U ZŠA stvarajuć kvartał z 100 damoŭ, vyrablenych na trochmiernym pryntary
Kala amierykanskaha horada Ościn źjavicca žyły rajon ažno z 100 damoŭ, vyrablenych mietadam trochmiernaha druku. Novy rajon, jaki, chutčej za ŭsio, pačnuć budavać u nastupnym hodzie, stanie samym vialikim rajonam takoha typu ŭ ZŠA. Prajekt dapamoža budaŭničym kampanijam pabačyć, ci zdolny trochmierny druk vyrablać damy patokam.
Raniej z dapamohaj hetaj technałohii vyrablali dziasiatki damoŭ, ciapier ža stanie zrazumieła, ci možna stvarać takija damy sotniami.
Kali ŭsio atrymajecca, trochmierny druk moža dapamahčy vyrašyć prablemu stałaha niedachopu damoŭ na prodaž u ZŠA, pryčym novyja budynki, jak čakajecca, buduć dastupnyja pa košcie, piša Wall Street Journal.
Bolšaść novazbudavanych damoŭ na adnu siamju ŭ ZŠA źbirajuć adrazu na budaŭničaj placoŭcy z vykarystańniem draŭlanaha karkasa. Damy kampanii Icon, što i stvaraje rajon kala Ościna, zamiest hetaha majuć bietonny karkas.
Ich trochmiernyja pryntary mohuć za tydzień zbudavać karkas z unutranych i źniešnich ścien dla adnapaviarchovaha doma płoščaj bolš čym u 600 kvadratnych mietraŭ.
Pryntar vyciskaje bieton słajami, nibyta zubnuju pastu ź ciubika. Jon navat moža «drukavać» vyhnutyja ścieny, što dazvalaje stvarać damy ź niezvyčajnym dyzajnam.
Technałohiju jašče možna palepšyć. Naprykład, pradstaŭniki karparacyi Lennar, što razam z kampanijaj Icon buduje rajon pad Ościnam, ličać — u budučym damy možna budzie budavać chutčej, čym za tydzień.
Taksama možna budzie źmienšyć košt budoŭli trochmiernych damoŭ, kolkaść ludziej, nieabchodnych dla hetaha, i pamier adchodaŭ pry budaŭničym pracesie.
Kampanija Icon i raniej budavała z dapamohaj trochmiernaha druku damy na adnu siamju, ale ž zaraz razmova idzie pra pavieličeńnie maštabaŭ, i heta niasie z saboj novyja ciažkaści. Na rynkach, dzie technałohija trochmiernaha druku pakul nieviadomaja, moža być ciažka atrymać dazvoł na budaŭnictva takoha doma. Karystalniki taksama mohuć stavicca skieptyčna da technałohii i da vyhladu damoŭ, što atrymoŭvajucca ŭ vyniku. Naprykład, na naružnych ścienach damoŭ ad Icon jość šmat hrabianioŭ.
Raniej damy, vyrablenyja Icon, kaštavali ŭ siarednim trochi mienš, čym anałahi, pabudavanyja zvyčajnym čynam. Naprykład, dom ź dźviuma spalniami vystaŭlaŭsia na prodaž pa košcie ŭ 450 tysiač dalaraŭ i byŭ pradadzieny za 530 tysiač dalaraŭ.
Kamientary