«Nie płacić alimienty, a mianie sprabuje vystavić ałkahaličkaj!» Madel Volha Nikifarava sudzicca z šoumienam Rybakinym
Novy skandał razhareŭsia ŭ minskaj śvieckaj tusoŭcy. Madel Volha Nikifarava raskazała pra razborki z byłym mužam — šoŭmenam Arciomam Rybakinym. Vynieści ŭsio na publiku jana vyrašyła paśla taho, jak toj pierajšoŭ usie miežy: pierastaŭ płacić alimienty na dačku i paskardziŭsia na jaje ŭ orhany apieki.
«Zajaviŭ, što jaho dachod upaŭ, a sam lataŭ adpačyvać u Daminikanu i Tajłand»
Pra składanyja adnosiny z byłym mužam Volha emacyjna napisała ŭ sacsietkach.
«Jon bolš za hod nie płacić alimienty. Pa jaho inicyjatyvie my zaklučyli šlubnuju damovu, dzie jon sam prapisaŭ sumu ŭ pamiery $600 na ŭtrymańnie dački. Darečy, heta suma była našmat mienšaj za 25% ad jaho sapraŭdnych dachodaŭ (stolki pa zakonie abaviazany vypłačvać baćka na adno dzicia). Ale sa studzienia 2019 hoda jon hetych hrošaj nie zapłaciŭ ni razu.
Ja niejki čas čakała, što jon sam pačnie vypłačvać, ale jon zrabiŭ chod kaniom i padaŭ u sud u śniežni na źmianšeńnie sumy ŭ šlubnaj damovie.
My z advakatam vyjhrali ŭsie dva sudy. Jaho abaviazali vypłačvać poŭnuju sumu alimientaŭ, niahledziačy na toje, što jon śpiecyjalna sprabavaŭ zanizić svoj dachod. Naprykład, raptam zakryŭ IP i čamuści staŭ pracavać viadučym praź IP baćki i IP svajoj novaj žonki, a taksama padaŭ na bankructva svajho pradakšena. A ŭ sudzie zajaviŭ, što jaho ahulny dachod staŭ navat nižejšy za $600.
A sam lataŭ adpačyvać u Daminikanu, Jehipiet, Tajłand i, miarkujučy pa instahramie, vioŭ ład žyćcia niabiednaha čałavieka», — piša Volha Nikifarava.
Prajhraŭšy sudy, muž paskardziŭsia na jaje ŭ sacyjalnyja słužby.
«Mianie jon vystaŭlaje bamžychaj-ałkahaličkaj, jakaja viadzie amaralny ład žyćcia, nibyta pakidaje ź nieznajomymi ludźmi Jevu dy jašče schilaje dzicia da piedafilii, — raskazvaje aburanaja madel. — Ale mnie nie treba dakazvać nikomu toj fakt, što ja dobraja mama i rablu ŭsio mahčymaje, kab Jevie było dobra».
U śniežni da Volhi prychodziła milicyja. Pa jaje słovach, były muž napisaŭ zajavu, kab jaje pryciahnuli da administracyjnaj adkaznaści za toje, što nazvała jaho ciapierašniuju žonku «babaj».
«Jany sami ŭ instahramie nazyvajuć jaje «baba Rybakina» i hanaracca hetym», — adznačaje Volha.
Jana raskazvaje, što nie zabaraniaje baćku bačycca z dačkoj, choć raniej toj nie nadta prahnuŭ sustreč. Tak, jość abmiežavańni ŭ suviazi z epidemijaj. Jany mohuć pahulać razam u parku ci dvary.
«Ale jaho heta nie zadavalniaje i jon prydumvaje usiakuju biazhłuździcu pra toje, što ja jaho chaču viarnuć i katory hod tryźniu im».
«Byłuju ja nie zadavalniaŭ pa ŭsich frantach i jana sama mianie vyhnała»
Arciom Rybakin nie staŭ admoŭčvacca.
«Maja byłaja voś užo dva hady palivaje mianie brudam, pradaje mnie ahulnaje dzicia, podła vykarystoŭvajučy jaho ŭ svaich manipulacyjach.
Byłuju ja nie zadavalniaŭ pa ŭsich frantach, i jana sama mianie vyhnała. Jašče padčas šlubu na praciahu doŭhaha času našy adnosiny byli fiktyŭnymi. Nas ničoha nie źviazvała, aproč vyhladu, jaki joj patrebny byŭ tolki dla pijaru. Ja doŭha sprabavaŭ zachavać siamju!» — adreahavaŭ na abvinavačvańni šoumien.
Jon raskazaŭ «NN», što nikoli nie admaŭlaŭsia płacić alimienty i dapamahać dačce.
«Ale pytańnie stajała rubam: abo $600, abo «nie treba mnie tvaje padački».
$600 na miesiac — heta vialikija ličby. U mianie takich hrošaj niama! Kali my zaklučali šlubnuju damovu, u mianie była inšaja situacyja i pracy było šmat. Da ŭstupleńnia damovy ŭ siłu ja hod płaciŭ bolš, čym treba. Ale ciapier pracy mienš, u mianie druhaja siamja, jakuju taksama treba zabiaśpiečvać. Ja haduju 8-hadovaje dzicia (dačku ciapierašniaj žonki. — «NN») i viedaju, kolki hrošaj idzie na siamju», — kaža šoumien.
Jon tłumačyć, što ŭ sacyjalnyja słužby źviarnuŭsia paśla taho, jak byłaja paprasiła pryvieźci dzicia ŭ hatel, dzie była ŭ niećviarozym stanie. A zajavu ŭ milicyju padaŭ nie za słova «baba», a za abrazy i paklop u bok svajoj ciapierašniaj siamji.
Rybakin skardzicca, što nie moža narmalna bačycca z dačkoj. Raniej jon moh zachodzić da jaje paśla dziciačaha sadka, ciapier, pakolki dziaŭčynka ŭ sadok nie chodzić, takoj mahčymaści niama.
«Na maje prośby ŭziać dačku dadomu, pahulać uviečary adzin adkaz: «nie». Byłaja nie choča adpuskać Jevu ŭ siamju, bo jana nazyvała maju ciapierašniuju žonku druhoj mamaj, a jaje dačku — siastryčkaj. Heta jaje pryvodziła ŭ šalenstva. Byłaja błakuje mianie va ŭsich miesiendžarach, ja ŭ čornym śpisie!
Razam z žonkaj Tais
U hety momant ja znoŭ jedu ŭ apieku, kab skłaści hrafiki naviedvańnia dzicia. Ja heta prapanoŭvaŭ byłoj žoncy šmat razoŭ, ale atrymlivaŭ admovu».
Kamientary