«Kraina isnuje, pakul jana niezaležnaja». Cichanoŭskaja pavinšavała biełarusaŭ z Dniom niezaležnaści 27 lipienia
32 hady tamu, 27 lipienia 1990 hoda, Viarchoŭny Saviet BSSR pryniaŭ Dekłaracyju «Ab dziaržaŭnym suvierenitecie Biełaruskaj Savieckaj Sacyjalistyčnaj Respubliki». 25 žniŭnia 1991 hoda hetaj Dekłaracyi byŭ prysvojeny status kanstytucyjnaha zakona i ad taho momantu možna adličvać sapraŭdnuju niezaležnaść Biełarusi. A 27 lipienia da 1996 hoda mieła status Dnia niezaležnaści, pakul Łukašenka nie pieranios jaho na 3 lipienia.
Cichanoŭskaja ŭ hety dzień źviarnułasia da biełarusaŭ z nastupnymi słovami:
«27 lipienia — heta dzień, jaki byŭ Dniom Niezaležnaści Biełarusi da pačatku režyma. U hety dzień u 1990 hodzie była pryniataja Dekłaracyja ab dziaržaŭnym suvierenitecie Biełaruskaj SSR.
Čamu hety dzień pierastaŭ być śviatam u Biełarusi? Bo na refierendumie 1996 hoda Łukašenka pieranios Dzień Niezaležnaści na 3 lipienia. Tak Biełaruś stała adzinaj postsavieckaj krainaj, dzie Dzień Niezaležnaści nijak nie źviazany ź niezaležnaściu ad SSSR.
Kaliści ja i sama nie viedała, čamu hety dzień taki važny. Nie bačyła adroźnieńniaŭ pamiž 27 lipienia i 3 lipienia. Dumała, što kali ja «nie lezu ŭ palityku», to i mianie jana nikoli nie zakranie. Ja pamylałasia.
A ŭ hety čas šmat chto ŭžo pracavaŭ dziela taho, kab Biełaruś mieła sapraŭdnuju niezaležnaść.
Kraina isnuje, pakul jana niezaležnaja. Jaje možna paraŭnać z darosłaj siamjoj, jakaja ŭstała na nohi, abzaviałasia svaim žyllom, navučyłasia kiravać svaim biudžetam i ŭžo nie choča ad kahości zaležać. Ale raptam takoj siamji prapanujuć viarnucca ŭ kamunałku i žyć razam z čužyncami. Niama takich siemjaŭ, jakija b pahadzilisia.
Patelefanujcie siońnia svaim siabram, baćkam, babulam i dziadulam. Raspaviadzicie im historyju hetaha dnia, kali jany jaje nie viedajuć. Sapraŭdnaja niezaležnaść trymajecca nie na palitykach i čynoŭnikach. Jana trymajecca na ludziach, jakija viedajuć, što my biełarusy — a nie niejki inšy narod. Jana trymajecca na ludziach, jakija hanaracca tym, što my biełarusy — hanaracca našymi prodkami, našymi pieramohami, našymi simvałami i našymi śviatami.
Ja ŭdziačnaja ŭsim, chto addaŭ svaje siły na dasiahnieńnie Biełaruśsiu suviereniteta — i na abaronu jaho realnaha sensu.
U hetyja ciažkija dni ja zaklikaju ŭsich biełarusaŭ pamiatać pra sapraŭdny Dzień Niezaležnaści. Ja zyču nam usim zastavacca biełarusami, u jakich abstavinach my b ni znachodzilisia. I tady Biełaruś nikoli nie źniknie, a budzie sapraŭdy niezaležnaj i raźvitaj krainaj».
Pamior dzied Koli Łukašenki — były viazień HUŁAHa, asudžany za dapamohu «banderaŭcam»9
Kamientary