Za apošni čas raptoŭna i pry dziŭnych abstavinach pamierli minimum šeść rasijskich top-mieniedžaraŭ i miljanieraŭ. Voś chto heta byŭ
U apošnija miesiacy nie mienš za šeść bahatych ludziej Rasii byli znojdzienyja miortvymi, pryčym niekatoryja ź ich pamierli pry dziŭnych akaličnaściach razam z žonkami i dziećmi. Niekatoryja ź ich byli źviazanyja z bujnymi rasijskimi hazavymi kampanijami. Raspaviadajem pra padazronyja śmierci.
Siarhiej Pratasienia
19 krasavika 55-hadovaha miljaniera Siarhieja Pratasieniu znajšli paviešanym na arandavanaj elitnaj vile ŭ Ispanii. Pobač ź im lažali jaho žonka i 18-hadovaja dačka, jakija pamierli ad nažavych ranieńniaŭ, piša Business Insider.
Miascovaja palicyja ličyć, što Pratasienia moh spačatku sam zabić svaich rodnych, a potym paviesicca, ale ž jaho syn Fiodar abviarhaje hetuju teoryju. Jon ličyć, što jaho baćka «nikoli b nie zrabiŭ ničoha, kab naškodzić» jaho maci i siastry.
Pratasienia raniej pracavaŭ u kampanii «Novatek», što źjaŭlajecca adnym z najbujniejšych rasijskich vytvorcaŭ pryrodnaha hazu. Jaje pradstaŭniki taksama staviać pad sumnieŭ teoryju pra toje, što Pratasienia moh zabić svaju siamju.
Asabistaje bahaćcie Pratasieni naličvała bolš za 433 miljony dalaraŭ.
Uładzisłaŭ Avajeŭ
18 krasavika Avajeva znajšli miortvym u jaho maskoŭskaj kvatery razam z žonkaj i 13-hadovaj dačkoj. 51-hadovy miljanier byŭ byłym vice-prezidentam «Hazprambanka», daččynaj kampanii enierhahihanta «Hazpram».
Kvatera Avajevych była zamknutaja znutry. Ciapier śledčyja schilajucca da viersii, što Avajeŭ zastreliŭ svaju žonku i dačku, a potym skončyŭ žyćcio samahubstvam.
Vasil Mielnikaŭ
Pra śmierć hetaha mijalrdera stała viadoma 23 sakavika. Mielnikava znajšli ŭ jaho kvatery ŭ Nižnim Noŭharadzie: aliharch, jak, jaho žonka i dvoje synoŭ uzrostam 10 i 4 hadoŭ byli zarezanyja nažom. Na miescy byli znojdzienyja nažy, jakija, mahčyma, i źjaŭlalisia pryładami zabojstva.
Ciapier palicyja rasśleduje viersiju, što Mielnikaŭ spačatku zarezaŭ svaich rodnych, a potym zabiŭ sam siabie. Ukrainskaje miedyja «Hłavried» paviedamlaje i pra inšuju mahčymuju pryčynu trahiedyi: nibyta Mielnikava zabiŭ były partnior pa biznesie, ź jakim u taho byŭ kanflikt. Ale pry hetym jość źviestki, što ŭ kvatery Mielnikavych niama śladoŭ hvałtoŭnaha ŭvarvańnia.
Aliharch vałodaŭ kampanijaj pa pastaŭcy miedycynskaha abstalavańnia «Miedstom», jakaja, jak piša «Hłavried», paniesła značnyja straty praz zachodnija sankcyi.
Michaił Uotfard
Hetaha aliharcha ŭkrainskaha pachodžańnia znajšli paviešanym 28 lutaha ŭ haražy jaho doma ŭ anhlijskim hrafstvie Surej. Miascovaja palicyja śćviardžaje, što rasśledavańnie jaho śmierci jašče idzie, ale pakul što pravaachoŭniki nie znajšli ŭ hetaj historyi nijakich padazronych abstavin.
66-hadovy Uotfard naradziŭsia ŭ savieckaj Ukrainie, zarabiŭ bahaćcie na nafcie i hazie. Miljanier pierajechaŭ u Brytaniju na pačatku 2000-ch razam z žonkaj-estonkaj.
Alaksandr Ciulakoŭ
25 lutaha Ciulakova znajšli paviešanym u haražy jaho kvatery pad Sankt-Pieciarburham, kala cieła lažała pieradśmiarotnaja zapiska.
Jość źviestki, što niezadoŭha da śmierci aliharcha mocna źbili.
61-hadovy Ciulakoŭ byŭ adnym z top-mieniedžaraŭ «Hazprama», i kampanija taksama zajmajecca rasśledavańniem jaho śmierci.
Leanid Šulman
Jašče ŭ studzieni hetaha top-mieniedžara «Hazprama» znajšli miortvym u viaskovym katedžy ŭ Leninhradskaj vobłaści. Kala jaho cieła lažała zapiska, dzie było skazana, što Šulman nie choča być invalidam ci abuzaj dla svajoj siamji, jon taksama skardziŭsia na mocny bol u złamanaj niezadoŭha da taho nazie.
Ale, jak piša «Novaja hazieta», śledčyja sumniavajucca ŭ sapraŭdnaści zapiski. U dadatak, Šulman jaŭna moh dazvolić sabie kupić dobryja abiazbolvajučyja.
«Našu Nivu» finansujuć jaje čytačy — padtrymać prosta
Čytajcie taksama:
Viadomy rasijski aliharch raskazaŭ, jaki mietał u budučyni stanie «novym zołatam»
Kolki nasamreč ciahnucca pracoŭnyja pajezdki Łukašenki? Cikavyja ličby17
Kamientary