U Vilni vystupiŭ skandalny rasijski repier. Pierad kancertam prajšła akcyja pratestu, nie abyšłosia biez bojki i zatrymańniaŭ
Praz hramadskaje abureńnie adna zała admoviłasia davać placoŭku Marhienšternu, jaki raniej vykazvaŭ svajo zachapleńnie Pucinym i jakoha ŭ Rasii ciapier ličać inaahientam. Ale kancert usio ž adbyŭsia.
3 sakavika ŭ vilenskaj Pramogu Arena adbyŭsia kancert rasijskaha repiera Marhienšterna. Jon uklučany ŭ śpis niepažadanych asob va Ukrainie, a raniej uschvalaŭ Uładzimira Pucina ŭ šmatlikich intervju.
Spačatku mierapryjemstva pavinna było prajści ŭ inšaj zale, ale pad ciskam hramadskaści jaho pieranieśli. Raniej kiraŭnictva Compensa Arena zajaŭlała, što rasijanin «publična vystupaje suprać vajny i publična vyśmiejvaje prarasijskija pieśni, a taksama stanoŭča ŭsprymajecca ŭkrainskimi ŚMI».
Taksama arhanizatary apraŭdvalisia tym, što Marhienštern za svaju pazicyju nakont vajny byŭ uniesieny ŭ «rejestr zamiežnych ahientaŭ» u Rasii i aficyjna pryznany voraham dziaržavy.
U vyniku kancert usio ž adbyŭsia, ale na inšaj arenie, a pierad jaho pačatkam prajšli akcyi pratestu. Jak piša «Novaja hazieta. Jeŭropa», kala areny byli sutyčki: ludzi łajalisia, pakazvali nieprystojnyja žesty, taksama demanstravali zabaronieny ŭ Litvie simvał rasijskaj ahresii — litaru Z.
U palicyi paśla paviedamili, što 19-hadovy maładzion pabiŭ dvuch žančyn. Jaho zatrymali, a infarmacyja pra vykarystańnie zabaronienych simvałaŭ praviarajecca.
Na skandał adreahavaŭ ministr kultury Litvy Simonas Kajrys. Jon zajaviŭ, što adkaznaść za vystupleńnie rasijskaha artysta ŭ Vilni lažyć na arhanizatarach mierapryjemstva, jakimi źjaŭlajucca «pryvatnyja asoby». Jon dadaŭ, što nie bačyć mahčymaści ŭklučyć Marhienšterna ŭ śpis niepažadanych u Litvie asob.
Były viadučy «Zony Ch» Łukša: Z telefona supracoŭnika BT Markavu adpravili sms «idzi nach**» — a paviesili na mianie2
Kamientary
Niam-niam, takoj miłašiečka, am!