Praviedzienyja raniej daśledavańni dapuskali, što ŭžyvańnie ryby źnižaje ryzyku niejradehienieratyŭnych zachvorvańniaŭ, ale dokazy byli supiarečlivymi.
Novaje daśledavańnie mižnarodnaj hrupy vučonych, vyniki jakoha apublikavanyja ŭ časopisie Aging Clinical and Experimental Research było nakiravana na vyśviatleńnie suviazi pamiž spažyvańniem ryby i kahnityŭnym zdaroŭjem.
Aŭtary praviali mieta-analiz 35 daśledavańniaŭ, jakija achoplivali bolš za 849 tysiač udzielnikaŭ z roznych krain, u jakich analizavalisia zvyčki ŭ charčavańni ludziej, starejšych za 50 hadoŭ, u pryvatnaści, spažyvańnie ryby, i adsočvalisia kahnityŭnyja funkcyi ŭdzielnikaŭ na praciahu času.
Dla adznaki ŭzroŭniu spažyvańnia ryby vykarystoŭvałasia jak ankietavańnie, tak i dziońniki charčavańnia. Kahnityŭnyja funkcyi aceńvalisia z dapamohaj śpiecyjalnych testaŭ, a taksama kliničnaj dyjahnostyki demiencyi i chvaroby Alchiejmiera.
Udzielnikaŭ padzialili na hrupy ŭ zaležnaści ad uzroŭniu spažyvańnia ryby, paśla čaho paraŭnoŭvali pakazčyki kahnityŭnych parušeńniaŭ pamiž hrupami z vysokim i nizkim spažyvańniem. Dla hetaha vykarystoŭvali kaeficyjenty ryzyki — statystyčnyja pakazčyki, jakija pakazvajuć, nakolki vierahodny peŭny zychod, naprykład, kahnityŭnaje parušeńnie abo demiencyja, u adnoj hrupie ŭ paraŭnańni ź inšaj.
Daśledavańnie pakazała, što ludzi, jakija spažyvali bolš za ŭsio ryby, mieli ŭ siarednim na 18% mienšuju ryzyku kahnityŭnych parušeńniaŭ u paraŭnańni z tymi, chto jeŭ rybu radziej.
Taksama nazirałasia źnižeńnie ryzyki demiencyi na 18% i źnižeńnie ryzyki chvaroby Alchiejmiera na 15%. Adnak dla demiencyi i chvaroby Alchiejmiera vyniki byli mienš adnaznačnymi z-za adroźnieńniaŭ pamiž mietadami daśledavańniaŭ.
Taksama vučonyja pasprabavali vyśvietlić, ci moža pavieličeńnie spažyvańnia ryby pryvieści da jašče bolšaha źnižeńnia ryzyki (doza-adkaz). Jany vyjavili, što aptymalnaja karyść nazirajecca pry spažyvańni kala 150 hramaŭ ryby ŭ dzień.
Aŭtary adznačajuć, što nieabchodnyja dadatkovyja daśledavańni dla razumieńnia miechanizmaŭ i faktaraŭ, takich, jak hienietyčnyja adroźnieńni, jakija mohuć upłyvać na efiekt spažyvańnia ryby na zdaroŭje mozhu.
Vučonyja padkreślivajuć, što ŭpłyŭ dyjety na zdaroŭje čałavieka nikoli nie zaležyć ad izalavanych kampanientaŭ. Suviaź pamiž rybaj i kahnityŭnym zdaroŭjem budzie aptymalnaj, kali jana budzie adbyvacca ŭ kantekście ahulnaj zdarovaj i ŭstojlivaj dyjety.
Kamientary