Čamu rasijskaja avijacyja tak słaba prajaviła siabie va Ukrainie: piać pamyłak Pucina

Pieršaja pamyłka: niedaacenka roli bieśpiłotnych latalnych aparataŭ (BPŁA). Na momant pačatku vajny ŭ Rasii była niekatoraja kolkaść takich sistem, jak «Arłan», «Aryjon» i «Łancet», ale rasijskaja armija nie zadziejničała ich u pieršyja dni ŭvarvańnia. Niešta zadziejničali krychu paźniej, niešta padciahnuli amal praz hod, a niešta dyk i ŭvohule nie zmahli naležnym čynam realizavać, piša izrailskaje internet-vydańnie «Kalkulist».

Ale było ŭžo pozna, siły abarony Ukrainy zmahli mabilizavacca i dać boj. Efiekt ad BPŁA byŭ by, kali b ich masava vykarystoŭvali ŭ pieršyja dni. Z druhoha boku, rasijanie i blizka nie čakali, što ŭkraincy akažucca vialikimi majstrami ŭ BPŁA i ich vykarystańni. Heta byŭ najvialikšy pralik.

Vysnova: lubaja padrychtoŭka da vajny ŭ XXI stahodździ pavinna pačynacca nie z tankaŭ ci samalotaŭ, a z pytańniaŭ BPŁA.

Druhaja pamyłka: rasijanie nie ŭmiejuć rabić toje, što pa-anhlijsku nazyvajecca BDA (Bomb Damage Assessment), — acenka bajavych paškodžańniaŭ, acenka efiektyŭnaści ŭžyvańnia bombaŭ ci rakiet. Treba razumieć, što BDA — častka šyrejšaj dyscypliny bajavych acenak, ale navat u takoj bazavaj temie, jak acenka dakładnaści papadańnia rakiet, u rasijan usio maksimalna słaba. Uzbrojenyja siły RF nie vałodajuć BDA. Niama ni dyscyplin, ni praktyk, ni resursaŭ na heta.

Vysnova: poŭnaje niaviedańnie realnych sił Ukrainy, što źniščajecca, a što nie. Usio heta pryvodzić da chłuślivaj infarmacyi, na asnovie jakoj paśla Uzbrojenyja siły Rasii budujuć svaje vajennyja apieracyi, jakija ŭ svaju čarhu zakančvajucca pravałam.

Treciaja pamyłka: idyjocki padychod rasijan da palavańnia na ŭkrainskija zienitna-rakietnyja kompleksy (ZRK). 

Dośvied pakazvaje, što źniščeńnie supraćpavietranaj abarony (SPA) — pieršasnaja i najvažniejšaja meta ŭ sučasnaj vajnie, i na heta pavinny być kinutyja ŭsie namahańni. Vyjaŭleńnie SPA — zadača składanaja, kompleksnaja i šmatuzroŭnievaja. Jak vyjaviłasia, rasijanie ŭvohule nie vučylisia takim mietadam i prosta nie viedajuć, jak vyjaŭlać sistemy ZRK i dušyć ich.

Vysnova: 90% strat Pavietrana-kaśmičnych sił (PKS) RF składajuć straty ad udaraŭ ZRK i pieranosnych ZRK. Heta pryviało da paraliču i bieskarysnaści vialikaha parku bajavoj avijacyi Rasii. Sotni sučasnych samalotaŭ PKS RF mahli b adyhrać istotnuju, a mahčyma, što i pierałomnuju rolu ŭ hetaj vajnie, kali b rasijanie ŭmieli vyjaŭlać i źniščać SPA voraha.

Čaćviortaja pamyłka: rasijanie nie ŭmiejuć vieści ahulnavajskovy boj i nie razumiejuć, što takoje paśladoŭnaść bajavych zadač. PKS RF žyvuć svaim žyćciom, nie zabiaśpiečvajuć padtrymku suchaputnym čaściam, nie źniščajuć klučavych celaŭ, vykonvajuć razroźnienyja i nieskaardynavanyja zadańni i pracujuć pavolna, nie ŭmiejučy chutka reahavać na situacyju na poli boju.

Vysnova: Ukraina pravodzić paśpiachovyja naziemnyja i marskija apieracyi, a ŭ rasijan jość dobryja bajavyja samaloty, ale niaŭmieńnie i niaviedańnie, jak pracavać skaardynavana ŭ ramkach ahulnavajskovaha boju, nivieluje ŭsie technałahičnyja i kolkasnyja pieravahi PKS RF.

Piataja i samaja hałoŭnaja pamyłka: Rasija žyvie ŭ kultury chłuśni, jakaja kultyvujecca i kvitnieje. Nichto nie choča pracavać, vykonvać svoj abaviazak ci prytrymlivacca pratakołaŭ, usio robicca capu-łapu i tolki dla spravazdačnaści, kab vyšejstajačyja kiraŭniki byli zadavolenyja. Panuje ahulnaja kultura imitacyi, a nie realnaj pracy. Heta pryvodzić da tatalnaj nieefiektyŭnaści ŭsiaho — ad kiravańnia da banalnaj kiepskaj pracy pryboraŭ.

Vysnova: heta hałoŭny pravał. Kultura chłuśni robić nieefiektyŭnaj rasijskuju dziaržavu i hramadstva naohuł, ale PKS RF, jak struktura składanaja i vielmi patrabavalnaja, najbolš ad hetaha pakutuje.

Hałoŭnaja vysnova: mahčyma, hetaja vajna ŭvohule nie pačałasia b, kali b rasijski ŭrad razumieŭ, što ŭkraincy — asobny narod, jany nie buduć sustrakać rasijskuju armiju jak vyzvalicielaŭ, jakija pryjšli vybavić ich ad zachodniaha ŭpłyvu. Tatalnaja biezhruntoŭnaść PKS RF i ich niazdolnaść paŭpłyvać na hetuju vajnu pryviali situacyju da taho stanu, u jakim US RF znachodziacca siońnia, a mienavita da zaciažnoj miasarubki na źniasileńnie.

• 123
• 0
• 9
• 1
• 3
• 4
• 8
• 0