U Mazyrskim rajonie susied šuflikam zabiŭ pažyłuju paru i zabraŭ 500 rubloŭ

Zdareńnie adbyłosia ŭviesnu, zaraz stali viadomy padrabiaznaści. Z boku ŭsio vyhladała jak niaščasny vypadak, adnak śledčyja z pryciahnieńniem śpiecyjalistaŭ Dziaržaŭnaha kamiteta sudovych ekśpiertyz, ahledzieŭšy cieły piensijanieraŭ, vyśvietlili, što ich śmierć nosić kryminalny charaktar, a padpał doma — heta tolki sproba schavać ślady ciažkaha złačynstva.

Žančyna była mocna źbitaja i, pavodle zaklučeńnia ekśpiertaŭ, na momant pažaru ŭžo była miortvaja. Na ciele mužčyny taksama mielisia množnyja traŭmy, ale vysnovy śpiecyjalistaŭ niesuciašalnyja: jaho śmierć nastupiła ŭ vyniku atručvańnia čadnym hazam.

Praanalizavaŭšy sabranyja materyjały, śledčyja va ŭzajemadziejańni z supracoŭnikami milicyi vyjšli na śled 35-hadovaha susieda, jaki z-za chvilinnaha hnievu zabiŭ mietaličnym saŭkom siamiejnuju paru.

U chodzie dopytu mužčyna raspavioŭ, što viedaŭ susiedziaŭ ź dziacinstva i nie raz źviartaŭsia da ich pa dapamohu, u tym liku dla vyrašeńnia finansavych prablem. Žychar Mazyrskaha rajona adznačyŭ, što ŭ kancy lutaha hetaha hoda jon pazyčyŭ u piensijanierki 3000 rasijskich rubloŭ (kala 100 biełaruskich) i abiacaŭ viarnuć na praciahu niekalkich dzion.

Pa zakančeńni abumoŭlenaha terminu, mužčyna pryjšoŭ da susiedki paprasić adterminoŭku viartańnia doŭhu, tak jak hrošaj u jaho nie było. Padčas razmovy piensijanierka vykazała svaju niezadavolenaść, što i stała matyvam dla zabojstva.

Schapiŭšy mietaličny šuflik, 35-hadovy mužčyna nanios niekalki ŭdaraŭ žančynie pa hałavie i ciele. Na jaje kryki z pakoja vyjšaŭ pažyły mužčyna, jakomu taksama dastałasia: raźjušany fihurant nakinuŭsia z saŭkom i na jaho.

Paśla ŭčynienaha zabojstva mužčyna abšukaŭ dom i vykraŭ usie hrošy, jakija znajšoŭ. Zatym padpaliŭ dom i syšoŭ. Razumiejučy, što rana ci pozna milicyja budzie jaho šukać, jon schavaŭ svaju kurtku sa śladami kryvi, a taksama spaliŭ vykradzieny kašalok i skryvaŭlenyja palčatki.

Padčas rasśledavańnia kryminalnaj spravy śledčyja vyśvietlili, što suma vykradzienaj majomaści skłała krychu bolš za 500 rubloŭ. 

Mužčyna raniej da kryminalnaj adkaznaści nie pryciahvaŭsia, maje na ŭtrymańni niepaŭnaletniaje dzicia.

Padčas pravierki pakazańniaŭ na miescy jon u padrabiaznaściach raspavioŭ i pakazaŭ, jak zabivaŭ piensijanieraŭ.

Na padstavie sabranych dokazaŭ jaho dziejańni kvalifikavanyja śledstvam pa šerahu artykułaŭ Kryminalnaha kodeksa. Jamu moža pahražać śmiarotnaja kara.

• 0
• 0
• 0
• 2
• 2
• 0
• 5
• 0