«Vyvodzili z chaty ŭ naručnikach». Zatrymlivali i aštrafavali baćkoŭ śpiavački Marharyty Laŭčuk
Rankam byli zatrymanyja baćki viadomaj opiernaj śpiavački Marharyty Laŭčuk. Heta adbyłosia ŭ jaje rodnaj vioscy Stradzičy Bresckaha rajona. Pra heta «Radyjo Svaboda» paviedamiła sama Marharyta.
«Rankam pryjechaŭ busik, susiedku paklikali paniatoj, ad jaje i daviedałasia. Ničoha pry pieratrusie nie znajšli, ale baćkoŭ vyvodzili z chaty ŭ naručnikach», — skazała śpiavačka.
Chto zatrymlivaŭ Alenu i Alaksandra Leŭčukoŭ pakul nieviadoma.
Adnak paźniej vyjaśniłasia, što ich paśpieli asudzić za «niepadparadkavańnie milicyi»: jany atrymali štraf, jaki ekvivalentny $4000.
Siońnia taksama stała viadoma pra pieratrus u biełaruskaj kvatery Volhi i Andreja Pavukoŭ. Pavuk akampaniruje Laŭčuk padčas jaje vystupaŭ, jany razam składajuć kalektyŭ «Krasnaja zieleń», jaki śpiavaje vostruju palityčnuju satyru.
U lutym 2022 hoda stała viadoma, što Laŭčuk abviaścili ŭ vyšuk jak abvinavačanuju pa spravie pra «ździek ź dziaržaŭnych simvałaŭ». Taksama ŭ vyšuk trapiŭ jaje partnior pa duecie «Krasnaja zieleń», błohier Andrej Pavuk.
Sprava suprać Laŭčuk była zaviedzienaja ŭ červieni 2021 hoda za «abraźlivyja i bluźnierskija dziejańni ŭ dačynieńni da dziaržaŭnaj simvoliki». Havorka była pra adzin ź videarolikaŭ kalektyvu.
Usiaho ŭ Biełarusi pa palityčnych matyvach z 2020 hoda zatrymali bolš za 45 tysiač čałaviek, zaviedziena bolš za 10 tysiač kryminalnych spraŭ palityčnaha charaktaru.
32-hadovuju Marharytu Laŭčuk u 2020 hodzie zvolnili z Opiernaha teatra za jaje hramadskuju pazicyju. 39-hadovy Andrej Pavuk pryjšoŭ u błohierstva, žyvučy ŭ miastečku Akciabrski Homielskaj vobłaści.
Jak błohier, jon zdabyŭ papularnaść dziorzkimi telefanavańniami čynoŭnikam, siłavikam i sudździam, jakija byli ŭciahnutyja ŭ palityčnyja represii ci adznačylisia skandalnymi zajavami.
U 2020 hodzie Marharyta Laŭčuk zapisała razam z maci Alenaj narodnuju pieśniu.
Sudziać hiendyrektara BiełAZa. Pahražaje da 15 hadoŭ9
Kamientary