Pavodle padlikaŭ, Rasija za dva miesiacy z pačatku ŭvarvańnia va Ukrainu straciła ŭžo sotni tankaŭ. Vajskovyja ekśpierty tłumačać heta vykarystańniem sučasnych supraćtankavych sistem, jakimi Zachad zabiaśpiečvaje ŭkrainskuju armiju, a taksama niaŭmiełym vykarystańniem braniatechniki rasijskimi vajskoŭcami, piša Bi-bi-si.
Nakolki vialikija rasijskija straty ŭ tankach? Ukrainski bok śćviardžaje, što Rasija straciła ŭžo bolš za 680 tankaŭ. Vajenna-analityčny błoh Oryx, jaki viadzie ŭlik rasijskich strataŭ va Ukrainie na asnovie fatahrafij ź miesca padziej, ličyć, što z upeŭnienaściu možna kazać pra stratu bolš čym 460 tankaŭ i bolš čym 2 tys. broniemašyn. Pa źviestkach Rand Corporation Mižnarodnaha instytuta stratehičnych daśledavańniaŭ (IISS), na pačatak kanfliktu ŭ Rasii było ŭ ahulnym liku 2700 tankaŭ.
Nakolki efiektyŭnyja supraćtankavyja kompleksy?
U samym pačatku kanfliktu ZŠA pastavili Ukrainie 2 tys. procitankavych rakietnych kompleksaŭ (PTRK) «Džavielin» i z tych časoŭ dasłali tudy jašče 2 tys. hetych sistem.
Trajektoryju rakiety «Džavielin», jak śćviardžaje vytvorca, kampanija Lockheed Martin, možna zadać tak, kab bojehałoŭka vybuchnuła nad vierchniaj, najbolš uraźlivaj branioj tanka. Mnohija rasijskija tanki zabiaśpiečanyja sistemaj reaktyŭnaj dynamičnaj abarony, jakaja pry padryvie zaklikanaja pahłynać udar rakiet. Adnak «Džavielin» abstalavany adrazu dźviuma bojehałoŭkami. Adna padryvaje dynamičnuju abaronu, druhaja prabivaje ŭłasna tankavuju braniu.
Vialikabrytanija adpraviła Ukrainie nie mienš za 3600 procitankavych sistem novaha pakaleńnia NLAW, jakija taksama skanstrujavanyja tak, kab padryvacca nad adnosna słaba abaronienaj źvierchu tankavaj viežaj.
«Sistema «Džavielin» i NLAW — heta vielmi mahutnaja zbroja, — kaža ekśpiert Karaleŭskaha abjadnanaha instytuta abaronnych daśledavańniaŭ (RUSI) ź Vialikabrytanii Nik Rejnałds. — Biez hetaj zabojnaj siły situacyja va Ukrainie była b zusim inšaj».
Akramia taho, ZŠA pastaŭlajuć va Ukrainu 100 supraćtankavych bieśpiłotnikaŭ. Hetyja aparaty, nazvanyja «dronami-kamikadze», mohuć być zadziejničanyja za mnohija kiłamietry ad apieratara. Jany zavisajuć nad tankam i padajuć na jaho źvierchu, źniščajučy z dapamohaj ubudavanaj u ich bojehałoŭki.
U čym niedachopy rasijskaj vajennaj taktyki?
Siońnia rasijskaja armija addaje pieravahu dziejnaści na ŭzroŭni tak zvanych bataljonnych taktyčnych hrupaŭ (BTH), jakija źjaŭlajucca padraździaleńniami, što majuć usie siły i srodki dla samastojnaha vykanańnia pastaŭlenaj bajavoj zadačy, u składzie jakich jość tanki, artyleryja i piachota. Dakładny skład hetych padraździaleńniaŭ moža varjiravacca. Jany zabiaśpiečanyja tankami i broniemašynami, adnak u ich paraŭnalna mała strałkoŭ.
«Reč u tym, što Rasija adčuvaje niedachop sałdat, a BTH dazvalajuć stvaryć bajazdolnaje padraździaleńnie, jakoje vałodaje mocnym udaram», — kaža prafiesar stratehičnych daśledavańniaŭ Univiersiteta Sent-Endrus Filip O'Brajen. — Jany pryznačanyja dla chutkich atakujučych udaraŭ z užyvańniem vialikaj ahniavoj mocy. Adnak u ich słaboje piachotnaje supravadžeńnie, jakoje nie moža abaranić ich i advieści ŭdar u vypadku napadu na broniekałonu. Tak što rasijskaja armija ŭ hetym sensie nahadvaje baksiora, jaki vałodaje vydatnym pravym chukam i «šklanoj skivicaj».
Pa słovach prafiesara O'Brajena, adsutnaść u rasijskaj armii pavietranaj vyviedki pryviała da taho, što ŭkrainskija vojski lohka ładzili zasady na rasijskija tankavyja kałony.
«U pačatku kanfliktu Rasija nie zmahła damahčysia poŭnaj pieravahi ŭ pavietry, tamu jany nie mahli vieści pavietranuju vyviedku i adznačać pieramiaščeńni ŭkrainskich vojskaŭ, — kaža ekśpiert. — A heta značyć, što ŭkrainskija vojski mahli zajmać vyhadnyja ahniavyja pazicyi dla zasadaŭ i nanieści rasijskaj armii vialikuju škodu».
Ci dobra navučanyja rasijskija tankisty?
Pavodle źviestak Oryx, pałova strataŭ rasijskich tankaŭ prypadaje nie na padbityja abo paškodžanyja praciŭnikam, a na zachoplenyja ŭ pałon abo kinutyja mašyny. Ekśpierty śpisvajuć heta na promachi z zabieśpiačeńniem i niekampietentnaść rasijskich sałdat.
«My bačyli fota rasijskich tankaŭ, jakija buksirujuć traktarami ŭkrainskija fiermiery, — adznačaje prafiesar O'Brajen. — Niekatoryja z hetych tankaŭ byli kinutyja prosta tamu, što ŭ ich skončyłasia paliva. Heta prakoł z zabieśpiačeńniem. Inšyja zahruźli ŭ viasnovaj hrazi, tamu što kamandavańnie praličyłasia z terminami nastupleńnia».
«Rasijskija suchaputnyja častki kamplektujucca ŭ vialikaj stupieni z pryzyŭnikoŭ, a heta bajavaja siła nizkaj ci siaredniaj jakaści», — tłumačyć Nik Riejnałds.
«Mnohija tanki byli kinutyja z-za taho, što kiroŭcy nie spravilisia z kiravańniem. Niekatoryja źjechali z mastoŭ, inšyja patrapili ŭ kanavy, i ŭ ich źlacieli husienicy. Vojskam nie chapaje ŭmieńnia abychodzicca z technikaj. Ale časta sałdaty prosta kidajuć techniku i biahuć. Tak što žadańnie vajavać taksama adsutničaje».
Ukrainskija ŭłady vymušanyja byli navat vypuścić instrukcyi ab tym, jak hramadzianam varta zdavać pakinutuju vajskovuju techniku. Jany ŭdakładnili, što luby, chto znojdzie taki vajenny trafiej, nie abaviazany dekłaravać heta ŭ padatkovaj viedamaści.
Čytajcie taksama:
Ci pojduć tanki na śmietnik historyi? Mahčymaje nastupstva ŭkrainskaj vajny
Forbes: Ukrainskaja armija ciapier maje bolš tankaŭ, čym da vajny. Bo jana praciahvaje zachoplivać rasijskija
U ZŠA idzie padlik hałasoŭ. Tramp pakul lidziruje z vynikam 198 na 109
Kamientary