SK: Hierasimienia i Apiejkin abvieščanyja ŭ vyšuk

Śledčym kamitetam vyniesienyja pastanovy ab pryciahnieńni ŭ jakaści abvinavačanych Alaksandry Hierasimieni i Alaksandra Apiejkina.

«Dziejańni abvinavačanych kvalifikavanyja śledstvam pavodle č. 3 art. 361 (zakliki da ŭčynieńnia dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś, učynienyja z vykarystańniem srodkaŭ masavaj infarmacyi i hłabalnaj kampjutarnaj sietki internet) Kryminalnaha kodeksa. Prakuroram sankcyjanavana prymianieńnie da abaich abvinavačanych miery strymańnia ŭ vyhladzie zaklučeńnia pad vartu. Nazvanyja asoby abvieščanyja ŭ vyšuk. Rasśledavańnie kryminalnaj spravy praciahvajecca», — raspaviali ŭ Śledčym kamitecie.

Nahadajem, što lehiendarnaja płyŭčycha Alaksandra Hierasimienia ŭznačaliła Fond salidarnaści spartoŭcaŭ, a ŭ dzień adkryćcia «Usiebiełaruskaha narodnaha schodu» nakiravała list Alaksandru Łukašenku. «Vy pryhniatajecie i źniščajecie svoj narod, dumajučy, što jon vas lubić. A jon vas nienavidzić i prosić, kab vy chutčej syšli», — źviartałasia jana.

Na pačatku krasavika stała viadoma, što Śledčy kamitet zavioŭ kryminalnuju spravu suprać Alaksandry Hierasimieni.

Pavodle śledstva, Hierasimienia i vykanaŭčy dyrektar Biełaruskaha fondu spartovaj salidarnaści Alaksandr Apiejkin raspaŭsiudžvali «zaviedama łžyvyja źviestki ab chodzie i vynikach vybarčaj kampanii, pra padziei ŭ sacyjalnaj, ekanamičnaj, palityčnaj i kulturnaj śfierach žyćcia hramadstva». Nibyta jany źviartalisia z zaklikami da zamiežnych dziaržaŭ i mižnarodnych arhanizacyj, skiravanymi na pryčynieńnie škody nacyjanalnaj biaśpiecy Biełarusi.

Śledstva śćviardžaje, što dziejańni Hierasimieni i Apiejkina nanieśli imidžavy i finansavy ŭron, padarvali prestyž krainy na mižnarodnaj i palityčnaj arenie, dyskredytavali kiraŭnictva spartyŭnaj haliny i dziaržavy.

Taksama ŭ sakaviku stała viadoma pra toje, što ŭ płyŭčychi adbirajuć dom u Drazdach.

Alimpijskaj pryziorcy Alaksandry Hierasimieni praz palityčnuju situacyju daviałosia źjechać ź Biełarusi ŭ Vilniu. Da adjezdu jaje škole płavańnia nie padoŭžyli damovu arendy z tych ža pryčyn. 

• 0
• 0
• 0
• 0
• 0
• 0