Biełaruski mini-futbolny kłub paklikaŭ na jubilej nibyta rasijan, a nasamreč — drenna zamaskavanych «deeneraŭcaŭ»
22 žniŭnia aršanski kłub «Viten», jaki vyjhraŭ dva z troch apošnich čempijanataŭ Biełarusi pa mini-futbole, apublikavaŭ afišu turniru ŭ honar 25-hodździa kłuba. Siarod udzielnikaŭ jość i adzin zamiežny hość, paznačany na afišy jak «Spartak (Danieck, Rastoŭskaja vobł., Rasija)». Ale na sajcie Tribuna.com praviali nievialikaje rasśledavańnie i pryjšli da vysnovy, što heta ŭsio tolki kiepski kamuflaž.
U rasijskaj Rastoŭskaj vobłaści sapraŭdy jość horad Danieck, ale nijakich mini-futbolnych kamandaŭ tam niama. Zatoje ŭ Rastoŭskaj vobłaści jość prosta futbolny kłub «Spartak-Danieck». Praŭda, jon 9 sakavika źniaŭsia z rozyhryšu rasijskaha D2 «u suviazi sa składanaj finansavaj situacyjaj, jakaja ŭźnikła ŭ kłuba».
Na aficyjnych resursach kłuba i Asacyjacyi mini-futboła Rasii (AMFR) nijakich źviestak pra adradžeńnie hetaj kamandy niama. Zatoje tydzień tamu ŭ adnym z rastoŭskich ŚMI źjaviłasia infarmacyja, što toj samy «Spartak-Danieck», jaki hulaŭ u D2, raptam pravioŭ tavaryski matč z byłymi kalehami pa dyvizijonie z «Rastova».
U sacsietkach «Rastova» kamanda-supiernik była paznačana prosta jak «Spartak-Danieck», bieź nijakich tłumačeńniaŭ. Ale adnačasova pra hety matč jak pra svoj paviedamiła i kamanda z vyraznym zaśviedčvańniem u profili: «Aficyjnaja staronka mini-futbolnaha kłuba «Spartak» (Danieck, DNR)».
Takim čynam, mienavita «deeneraŭski» «Spartak» z akupavanaha ŭkrainskaha Daniecka vyrazna dekłaruje ŭ sacsietkach, što budzie ŭdzielničać u turniry ŭ Oršy — i ŭžo navat vyjechaŭ u Biełaruś.
Pry hetym na afišy da spabornictva hety «Spartak» nazvaŭ siabie hetak ža, jak kolišni rasijski — «Spartak-Danieck». A jašče raniej sacsietki hetaha «Spartaka» nazyvali «našaj kamandaj» «Spartak-Danieck U-21», jaki hulaŭ u rasiejskim D3 i farmalna nie byŭ źviazany sa «Spartakom-Danieckam» z Rastoŭskaj vobłaści.
Pry hetym va ŭsich kamand adna i taja ž emblema — z vykarystańniem akantoŭki ŭ vyhladzie hieorhijeŭskaj stužki.
U vyniku ŭsio vyhladaje tak, što ŭ Biełarusi buduć hulać pradstaŭniki «DNR». A ich hałoŭny trenier Mikałaj Krykun — baćka ŭradženca Horłaŭki Danieckaj vobłaści, čempijona Biełarusi z «Vitenam» i paśla źmieny hramadzianstva hulca zbornaj Biełarusi Siarhieja Krykuna.
Zrešty, i biez taho, jak adznačaje aŭtar tekstu, usio adrazu namiakała, što rehistracyja kłuba «Spartak-Danieck» na terytoryi Rasiei — prosta fikcyja, nieabchodnaja dla taho, kab Rasiju za ŭdzieł kłuba ź niepryznanaj cyvilizavanym śvietam terytoryjaj u prafiesijnaj lizie nie pakarała UEFA. Prezidentam nibyta rasijskaha kłuba značyłasia Alena Syravatka — miarkujučy pa sacsietkach, žonka prezidenta «deeneraŭskaha» «Spartaka» Juryja Syravatki, jaki taksama zajmaje pasadu «ministra justycyi» «DNR».
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary