Zatrymanaha ŭ Lelčyckim rajonie «dyviersanta» buduć sudzić pa niečakanym artykule
U lutym 2024 hoda KDB zajaviŭ pra zatrymańnie ŭdzielnikaŭ «dyviersijna-raźviedvalnaj hrupy» ŭ Lelčyckim rajonie — dziela hetaha tady navat uvodzili režym kontrterarystyčnaj apieracyi. Dyviersantami nazvali traich: adnaho biełarusa i dvuch ukraincaŭ. Inšaziemcaŭ pačali sudzić pa «terarystyčnych» artykułach u kancy vieraśnia, adnak nie biełarusa. Praces nad im pačniecca 29 kastryčnika – i abvinavačańnie kardynalna adroźnivajecca ad taho, pra što pisali prapahandysty. Voś što vyjaviła «Lusterka».
U lutym siłaviki zatrymali biełarusa Vitala Ułasiuka i hramadzian Ukrainy Siarhieja i Paŭła Kabarčukoŭ (heta baćka i syn). Na toj momant u dačynieńni da ich byli zaviedzieny kryminalnyja spravy pa art. 13 i art. 289 (padrychtoŭka da akta teraryzmu) i art. 358-1 (ahienturnaja dziejnaść). Dziaržvydańnie «SB. Biełaruś siehodnia» padkreślivała, što kryminalnaja sprava tyčycca i «pamahataha» Ułasiuka.
Z 26 vieraśnia Homielski abłasny sud u zakrytym režymie pačaŭ razhladać spravu dyviersantaŭ. Praŭda, na łavie padsudnych akazalisia tolki Kabarčuki. Biez Ułasiuka.
Praces, jaki viadzie sudździa Jaŭhien Šaršnioŭ, praciahvajecca da hetaha času. Mužčyn abvinavačvajuć pa čatyroch artykułach Kryminalnaha kodeksa: č. 3 art. 289 (akt teraryzmu), č. 4 art. 295 (niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ), st. 358-1 (ahienturnaja dziejnaść), č. 3 art. 333-1 (niezakonnaje pieramiaščeńnie praź miažu atrutnych rečyvaŭ, ahniastrelnaj zbroi, bojeprypasaŭ, vybuchovych rečyvaŭ).
Ukraincam pahražaje pakarańnie až da śmiarotnaha pakarańnia. A što ž biełarus?
«Lusterka» vyjaviła, što 29 kastryčnika sudździa Leninskaha rajona Bresta Dźmitryj Kuroŭski pačnie razhladać kryminalnuju spravu pa č. 3 art. 228 (kantrabanda). I voś siarod abvinavačanych značycca Vital Dźmitryjevič Ułasiuk.
Pa dadzienych BELPOL, u Biełarusi jość usiaho adzin Vital Dźmitryjevič Ułasiuk. Jaho hod naradžeńnia i miesca žycharstva supadajuć ź infarmacyjaj, ahučanaj KDB adrazu paśla zatrymańnia «dyviersijnaj hrupy»: žychar Bresta 1970 hoda naradžeńnia.
Razam z Ułasiukom pa hetaj spravie prachodzić Darja Śviatličnaja i Rusłan Kocijeŭ. Raniej jany nie ŭzhadvalisia ŭ ŚMI.
Pavodle infarmacyi BELPOL, Ułasiuk i Śviatličnaja raniej pracavali ŭ adnoj kampanii — TAA «Styl Fešn Luks». Jana vyrablaje žanočaje adzieńnie ŭ Breście. Rusłan Kocijeŭ, chutčej za ŭsio, nie źjaŭlajecca hramadzianinam Biełarusi, pavodle źviestak BELPOL, u Biełarusi niama čałavieka z takimi ž danymi, jak u jaho.
Pa artykule za kantrabandu ŭsim traim pahražaje ad piaci da dziesiaci hadoŭ pazbaŭleńnia voli.
Raniej ŚMI raskazvali pra Vitala Ułasiuka na padstavie infarmacyi BELPOL i jahonych sacyjalnych sietak.
Mužčyna naradziŭsia ŭ 1970 hodzie ŭ Turkmienistanie. Žyvie i prapisany ŭ Breście. Ułasiuk — były vajskoviec, prachodziŭ słužbu ŭ vajskovaj čaści 65263 u Baranavičach, a taksama ŭ 38-j asobnaj hvardziejskaj desantna-šturmavoj bryhadzie.
U 2007 hodzie jon, vidać, užo syšoŭ z vajskovaj słužby i pracavaŭ u bresckaj aŭtaškole «Vialikaja miadźviedzica». Jašče adno viadomaje miesca pracy — «Redžyna Red», heta kampanija — vytvorca vierchniaha adzieńnia z Bresta.
Na svajoj staroncy ŭ «Adnakłaśnikach» Ułasiuk łajkaŭ pasty z padtrymkaj Rasii ŭ vajnie va Ukrainie. U 2015 hodzie jon pryniaŭ udzieł u maršy «Biaśśmiertnaha pałka» ŭ Bresckaj krepaści. Miarkujučy pa apublikavanych im fota, u žniŭni 2023 hoda były vajskoviec jeździŭ u rasijski Piacihorsk.
Praŭładny kanał: Čamu Pratasieviča ŭziali na pracu, a biełarusaŭ, jakija lehalna stavili podpisy za alternatyŭnych kandydataŭ, nie biaruć?9
Kamientary