Doktar Jaŭhien Kamaroŭski na svaim jutub-kanale raspavioŭ, jak vyžyć u siezon vostrych reśpiratornych virusnych infiekcyj. Dakazanych sposabaŭ umacavać imunitet na samaj spravie nie vielmi šmat, kaža jon. I nazyvaje tyja, jakija sapraŭdy pracujuć.
Doktar Kamaroŭski kaža, što ŭ siezon VRVI važna źnizić vierahodnaść zachvareć, a ŭžo kali zachvareli, to pamienšyć ciažkaść praciakańnia VRVI.
«Kali vam prychodzić u hałavu dumka pra ŭmacavańnie imunitetu, to vy pavinny viedać, što dziejańniaŭ z dakazanaj efiektyŭnaściu, jakija realna prafiłaktujuć VRVI i ŭmacoŭvajuć imunnuju sistemu, vielmi-vielmi mała. Heta značyć, možna kolki zaŭhodna słuchać rekłamu, naprykład, picie vitamin S, askarbinka — heta vyratavańnie, ale
realnych navukovych prac, dzie było b dakazana, što ŭžyvańnie vitaminu S u takoj i takoj dozie pamianšaje imaviernaść zachvorvańnia, niama», — kaža jon.
Kamaroŭski nazyvaje dziejańni i elemienty ładu žyćcia, u dačynieńni da jakich efiektyŭnaść prafiłaktyki, pavodle jaho, adnaznačnaja.
Fizičnyja nahruzki
«Adnaznačna dakazana, što kali jość dźvie papulacyi ludziej, jakija žyvuć u adnolkavych umovach — hetyja 50 studentaŭ chodziać u spartzału, a hetyja 50 nie chodziać, a va ŭsim astatnim usio adnolkava, to tyja, što chodziać u spartzału, pryčym nie prafiesijanalna sportam zajmajucca, a prosta majuć dazavanyja štodzionnyja fizičnyja nahruzki — hetyja ludzi chvarejuć VRVI na 30—40 adsotkaŭ radziej».
Kamaroŭski źviartaje ŭvahu, što lubyja fizičnyja nahruzki aktyvizujuć pracu serca, sasudaŭ, palapšajuć krovazvarot ślizistych abałonak, što važna dla pravilnaj pracy miascovaha imunitetu. «Lubyja fizičnyja nahruzki pracujuć, i heta aktualna ŭ lubym uzroście».
Minimalnaja intensiŭnaja fizičnaja nahruzka dla darosłaha čałavieka — 20 chvilin u dzień.
«20 chvilin u dzień, kali kałocicca serca, kali vy realna ruchajeciesia — heta ŭžo sposab acaleć u siezon VRVI».
Son
«Vosiem hadzin (minimum — šeść) mocnaha snu — najvažniejšaja ŭmova».
Spać aptymalna pry tempieratury kala 18 hradusaŭ i ź vilhotnaściu pavietra ad 40 da 60 pracentaŭ. Kali pobač niechta chrapie, padumajcie pra bierušy. «Važna jašče dniom zadumacca nad tym, jak vy praviedziacie noč, jakija ŭmovy buduć u spalni».
Stres
Stresy byvajuć kiravanyja nami i niekiravanyja. Kamaroŭski kaža, što ŭbačyć svaimi vačyma, naprykład, pažar — heta toje, na što my nie možam paŭpłyvać. Ale my možam paŭpłyvać na toj stres, jaki my adčuvajem, atrymlivajučy infarmacyju. Adklučeńnie abo dazavańnie kiravanych krynic stresu — najvažniejšaje prafiłaktyčnaje dziejańnie.
«Kali chtości paviedamlaje vam tolki niehatyŭnuju infarmacyju, hetuju krynicu nie treba słuchać i hladzieć. Kali vas papiaredžvajuć pra pahrozu i nie nazyvajuć sposaby, jak treba dziejničać pry hetaj pahrozie, to heta stres dziela stresu.
Stres, jaki nie niasie ŭ sabie nijakaha pazityvu, jaki nie daje vam šancu vyžyć».
Heta tyčyć nie tolki ŚMI abo mesendžaraŭ.
Heta moža być susiedka, tavaryš pa pracy, sustreča ź jakim zakančvajecca tym, što ŭ vas psujecca nastroj, kałocicca serca i žyć nie chočacca. «Vykreślivajcie takich ludziej», — raić doktar.
Charčavańnie
Pravilnaje charčavańnie — heta toje, što «pryncypova pavialičvaje našy šancy acaleć u siezon VRVI».
Heta charčavańnie, dzie šmat harodniny, sadaviny, charčavańnie, kali my jamo «pa apietycie», dzie minimum kansiervaŭ, abmiežavanaja kolkaść soli, šmat zielaniny, jość śviežaja ryba i hetak dalej.
«Ałkahol u luboj kolkaści i ŭ lubym vyhladzie nie adnosicca da elemientaŭ charčavańnia, što stanoŭča ŭpłyvajuć na vašu budučyniu», — papiaredžvaje doktar.
Toje ž datyčycca i kureńnia. «Tytuniovy dym u lubym vyhladzie zjaŭlajecca ci nie asnoŭnym faktaram z bytavych, što niehatyŭna ŭpłyvajuć na stan miascovaha imunitetu, a značyć pavieličeńnia vašych šancaŭ zachvareć».
Što jašče
Nie zabyvajcie, što dla pracy sistemy miascovaha imunitetu patrebna čystaje chaładnavataje vilhotnaje pavietra, intensiŭny abmien pavietra, nie zabyvajciesia pra maski i myć ruki.
Nie leźcie ŭ natoŭp ludziej. Pa mahčymaści siadzicie doma.
Zrabicie pryščepku ad hrypu.
«Telefanujcie dzieciam, prasicie viarnucca ŭ Biełaruś». Biełarusy na miažy sutyknulisia z novaj pravierkaj26
Kamientary