublonaha dla biełarusaŭ napoju. Minusavaja ž zapavolvaje praces ci naohuł jaho spyniaje.
«Ciapier dzionnaja i načnaja tempieratury trymajucca vyšej za nul, to sok idzie. Ale, pavodle prahnozaŭ, na nastupnym tydni čakajecca minus 9, tamu, zrazumieła, jon spynicca. U nas usio padrychtavana dla prodažu, ale my čakajem dobrych umovaŭ nadvorja», — paviedamili ŭ adnym ź laśnictvaŭ Hrodzienščyny.
Pradavać pieršy biarozavik stali i na Minščynie.
U stalicy jaho možna prydbać na vulicy Bahracijona, 70.
Tut za litr paprosiać 49 kapiejek, kali čałaviek sa svajoj taraj. Kali jaje niama, to prapanujuć 5-litrovuju butelku za 4 rubli 61 kapiejku.
U samim laśnictvie litr soku abydziecca tańniej — u 37 kapiejek. Za hetuju ž canu pradaduć biarozavik i ŭ inšych rajonnych laśnictvach Minskaj vobłaści.
Staličny lashas pačaŭ pradavać i klanovy sok. Piać litraŭ klanovika ŭ PET-butelcy kaštuje 7 rubloŭ 14 kapiejek. Pradajuć taki sok u Minsku na vulicy Bahracijona, 70.
Hrodna: tańniej i bolš miescaŭ prodažu
U hrodzienskim lashasie zapeŭnivajuć: ceny na biarozavik zastajucca na ŭzroŭni minułaha hoda.
U kantory lashasa, jakaja mieścicca ŭ vioscy Bahušoŭka, cana litra biarozavaha soku — 23 kapiejki.
U abłasnym centry pryvazny z rajonaŭ biarozavik daražejšy — 25 kapiejek.
Pradajuć jaho na vulicy Fiestyvalnaj, 16a — heta administracyjny budynak haradzienskaha lashasa. Akramia taho, prydbać sok možna i na Paŭdniovym rynku (Indurskaja šaša, 30).
Pryčym lashas moža nalivać sok jak u taru kupca, tak i ŭ svaje dziesiacilitrovyja słoiki, za jakija treba dapłacić.
Brestčyna: čamu biarozavik daražejšy, čym u Hrodnie
Na Brestčynie prodaž biarozaviku startavaŭ 21 sakavika.
U abłasnym centry jaho možna prydbać na handlovaj placoŭcy lashasa — vulica Kobrynskaja, 53. Jaho cana vyšejšaja, čym u Hrodnie — 36 kapiejek za litr.
Biarozavik pradajuć i ŭ rajonnych laśnictvach prosta na miescy jaho źbirańnia. U takim vypadku jaho košt — 19,5 kapiejki za litr.
U Breście raźbiežku ŭ cenach z Hrodnam tłumačać dadatkovymi vydatkami, źviazanymi z narychtoŭkaj i prodažam soku.
U canie ŭličanyja zarobki pradaŭcoŭ dy apłata pasłuh naniatych lashasam dla źbirańnia soku rabotnikaŭ. U lashasie kažuć, što leśniki mohuć źbirać biarozavik tolki tady, kali ź imi lashas zaklučyŭ adpaviednuju damovu.
Akramia taho, da cany biarozaviku dadajucca raschody na dezynfiekcyju bočak, ź jakich jaho pradajuć. Da taho ž, u adroźnieńnie ad Hrodzienščyny, Bresckaja vobłaść vyciahnutaja, biareźniki ž raźmieščanyja dalej ad abłasnoha centra, što pavialičvaje transpartnyja raschody.
Na Homielščynie biarozavik najtańniejšy
U rehijonie płanujuć sabrać za siezon 1200 ton biarozaviku. Za pieršyja try dni miascovy lashas pradaŭ 20 ton soku nasielnictvu.
Prydbać jaho možna ŭ rajonnych laśnictvach. Vyhadniej budzie na dzialancy — za litr 17 kapiejek. U lashasie, jaki ŭ horadzie, užo 25 kapiejek za litr.
Na Mahiloŭščynie i Viciebščynie siezon nie pačaŭsia
Letaś mahiloŭskija laśnictvy pačali zdabyvać sok na pačatku krasavika.
«Biarozavik u čakańni. Pakul niama nadvorja dla jaho. Načnyja tempieratury byvajuć minusavyja», — davodziać leśniki.
U mahiloŭskim lashasie zapeŭnivajuć, što pradavać sok buduć pa cenach minułaha hoda. Letaś siaredniaja cana biarozaviku z dzialanki była 20 kapiejek za litr, a sa składa lashasa — 26 kapiejek.
U Krasnapolskim rajonie zabaroniena źbirać sok z-za radyjacyjnaha zabrudžańnia.
U Viciebskaj vobłaści biarozavy sok taksama čakaje ciepłyni. Kali budzie adkryty siezon, leśniki dakładna skazać nie mohuć i prosiać udakładnić paśla 1 krasavika.
U laśnictvach biarozavik źbirajucca pradavać za 37 kapiejek za litr. U Viciebsku — za 42 kapiejki za litr, kali ŭ kupca budzie svaja tara. Kali jaje niama, to za 5-litrovuju butelku treba dapłacić 3,5 rubla.
Sioleta płany pa biarozaviku ściplejšyja
Letaś lashasy sabrali bolš za 12 tysiač ton biarozaviku. Čverć pradali spažyŭcam, astatniaje realizavali na pierapracoŭčyja pradpryjemstvy.
Sioleta havorka idzie pra bolš ścipłyja abjomy. Płanujuć nabrać biarozaviku tolki 4 tysiačy ton.
U lashasach nahadvajuć, što samavolnaja narychtoŭka biarozaviku zakanadaŭča zabaronienaja.
«Ciapier takija štrafy, što vyhadniej kupić, čym ryzykavać», — adznačyŭ adzin ź leśnikoŭ.
Štraf dla fizičnaj asoby da 740 rubloŭ (da 20 bazavych vieličyń), dla pradprymalnika — da 3700 rubloŭ (da 100 bazavych vieličyń), a dla jurydyčnaj asoby — da 18 500 (da 500 bazavych vieličyń).
Parušalnikaŭ buduć vykryvać supracoŭniki pryrodaachoŭnych struktur śpiecyjalnymi rejdami.
Tym, chto choča sam nabrać biarozaviku, varta źviarnucca ŭ laśnictvy. Tam pakažuć śpiecyjalna adviedzienyja dzialanki, praviaduć instruktaž, jak pravilna źbirać sok, i prakantralujuć technałohiju padsočvańnia.
«Naša Niva» — bastyjon biełaruščyny
PADTRYMAĆKitajskaja kampanija źbirajecca rabić kaśmietyku ź biełaruskaha biarozavika
«Žujka z kamiennaha vieku»: navukoŭcy atrymali DNK žančyny, jakaja žyła 6000 hadoŭ tamu
Kola Łukašenka ŭ akružeńni dziasiatka pryhažuń pieradaŭ uradžaj domu-internatu dla vieteranaŭ
Sudziać hiendyrektara BiełAZa. Pahražaje da 15 hadoŭ9
Kamientary