Prezidentka Hruzii zapatrabavała ad urada pastrožyć umovy znachodžańnia rasijan u krainie i vyznačycca pa Ukrainie

«Nam nieabchodna raspracavać narmatyŭnyja akty — u pracoŭnym zakanadaŭstvie, pry rehistracyi biznesu, nabyćci ŭłasnaści (rasijanami) abo adkryćci ruskamoŭnych škoł», — zajaviła prezidentka Hruzii.

Jana adznačyła, što raniej užo prasiła ŭrad źviarnuć uvahu na prytok rasijan u Hruziju, kab «hramadstva adčuvała, što jaho nacyjanalnyja intaresy i biaśpieka ŭličvajucca i abaraniajucca».

Sałamie Zurabišvili ŭ svajoj zajavie taksama raskrytykavała ŭrad za niavyznačanuju pazicyju pa Ukrainie.

«U toj čas, kali ŭsie našy krainy-partniory słovam ci spravaj vykazvajuć maksimalnuju salidarnaść z samaaddanaj baraćboj Ukrainy, na maju dumku i na dumku bolšaj častki hruzinskaha hramadstva, pazicyja ŭrada i kiraŭničaj partyi, miakka kažučy, niezrazumiełaja», — zajaviła jana.

Avijaznosiny pamiž Rasijaj i Hruzijaj spynilisia ź leta 2019 hoda pa inicyjatyvie rasijskaha boku. 18 studzienia kiraŭnik MZS Rasii Siarhiej Łaŭroŭ zajaviŭ, što spadziajecca na toje, što avijaznosiny chutka adnoviać. Lidar kiroŭnaj u Hruzii partyi «Hruzinskaja mara — Demakratyčnaja Hruzija» Iraklij Kabachidze vitaŭ hetyja słovy Łaŭrova, za što jaho asudzili ŭ MZS Ukrainy.

Hruzija razam z Armienijaj, Turcyjaj i Kazachstanam stała adnym z kirunkaŭ, kudy paśla pačatku rasijskaha ŭvarvańnia va Ukrainu čaściej za ŭsio źjazdžali rasijanie. U listapadzie 2022 hoda Sałamie Zurabišvili paviedamiła, što za paŭtara miesiaca mabilizacyi, abvieščanaj u Rasii, u krainu pryjechali bolš za 700 tysiač rasijan, ź ich 100 tysiač zastalisia ŭ Hruzii. 

Prezident u Hruzii, choć aficyjna i ličycca kiraŭnikom dziaržavy, na samaj spravie pavodle palityčnaha ŭpłyvu sastupaje premjer-ministru. Funkcyi prezidenta ŭ asnoŭnym pradstaŭničyja i cyrymanijalnyja. Tak stała paśla praviedzienaj u 2012 hodzie kanstytucyjnaj reformy, z dapamohaj jakoj tahačasny prezident Michaił Saakašvili sprabavaŭ praciahnuć svaje ŭładnyja paŭnamoctvy, pierasieŭšy paśla adbytych dvuch prezidenckich terminaŭ u kresła premjera. Adnak paśla ŭniesienych źmienaŭ jamu nie ŭdałosia pieramahčy na parłamienckich vybarach, i ŭładu ŭ krainie atrymała «Hruzinskaja mara», jakaja nie sastupaje jaje dahetul.

Sałamie Zurabišvili, choć u 2018 hodzie i pieramahła na prezidenckich vybarach pry palityčnaj padtrymcy «Hruzinskaj mary», siabram hetaj partyi nie źjaŭlajecca i zajmaje krytyčnuju da ŭrada pazicyju pa mnohich pytańniach, u tym liku i źniešniaj palityki. Sama jana, darečy, pachodzić z hruzinskich emihrantaŭ, naradziłasia ŭ 1952 hodzie ŭ Francyi. Na histaryčnuju radzimu jana viarnułasia tolki ŭ nulavyja hady i zrabiła tut bliskučuju palityčnuju karjeru, jakaja mieła vielmi niezvyčajnyja kulbity. Tak, u 2004-2005 hodzie jana była ministram zamiežnych spraŭ Hruzii, a da hetaha — pasłom Francyi ŭ Hruzii. 

• 20
• 2
• 1
• 0
• 1
• 2