Prapahanda chacieła pakazać «pakajalnaje» videa z «rejkavymi partyzanami». Ale niešta pajšło nie tak
Na BT vypuścili siužet ź fihurantami adnoj z apošnich spraŭ «rejkavych partyzanaŭ». Telebačańnie sprabavała pakazać, jak chłopcy škadujuć za svaje ŭčynki i kryŭdujuć na «kurataraŭ». Zamiest hetaha atrymalisia partrety mocnych ludziej, jakija prahladajucca navat skroź mantaž.
Pieršym havoryć Kanstancin Jermałovič, jakomu prysudzili 16 hadoŭ turmy. Mužčyna trymajecca ŭpeŭniena, navat viedajučy pra vialiki prysud i sproby prapahandystki Ksienii Lebiedzievaj vybić jaho z kalainy.
Lebiedzieva pytajecca ŭ jaho: «Dziela čaho vy heta rabili i za što hatovyja adsiedzieć 16 hadoŭ»? I chłopiec spakojna adkazvaje:
«Kali skazać maksimalna kampaktna, to heta było vyražeńnie našaha asabistaha pratestu, kab pakazać niazhodu z tym, što adbyvajecca. Nie dziela apazicyi abo niekaha jašče. Ja ich i nie viedaju bolšaść, mnie nie nastolki heta cikava».
U 2021 hodzie jany rabili na čyhuncy h.zv. zakładki, mulažy vybuchovych pryładaŭ, taksama sprabavali padpalić tabakierku i spalili cir. Jermałovič pryznaje, što heta možna nazvać teraryzmam. «Tak, toje, što my rabili, z punktu hledžańnia zakona, niezakonnyja rečy», — spakojna kaža jon.
Tut Lebiedzieva dadaje svaju remarku: «Viedajecie, čamu jon kaža «z punktu hledžańnia zakonu»? Bo z punktu hledžańnia marali jon dumaje, što jon maje racyju». Takimi advolnymi remarkami jana razbaŭlaje ŭvieś siužet.
Hrupa «rejkavych partyzanaŭ» trojčy rabiła raściažki na puciach. Vynikam musiła być zatrymka ruchu ciahnikoŭ. Kanstancin kaža, što dla ich heta była forma ekanamičnaha cisku na ŭłady.
Mužčyna raspaviadaje, što va ŭsich vypadkach u administrataraŭ hrupy «Busły laciać» taksama byŭ dostup da ŭnutranaj infarmacyi pra zdareńni na čyhuncy. I paśla kožnaj z akcyj z fejkavym miniravańniem jany vykładali spravazdačy pra zdareńni razam ź videa.
Dalej dajuć słova Vitalu Minkieviču, jakomu prysudzili 15 hadoŭ turmy (prapahandysty vyrašyli nie ŭdakładniać imia i ŭ videa padpisali jaho «Viktaram»). Jon raspaviadaje, što akcyi nie prachodzili idealna i zaŭsiody byli niedachopy, tamu jon chutčej niezadavoleny ichnim chodam.
Na pytańnie, čamu jany nie spynilisia, jon zaŭvažaje: «Ciažka spynicca, kali ty pačynaješ dziejničać, navat nie bačyš takoha šlachu, kab spynicca».
Dalej znoŭku raspaviadaje Jermałovič — pra akcyju z padpałam cira, jaki naležaŭ vajskovaj čaści 5527. Jon kaža, što jany ściahnuli koły, jakija lažali ŭ jakaści aharodžy, znajšli jašče niejkija doški, skłali ŭsio razam i padpalili. Adbyłosia heta z 23 na 24 vieraśnia 2021 hoda.
Akcyja była, na jaho dumku, nie zusim udałaj, bo nie ŭdałosia dobraje videa. Praŭda, miarkujučy pa fota ź siužeta prapahandystaŭ, cir zhareŭ.
Dalej chłopiec raspaviadaje pra akcyju sa sprobaj padpału «Tabakierki». Tady hrupa abliła bienzinam hlebu ŭzdoŭž kijoska i ŭstalavała pobač hadzińnikavy miechanizm, jaki musiŭ jaho padpalić. Praŭda, toj nie spracavaŭ.
Pa ŭsim vidać, što brali intervju taksama ŭ treciaha fihuranta spravy, Ihara Kazłova, jakomu prysudzili 14 hadoŭ turmy. Ale, mahčyma, jahonyja adkazy nie zadavolili prapahandystku i ich nie ŭklučyli ŭ siužet.
Z hetaj hrupaj sudzili taksama Natallu Polkinu, jakoj dali dva hady kałonii, i Natallu Kied, jakaja atrymała 2 hady «chatniaj chimii». Usich zatrymali jašče ŭvosień 2021 hoda, praz paru dzion paśla padpału cira. Žančyn abvinavacili ŭ tym, što jany ŭ sakaviku 2021 hoda razam z «rejkavymi partyzanami» spalili pudziła Łukašenki. Ich sudzili pa atrykule «abraza prezidenta».
«Naša Niva» — bastyjon biełaruščyny
PADTRYMAĆ
Kamientary