Adzinaja dačka futbalista Bialkieviča amal ničoha nie pamiataje pra baćku. Naradziłasia ŭ Kijevie, a ciapier u Rasii rviecca na TB
Raman adnaho z najlepšych futbalistaŭ u historyi Biełarusi Valancina Bialkieviča i ŭdzielnicy hurta «VIA Hra» Hanny Siedakovaj skončyŭsia viasiellem u červieni 2004 hoda — śpiavačka na toj momant była ŭžo ciažarnaja. U śniežni taho samaha hoda jana naradziła dačku Alinu. Heta adzinaje dzicia, jakoje było ŭ viadomaha spartsmiena. «Trybuna» daviedałasia, čym siońnia žyvie dačka Bialkieviča, jakoj chutka spoŭnicca 20.
Nie zachavała ŭspaminaŭ pra baćku
Šlub Bialkieviča ź Siedakovaj raspaŭsia ŭ 2007-m. Było pryniata rašeńnie, što dačka zastaniecca žyć z mamaj. Praz hod Siedakova raskazała pra toje, jak važna, kab u jaje dački byŭ baćka.
«Razvažyła, što maje ambicyi, kryŭdy i pieražyvańni nie majuć značeńnia. Važnyja tolki adnosiny pamiž Valikam i dačkoj. Zaŭsiody kažu jamu, što jon moža bačyć Alinu ŭ luby čas. Sama časam jamu telefanuju: «Jana pa tabie sumuje», — kazała śpiavačka.
Paśla razvodu futbalist daŭ Siedakovaj dazvoł na vyvaz dački za miažu terminam na adzin hod. Śpiavačka tady źbirałasia pierajazdžać u ZŠA razam z novym mužam — pradprymalnikam Maksimam Čarniaŭskim.
«Pierad ich adjezdam u Amieryku Bialkievič zabraŭ Alinu da siabie ŭ Kijeŭ, nadaryŭ joj vielizarnyja pakiety z cackami i adzieńniem. Było vidać, što dzicia jon lubiŭ», — raskazvała babula Čarniaŭskaha.
Kab zabrać dačku z saboj, Siedakova paprasiła novy dazvoł na vyvaz dziciaci, ale ŭžo na try hady — Bialkievič pahadziŭsia. U 2012-m śpiavačka paviezła 7-hadovaje dzicia za akijan i, jak śćviardžała potym taja ž babula Čarniaŭskaha, abarvała stasunki ź biełarusam.
Toj nibyta niekalki razoŭ telefanavaŭ Alinie, paśla čaho Siedakova pamianiała numar telefona. Bialkievič źviartaŭsia ŭ łos-andželeski sud, ale prajhraŭ spravu — da taho momantu nie skončyŭsia trochhadovy termin dazvołu na vyvaz dački za miažu. Da svajoj śmierci ŭ žniŭni 2014-ha futbalist bolš tak i nie pabačyŭ Alinu.
U pačatku 2024-ha dačka eks-hulca zbornaj Biełarusi dała intervju, u jakim raskazała, što ź dzieviaci hadoŭ praz častyja hastroli maci žyła ź nianiaj, adnak kryŭdy za heta nie trymaje. A voś pra baćku ŭspaminaŭ praktyčna nie zachavała.
«Mama — heta adziny čałaviek, jaki zarablaŭ na siamju. Nikoli pobač nie było baćki, jaki dapamahaŭ by. Da čatyroch hadoŭ jon mnie niešta havaryŭ. Na samaj spravie niama ni adnaho adkładzienaha ŭspaminu z baćkam. Pamiataju, paśla ich razvodu jon telefanavaŭ mnie na dzień naradžeńnia, a potym pierastaŭ. I potym niejak nie fihuravaŭ bolš», — kanstatavała Bialkievič.
Maŭčyć pra vajnu na Radzimie
U intervju jutub-kanału «Žyćcio-malina» Alaksandr Chackievič raskazvaŭ, što Bialkievič kupiŭ i padaryŭ dačce kvateru ŭ Kijevie, tady jak sa svajoj druhoj žonkaj Alesiaj Bialkievič žyŭ u inšych apartamientach. Mienavita praz druhuju kijeŭskuju kvateru paśla śmierci Bialkieviča pačałasia sudovaja ciahanina ź Siedakovaj jak zakonnaj pradstaŭnicaj Aliny Bialkievič.
Pa vyniku ŭ 2018-m ukrainski sud staŭ na bok śpiavački. Chackievič kazaŭ, što nie viedaje, čym kankretna skončyłasia taja historyja, adnak nie fakt, što druhaja kvatera realna adyšła dačce.
«Siońnia Siedakova, dziakuj Bohu, nie ŭjaznaja va Ukrainu. Dumaju, što Alesia siońnia moža spać spakojna ŭ svajoj kvatery», — u tym ža intervju zaznačyŭ Chackievič.
Siedakova paśladoŭna ihnaruje poŭnamaštabnaje ŭvarvańnie ŭ rodnuju Ukrainu, jakoje pačałosia 24 lutaha 2022 hoda. Śpiavačka žyvie ŭ čaćviortym šlubie i aktyŭničaje ŭ rasijskim šou-biznesie, niahledziačy na ŭkrainski pašpart. U vieraśni 2022-ha Ukraina ŭviała sankcyi suprać Siedakovaj.
Nijak na vajnu i abstreły rodnaha Kijeva nie reahuje i Alina Bialkievič. Zrešty, try hady ŭ dziacinstvie jana pražyła ŭ Maskvie. U 2020-m chadziła na kursy dla pastupleńnia ŭ Maskoŭski dziaržaŭny instytut mižnarodnych adnosin na fakultet mižnarodnaha biznesu, ale pa vyniku viarnułasia ŭ ZŠA, dzie skončyła škołu. Paśla 12 hadoŭ vučoby Bialkievič (siońnia svabodna havoryć pa-rusku i pa-anhlijsku) u traŭni 2022-ha vypuściłasia z pryvatnaj padrychtoŭčaj škoły Nort-Brovard u Fłarydzie, dzie košt hoda navučańnia dasiahaje 50 tysiač dołaraŭ. Na vypuskny dački pryjšła Siedakova.
Tady ž paviedamlałasia, što dziaŭčyna budzie vučycca mižnarodnamu biznesu ŭ amierykanskim univiersitecie. Praŭda, niama nijakich paćviardžeńniaŭ, što hetyja płany realizavalisia.
Kruciła raman z rasijskim honščykam
Jak i baćka, Alina Bialkievič nie vielmi vystaŭlaje asabistaje žyćcio napakaz. Doŭhi čas u sacsietkach dziaŭčyny nie było i namioku na surjoznyja stasunki, pakul u lipieni 2022-ha jana nie vykłała videa, na jakim całujecca z maładym čałaviekam. «Z dniom naradžeńnia, majo kachańnie», — taki byŭ podpis da publikacyi.
Bojfrendam na toj momant 17-hadovaj Bialkievič akazaŭsia 22-hadovy rasijski honščyk Alaksandr Vartanian. Chłopiec žyvie ŭ Maskvie i źjaŭlaŭsia piłotam kamandy ŭ honkach na tryvałaść SMP Racing, jakaja finansujecca Barysam Rotenbierham — aliharch praz suviazi z rasijskim dyktataram Uładzimiram Pucinym znachodzicca pad mižnarodnymi sankcyjami.
Niekalki miesiacaŭ tamu dziaŭčyna paviedamiła, što ŭžo nie sustrakajecca z honščykam.
Žyvie na dva harady
Ciapier Alina Bialkievič žyvie na dva harady — Maskvu i Bostan, dzie prykładna paroŭnu pravodzić svoj čas. U sacsietkach źjaŭlajucca i zdymki z Majami, dzie žyvie Siedakova.
U sakaviku 2024-ha Alina Bialkievič u intervju rasijskamu padkastu nie zmahła kankretna adkazać na pytańnie, čym jana zajmajecca. Kaža, što bolš schilajecca da pracy błohierkaj, čamu sprabuje vučycca.
«Ja nie liču siabie vialikaj błohierkaj, tamu što vielmi časta źnikaju. U mianie źjaŭlajecca žadańnie vieści Instagram, potym jano źnikaje. Potym jano źjaŭlajecca», — raskazała Bialkievič.
Tematyka staronki ŭ Instagram c 38 tysiačami padpisčykaŭ — łajfstajł, to-bok dziaŭčyna prosta raskazvaje pra svajo štodzionnaje žyćcio. Nakont supracy abo rekłamy ŭ zapisie prapanujuć patelefanavać mieniedžaru na rasijski numar.
U profili Bialkievič nie pabačyš fatahrafij u darahich rečach abo ź luksavych miescaŭ. Heta jana tłumačyć vychavańniem maci, jakaja ź dziacinstva ŭtrymlivała dačku ŭ dastatku, ale nie pryvučała da raskošy. Kamfortniej Bialkievič žyviecca za akijanam, čym u Maskvie, dzie bolš źviartajuć uvahi na źniešni vyhlad.
Aktyŭna zdymajecca ŭ rasijskich šou
Alina Bialkievič davoli časta milhaje na rasijskim telebačańni. Upieršyniu jana tam źjaviłasia ŭ 2017-m, kali paŭdzielničała ŭ telešoŭ «Vakoł śvietu padčas dekreta» na kanale STS. Viadoŭcaj prajekta była Siedakova.
Sutnaść šoŭ palahała ŭ tym, što śpiavačka razam sa svaimi dziećmi pakazvała, dzie možna adpačyć ź siamjoj za miažoj. Padčas vandrovak jany sprabavali miascovyja stravy, šukali zabavy, chadzili ŭ hości da pradstaŭnikoŭ niezvyčajnych prafiesij. Usiaho vyjšła vosiem vypuskaŭ pa 24 chviliny, u jakich Siedakova ź dziećmi pabyvała ŭ Rymie, Barsiełonie, Miunchienie, Tel-Avivie, Tbilisi, a taksama na Pchukiecie, Krabi i Tenieryfie.
U 2023-m taksama razam z mamaj Bialkievič paŭdzielničała ŭ prajekcie na TB-3 «Apošni hieroj. Zastacca siamjoj». Arhanizatary zaprasili siem zorak, jakija ŭziali z saboj jak asobnych udzielnikaŭ šou pa adnym blizkamu svajaku — kahości ź dziaciej abo baćkoŭ. Zdymki prachodzili na trapičnym vostravie ŭ Tajłandzie i dla finalistaŭ doŭžylisia 30 dzion. 14 čałaviek padzialili na dźvie kamandy — «Tyhry» i «Słany». Pryčym apošnich ačoliła jakraz Siedakova, jakaja zaprasiła da siabie ŭ kampaniju dačku Alinu. Udzielniki žyli dzikunami i prachodzili roznyja vyprabavańni, paśla jakich pravodzili adsieŭ z kamandy, jakaja prajhrała.
Bialkievič pakinuła prajekt užo ŭ trecim vypusku ź dziesiaci. Na ahulnym schodzie dačku viadomaha paŭabaroncy vyrašyli prybrać paśla parazy «Słanoŭ» u tajskim futbole, jaki nie maje ničoha ahulnaha z kłasičnym futbołam. U im udzielnikam nieabchodna było zakidać miačy rukami ŭ košyk.
U vieraśni 2024-ha na TNT vyjšaŭ pieršy vypusk prajekta «Pieršyja na vioscy». Dzieviać udzielnikaŭ — u asnoŭnym heta maładyja błohiery — i tut vyžyvajuć, ale ŭžo na vioscy. Zdymačnaja placoŭka raźmiaščałasia ŭ hłuchoj vioscy ŭ Leninhradskaj vobłaści. Pry hetym arhanizatary abiacali, što prajekt budzie prachodzić u Dubai. Siarod usich udzielnikaŭ u Bialkievič najmienšaja kolkaść padpisčykaŭ u sacsietkach.
U pačatku pieršaha vypusku Alina Bialkievič pryznałasia, što jaje ŭdzieł — heta sproba dakazać usim, što jana samastojnaja asoba, a nie prosta dačka znakamitaj mamy.
Usich udzielnikaŭ padčas zdymak u žniŭni pazbavili hadžetaŭ i adpravili zajmacca chatnimi abaviazkami sielskich žycharoŭ. U kancy kožnaha vypusku błohiery ładziać schod i adkrytym hałasavańniem vyznačajuć u kalektyvie taho, chto vybyvaje. U piatym vypusku, apošnim na siońnia, Bialkievič zachodziła ŭ valjer z vaŭkom. Pakul jana zastajecca ŭ prajekcie.
Paralelna na kanale «Piatnica!» idzie druhi siezon muzyčnaha šoŭ «Sakretny artyst». U prajekcie na scenu vychodziać nie sami akciory i muzykanty, a ich nieviadomyja svajaki, jakich pavinny paznać inšyja ŭdzielniki. U piatym vypusku Bialkievič praśpiavała pieśniu hurta Serebro «Zbłytała». Paśla hetaha ŭ dziaŭčynie razhadali dačku Siedakovaj, znajšoŭšy padabienstva ŭ źniešnaści.
«U pieršy raz Alina śpiavaje na scenie, naohuł śpiavaje, ujaŭlajecie? I voś tak! Jana pajšła na heta dziela mianie. Alina lepšaja, dabrejšaja, razumniejšaja, pryhažejšaja za mianie, i heta vielizarny honar i honar, što ŭ mianie takaja nievierahodnaja dačka. Najlepšaja na śviecie starejšaja siastra», — skazała paśla vystupu dački Siedakova.
«Telefanujcie dzieciam, prasicie viarnucca ŭ Biełaruś». Biełarusy na miažy sutyknulisia z novaj pravierkaj26
Kamientary