Nieruchomaść jak inviestycyja. Nakolki vyhadna «bietanavać» hrošy ŭ Biełarusi?

Ciapier tańniej, čym było 10 hadoŭ tamu

U Biełarusi byli dva piki cen na nieruchomaść.

Pieršy prypaŭ na kaniec 2007 — pačatak 2008 hoda. Tady kvadratny mietr u stalicy kaštavaŭ krychu bolej za 2000 dalaraŭ.

U «nulavyja» nieruchomaść u Biełarusi daražeła. Raśli zarobki, źjavilisia bolš dastupnyja kredyty, kurs rubla zastavaŭsia davoli stabilnym až da 2009 hoda. Ale paśla adbyŭsia suśvietny finansavy kryzis i devalvacyja biełaruskaha rubla. Ceny na nieruchomaść pačali padać.

Za dva hady, sa studzienia 2008-ha pa studzień 2010-ha, «kvadrat» u Minsku straciŭ amal 30% ad pikavaha koštu.

Cana dasiahnuła minimumu ŭ mai 2012 hoda — tady «kvadrat» kaštavaŭ $1260. Za čatyry hady nieruchomaść u stalicy ŭ siarednim patańnieła na 37%.

Pavialičyć

Novy pik i znoŭ padzieńnie

Nastupny pik cen na nieruchomaść pryjšoŭsia na pieršuju pałovu kastryčnika 2013 hoda, kali cana za «kvadrat» u stalicy ŭ siarednim dachodziła da $1841.

Ale pabić rekord kanca 2007 — pačatku 2008 hoda nie ŭdałosia.

Ceny na nieruchomaść padali da krasavika 2016 hoda. Siaredni košt «kvadrata» ŭ stalicy tady składaŭ mienš za $1200 pa prapanovach.

Potym staličnaja nieruchomaść pacichu rasła ŭ canie, pakul nie prasieła paśla 2020-ha.

Pavialičyć

Na pačatak listapada 2024 hoda siaredniaja cana «kvadrata» ŭ Minsku pa prapanovach — $1658.

Niahledziačy na rost cen za apošni čas, «kvadrat» u stalicy ŭsio adno kaštuje tańniej, čym na piku ŭ kastryčniku 2013 hoda ($1841 pa prapanovach) i tym bolš čym na piku vosieńniu 2007 hoda, kali «kvadrat» pa prapanovach kaštavaŭ $2011.

Atrymlivajecca, što «bietanavać» hrošy ŭ Biełarusi — nie vielmi vyhadnaja sprava, za vyklučeńniem vypadkaŭ, kali ŭdajecca nabyć nieruchomaść, pakul cana na dnie.

Taksama treba razumieć, što nieruchomaść — heta darahi aktyŭ, ad jakoha składana chutka pazbavicca.

Z papraŭkaj na inflacyju ŭsio jašče bolš sumna

Aproč hetaha, kali razhladać nieruchomaść mienavita jak srodak dla zachoŭvańnia hrošaj, treba nie zabyvacca pra inflacyju, jakaja pastajanna «źjadaje» srodki.

Pavialičyć

Naprykład, kab prosta ničoha nie zhubić na kvatery, nabytaj u 2009 hodzie za $100 tysiač, ciapier jaje treba pradać za $140 tysiač.

Kali kvateru za $100 tysiač nabyli ŭ 2014 hodzie, za jaje varta vyručyć $126 tysiač.

Kvateru, nabytuju za $100 tysiač u 2019 hodzie, z ulikam inflacyi ciapier treba pradavać za $118 tysiač.

To-bok kali vy 10 hadoŭ tamu nabyli nieruchomaść za $100 tysiač, a ciapier pradajecie za $110 tysiač, to na pieršy pohlad moža zdavacca, što hrošaj u vas stała bolš. Ale nasamreč za $110 tysiač ciapier možna nabyć mienš tavaraŭ ci pasłuh, čym za $100 tysiač 10 hadoŭ tamu.

Tamu kali razhladać nieruchomaść mienavita jak srodak dla źbieražeńnia, a nie jak układańnie dla zdačy jaje ŭ karotkaterminovuju arendu, to cana na kvateru musić raści nie mienš za ŭzrovień inflacyi. 

Čamu pry hetym mnohija biełarusy chočuć «zabietanavać» hrošy?

Vierahodna, adbyvajecca heta ŭ tym liku praz toje, što ŭ Biełarusi dastupna nie tak šmat srodkaŭ dla pasiŭnaha inviestavańnia. 

Pavialičyć

Kłaści hrošy ŭ bank pad ciapierašnija 0,01% hadavych u dalarach abo jeŭra — biessensoŭna, adkryvać rublovyja ŭkłady — ryzykoŭna, a dostup da fondavych rynkaŭ abmiežavany. 

• 0
• 0
• 0
• 0
• 0
• 0
• 0
• 0