Biełaruskaja rada kultury prapanuje spynić akredytacyju «Listapadu» ŭ prestyžnaj asacyjacyi kinapradziusaraŭ

— Praviadzieńnie mižnarodnaha mierapryjemstva niemahčyma ŭ krainie, dzie dziejačaŭ kultury i ŭ pryncypie ŭsich niazhodnych represujuć, — cytuje častku lista da Skaleły na staroncy ŭ Facebook BRK. — Da ŭsiaho adzin z arhanizataraŭ fiestyvalu — Biełteleradyjokampanija, jakaja pakazvaje ŭ svaim efiry ździeki z palitviaźniaŭ. A dyrekcyja festu z hetaha hoda — kinastudyja «Biełaruśfilm», struktura Minkulta, jaki vystupaje ŭ jakaści žorstkaha cenzara ŭsiaho žyvoha ŭ biełaruskaj kultury.

Krytyčnaja pazicyja Biełaruskaj rady kultury abumoŭlena situacyjaj vakoł fiestyvalu «Listapad», jakaja skłałasia apošnim časam. Jak paviedamlałasia raniej, sioleta arhanizataram minskaha kinaahladu pa rašeńni Ministerstva kultury źjaŭlajecca kinastudyja «Biełaruśfilm». Centr vizualnych i vykanalnickich mastactvaŭ «Art Karparejšn», jaki zajmaŭsia kinaforumam apošnija dziesiać hod i dziakujučy vysiłkam jakoha kinaforum i atrymaŭ pastajannuju akredytacyju ŭ Mižnarodnaj fiederacyi asacyjacyj kinapradziusaraŭ FIAPF, zastaŭsia pa-za bortam.

Na pres-kanfierencyi ŚMI, jakaja adbyłasia pazaŭčora, hienieralny dyrektar Nacyjanalnaj kinastudyi «Biełaruśfilm» Uładzimir Karačeŭski ahučyŭ tyja źmieny, jakija napatkajuć «Listapad». U pryvatnaści, z prahramy fiestyvalu źniknie Konkurs nacyjanalnych kinaškoł, Nacyjanalny konkurs, ale dadasca konkurs Kino maładych, u jakim buduć spaborničać stužki roznych žanraŭ — dakumientalnaje, ihravoje, animacyjnaje kino, stvoranaje aŭtarami da 40 hadoŭ.

U svajoj pramovie hiendyrektar taksama kazaŭ pra toje, što zadziejničaje fiestyval jak placoŭku «dla prasoŭvańnia krainy, mahčymaściaŭ supracy z našaj krainaj, mahčymaściu zdymak u nas, a hetaksama prezientacyi našaj ułasnaj pradukcyi».

Ale hałoŭnaja navina, jakaja kančatkova źbiantežyła kinasupolnaść — na fiestyvali źmienicca, ułasna, padychod da vybaru karcin u asnoŭnyja konkursnyja prahramy.

— Viadoma, heta ŭ pieršuju čarhu musiać być filmy, jakija majuć uznaharody mižnarodnych fiestyvalaŭ, ale ŭ ich pavinny padymacca temy humanizmu, zachavańnia kaštoŭnaściaŭ, miru. Heta pavinna być kino, jakoje pracuje na stvareńnie, — cytuje słovy Uładzimira Karačeŭskaha BiełTA. — 

My nie kažam pra toje, što zabaraniajem toje ž sacyjalnaje kino, ale razam ź im bolš treba kazać pra humanizm i zachavańnie peŭnych rečaŭ, da jakich čałaviectva išło tysiačy hadoŭ.

Padobnaja «raspłyvistaja» farmuloŭka vyklikała rozhałas u kinahramadskaści, jakaja ŭbačyła ŭ słovach hiendyrektara kinastudyi namiok na zvyčajnuju cenzuru.

Źviarnuć uvahu na toje, što zaraz adbyvajecca z «Listapadam», i prapanuje ŭ liście da Mižnarodnaj fiederacyi asacyjacyj kinapradziusaraŭ Biełaruskaja rada kultury.

Daty sioletniaha minskaha kinafiestyvalu — 20-26 listapada.

• 0
• 0
• 0
• 0
• 0
• 0