Mahilny sklep kniazioŭ Paskievičaŭ u Homieli adkryŭsia dla naviedvańnia
Mahilny sklep kniazioŭ Paskievičaŭ, raźmieščany na terytoryi Homielskaha pałacava-parkavaha ansambla, adkryŭsia dla naviedvańnia paśla praciahłaha pieryjadu restaŭracyi.
![](http://d3kcf2pe5t7rrb.cloudfront.net/img/w732d4webp1/photos/z_2016_04/kp1204-tmntn.jpg.webp)
Uračystaja cyrymonija adkryćcia histaryčnaha abjekta prajšła z udziełam dziaržaŭnaha sakratara Sajuznaj dziaržavy Ryhora Rapoty, jaki znachodzicca ź vizitam u Homielskaj vobłaści, i staršyni Homielskaha abłvykankama Uładzimira Dvornika.
Pavodle słoŭ hienieralnaha dyrektara Homielskaha pałacava-parkavaha ansambla Alaksandra Hościeva, restaŭracyjnyja raboty kaplicy - mahilnaha sklepa kniazioŭ Paskievičaŭ vialisia na praciahu vaśmi hadoŭ. U 2014 hodzie było pryniata rašeńnie padzialić prajekt rekanstrukcyi na dźvie častki i ŭ pieršuju čarhu zaviaršyć restaŭracyju padziemnaj častki zbudavańnia - mahilnaha sklepa.
«U chodzie restaŭracyi majstrami AAT «Biełrestaŭracyja» adnoŭleny fasady naziemnych pabudoŭ, a taksama interjer padziemnaha sklepa, dzie adnoŭlena ablicoŭka i mazaika, zamienieny nadmahilnyja plity, pamiaškańnie abstalavana aśviatleńniem i aciapleńniem dla padtrymańnia pravilnaha mikraklimatu, — raskazaŭ Alaksandr Hościeŭ. — Druhim etapam rekanstrukcyi stanie restaŭracyja ŭnutranaha ŭbrańnia kaplicy. Zaviaršeńnie hetych rabot daść mahčymaść poŭnaściu adnavić histaryčnaje abličča pomnika sakralnaha dojlidstva Biełarusi XIX stahodździa. Restaŭracyja viałasia za košt srodkaŭ abłasnoha biudžetu».
Kaplica — mahilny sklep źjaŭlajecca pomnikam architektury XIX stahodździa. Jana stvorana ŭ psieŭdaruskim styli pad kiraŭnictvam akademika architektury Jaŭhiena Čarvinskaha. Raboty pa jaje budaŭnictvie vialisia na praciahu 19 hadoŭ, pačynajučy z 1870 hoda. Uładkavańniem i adździełkaj vielmi składanaha naziemna-padziemnaha zbudavańnia kiravali dva pieciarburhskija architektary: Maksimiljan Miesmachier i Oskar Viehienier. U mahilnym sklepie pachavany vosiem pradstaŭnikoŭ rodu Paskievičaŭ, siarod ich hienierał-fieldmaršał Ivan Paskievič z žonkaj Lizavietaj Paskievič (narodžanaj Hrybajedavaj), baćki fieldmaršała, a taksama dźvie jaho dački, syn Fiodar i trajuradnaja plamieńnica.
Kamientary