Minskaja dyzajnierka raskazała, jak jaje začaravaŭ, a paśla padmanuŭ były muž i tata dvajniat

Natalla padzialiłasia historyjaj u instahramie. Jana raskazała, što paśla pieršaha niaŭdałaha šlubu (ad jaho ŭ žančyny zastałosia dvoje dzietak), jaje mocna štarmiła: to chaciełasia chutčej znoŭ źbiehać u ZAHS, to zdavałasia, što surjoznyja adnosiny bolš nie patrebnyja.

I voś u taki momant pačalisia prablemy ŭ firmie taty Natalli:

— Daŭhi, kredyty, a ja na toj firmie była suzasnavalnikam. Farmalnym — mnohija baćki afarmlajuć tak, kab usio było ŭ siamji. Ja pačynaju ŭnikać u pracu budoŭli. Byŭ pieryjad, kali ja kiravała bietonnym zavodam. A chto, kali nie ja? Vielmi chaciełasia dapamahčy baćkam nie stracić biznes i vyleźci z daŭhoŭ.

Ale vyratavać zavod nie atrymałasia — jon staŭ bankrutam. Natalla śćviardžaje, što, niahledziačy na niaŭdaču, atrymała kałasalny vopyt. U toj ža čas muž siabroŭki zaprasiŭ Natallu kiravać jaho biznesam — vytvorčaściu tkaniny, a jašče adkryć kramu.

Pavialičyć

Jana adkryła nie tolki kramu, ale i atelje, u jakim šyła adzieńnie dla biełaruskich zorak. Raptam siabar-partnior vyrašyŭ spynić inviestycyi:

— Tady ja damoviłasia ź im, što jon u košt doŭhu daje mnie abstalavańnie. Atelje praciahnuła pracavać užo ŭ majoj ułasnaści.

Kaniec 2016 — pačatak 2017 hoda byli davoli składanymi dla Natalli. Jana chadziła ŭ sudy praz daŭhi baćkoŭskaj firmy, sprabavała vybić hrošy z byłoha partniora-pracadaŭcy (žančyna kaža, što tady jaho inšyja firmy ŭžo byli aryštavanyja, a joj jak byłoj dyrektarcy treba było vyrašyć pytańni ź niavypłačanymi zarobkami supracoŭnikaŭ). U dadatak da hetych składanaściaŭ, u žančyny nie atrymoŭvałasia zdać znoŭ kvateru, kab mieć stały prybytak, a taksama pradać haraž.

Źjavilisia prablemy sa starejšym synam, jaki pačaŭ kuryć. A były muž kryŭdziŭsia praz toje, što Natalla «nie tak» vychoŭvaje dzicia.

Ale ž źniešnie žančyna rabiła vyhlad, što ŭ jaje žyćci ŭsio cudoŭna: chadziła na śvieckija viečaryny i pościła ŭ sacyjalnych sietkach ščaślivyja fota.

I voś raptam u internecie źjaviŭsia virtualny prychilnik, jaki rabiŭ Natalli kamplimienty i maralna padtrymlivaŭ. Pra siabie mužčyna raspavioŭ, što fiermier, dasłaŭ videa, jak kormić koz, karoŭ dy śviniej.

Kavaler vioŭ siabie davoli rašuča i adnojčy naŭprost napisaŭ, što siońnia viadzie Natallu i jaje starejšaha syna na rep-kancert. A rankam pryjechaŭ z dvuma vialikimi bukietami kvietak i vučyŭ syna Natalli vinšavać maci z 8 Sakavika.

Padziei raźvivalisia chutka. Praź niekalki tydniaŭ džentlmien pryznaŭsia, što jamu vielmi padabajecca Natalla, jon choča być ź joj, hadavać jaje dziaciej, a jašče naradzić novych.

Pavialičyć

Natalla spačatku nie kupiłasia na ŭsio heta, bo nadta dziŭna ŭsio vyhladała. Ale pierapisku praciahnuła i pieryjadyčna skardziłasia na toje, jak joj składana ŭsio ciahnuć. Znoŭ mužčyna pavioŭ siabie jak rycar — paviedamiŭ, što dapamoža vyrašyć prablemy Natalli. I sapraŭdy znajšoŭ ahienta, jaki chutka pradaŭ haraž, dapamoh zdać u arendu nie tolki volnuju kvateru Natalli, ale jašče i lecišča — dziakujučy hetamu ŭ žančyny źjavilisia hrošy. Rycar pasiabravaŭ i z synam i dačkoj kachanaj.

Prapanova ruki i serca nie prymusiła siabie čakać. Mužčyna padaryŭ Natalli piarścionak, jaki, pa jaho słovach, zamoviŭ u juvielira.

— Skazaŭ: davaj rabić dziaciej. A ŭ mianie ž płan na žyćcio — 4 dziciaci (dva chłopčyki i dźvie dziaŭčynki). A mnie ŭžo 35! Nu čaho ja łamajusia? Dalej jon skazaŭ, što dapamoža zrabić ź mianie zorku jutuba. Znajšoŭ videohrafa, prydumaŭ temu kanała «Škoła mody Natalli Potkinaj».

Z baćkami Natalli mužčyna taksama pasiabravaŭ. Kali para pryjazdžała da mamy i taty, jon adrazu braŭsia za jakuju-niebudź tradycyjnuju mužčynskuju pracu. A jašče smačna hatavaŭ i karmiŭ usiu siamju šašłykami.

Byŭ adzin niuans: kachany čamuści nie znajomiŭ jaje sa svajoj siamjoj, choć rehularna pakazvaŭ zdymki nie tolki baćkoŭ, ale i brata ź siastroj, ich dziaciej. Taksama mužčyna demanstravaŭ foty svajho doma, ale ž nie prapanoŭvaŭ adpačyć tam letam. Pieryjadyčna jeździŭ na fiermu, viartaŭsia z prysmakami, a voś hrošaj pry hetym pryvoziŭ niašmat.

Tut Natalla daviedałasia, što ciažarnaja — i čakaje adrazu dvuch dzietak. Užo na 11 tydni pačalisia składanaści — žančyna trapiła ŭ balnicu, kab zachavać dvajniatak.

Hrošaj u siamji stanaviłasia ŭsio mienš i mienš. Natalla ździŭlałasia, što niama arendnaj płaty za kvateru i lecišča — kachany śćviardžaŭ, što tam u ludziej prablemy i treba prosta pačakać. Pry hetym jon zajmaŭsia i atelje Potkinaj. Spravy tam išli nie lepšym čynam: źbiraŭsia doŭh za arendu, na zarpłaty švačkam nie było finansaŭ i tyja prosta prychodzili na pracoŭnaje miesca, kab šyć ułasnyja zamovy.

Ale ž kali Natalla ŭ čarhovy raz trapiła ŭ balnicu, mužčyna źnianacku padaryŭ joj mašynu — BMW była starejšaja za ŭładalnicu.

— Ja ničoha nie razumieła — adkul hrošy? Kali ja prosta vyprošvaju na niejkija tabletki…

Napačatku 2018 hoda para raśpisałasia ŭ ZAHSie — śviata nie rabili, blizkich nie zaprašali, a litaralna praź niekalki dzion Natalla naradziła na 31-m tydni ciažarnaści. Niemaŭlaty radzilisia niedanošanymi, i na toje, kab ich zdaroŭje palepšała, pajšło šmat času i siłaŭ.

Adnosiny stanavilisia ŭsio bolš składanymi, finansaŭ nie chapała. Ale ž na dzień naradžeńnia Natalli ŭ sakaviku muž vyrašyŭ zrabić dla jaje viečarynu — sam pryhatavaŭ šmat ježy, zaprasiŭ siabroŭ žonki. Skončyłasia ŭsio sumna: žančyna zaŭvažyła, što źnikli jaje załatyja ŭpryhožvańni. Pryjšłosia vyklikać milicyju, a siabry potym jašče doŭha chadzili na dopyty.

Pavialičyć

A potym pačała ŭspłyvać niepryjemnaja praŭda. Sa słoŭ Natalli, vyśvietliłasia, što arandatary kvatery i lecišča rehularna płacili jaje kachanamu. Kali jon pryvioz jaje byccam by ŭ svoj dom, žančyna zrazumieła, što nasamreč heta mini-hatel: u pakojach adnolkavy ramont, a na dźviarach numary. Fiermaj muž nazyvaŭ pustyja pali (potym Natalla daviedałasia, što jamu sapraŭdy vydzielili ziamlu, ale płanavali zabrać, bo mužčyna joj nie zajmaŭsia — ničoha nie sadziŭ, uradžaj nie źbiraŭ)…

A na kampjutary mužy jana znajšła papku, u jakoj byli fota jaje źnikłych załatych upryhožańniaŭ, a taksama paznaka, kolki za jakoje ŭdałosia atrymać.

Z mužam Natalla razyšłasia, atelje zakryła, a abstalavańnie pačała pradavać, kab razabracca z daŭhami. Praź niekalki miesiacaŭ śledčy paklikaŭ jaje na dopyt — vyśvietliłasia, što na byłoha kachanaha zaviali ŭžo dźvie kryminalnyja spravy za machlarstva.

Pavialičyć

U adnym vypadku, pa słovach Natalli, muž abiacaŭ dapamahčy znajomamu jaje taty pradać budaŭničuju techniku: technika sapraŭdy źnikła, a hrošy za jaje tak i nie źjavilisia. U druhim muž arandavaŭ u rodnym horadzie niejki skład z abstalavańniem — i abstalavańnie taksama źnikła nieviadoma kudy.

U vyniku, śćviardžaje Natalla, jaje byłomu prysudzili 6,5 hoda źniavoleńnia.

• 0
• 0
• 4
• 8
• 2
• 0
• 0
• 0