32-гадовага заснавальніка адной з найбуйнейшых крыптабіржаў свету пасадзілі на 25 гадоў
На працягу многіх гадоў Сэм Банкман-Фрыд лічыўся суперзоркай фінтэх-індустрыі, і яго часта называлі фінансавым вундэркіндам.
Суд у Нью-Ёрку ў чацвер прысудзіў былога прадпрымальніка Сэма Бэнкмана-Фрыда да 25 гадоў турмы па справе аб крадзяжы васьмі мільярдаў даляраў у кліентаў заснаванай ім і пазней збанкрутаваўшай крыптавалютнай біржы FTX, піша Бі-бі-сі.
Пасля двухгадзіннага слухання ў судзе Манхэтэна акруговы суддзя Льюіс Каплан адхіліў сцвярджэнні Бэнкмана-Фрыда аб тым, што кліенты яго біржы нібыта не панеслі ніякіх страт, і пастанавіў, што яго дзеянні былі злачыннымі. Каплан таксама звярнуў увагу на тое, што Бэнкман-Фрыд не раскаяўся ў зробленым.
У выніку 32-гадовага былога мільярдэра прызналі вінаватым у махлярстве, якое цяпер называюць адным з найбуйнейшых у гісторыі ЗША. Крыптавалютная біржа FTX была ацэненая ў 32 млрд даляраў, перш чым яна збанкрутавала ў 2022 годзе.
«Ён ведаў, што здзейсніў злачынства, — заявіў Каплан перад тым, як вынесці прысуд. — Ён ведаў, што ён злачынец. Ён шкадуе, што пралічыўся, калі зрабіў стаўку на тое, што гэта сыдзе яму з рук. Але ён не збіраецца ні ў чым прызнавацца, і гэта яго права».
Бэнкман-Фрыд, які прыбыў у будынак суда ў турэмнай бэжавай футболцы, пацвердзіў, што кліенты біржы FTX на самай справе пацярпелі, і нават прынёс прабачэнні сваім былым калегам па працы, аднак сваёй віны не прызнаў. Ён збіраецца абскардзіць прысуд.
«Яго наўмысная і бясконцая хлусня прадэманстравала нахабнае грэбаванне чаканнямі кліентаў і непавагу да вяршэнства закона», — адзначыў у сваёй заяве пракурор Манхэтэна Дэміян Уільямс.
Як заявіў суддзя Каплан, кліенты FTX страцілі 8 млрд даляраў, інвестары, якія ўклаліся ў акцыі FTX — 1,7 млрд, а крэдыторы хедж-фонду Alameda Research, заснаванага Бэнкманам-Фрыдам, пазбавіліся яшчэ 1,3 млрд.
Суддзя таксама заявіў, што Бэнкман-Фрыд схлусіў падчас давання паказанняў, калі сказаў, што не ведаў, што яго хедж-фонд патраціў дэпазіты кліентаў, узятыя ў FTX.
Федэральныя пракуроры дамагаліся турэмнага зняволення тэрмінам ад 40 да 50 гадоў. Аднак адвакат Бэнкмана-Фрыда Марк Мукасей настойваў, што больш дарэчным было б пакаранне ў выглядзе пазбаўлення волі на пяць з невялікім гадоў.
«Кліенты пацярпелі, і я зусім не хацеў пераменшыць значэнне гэтага. Мне здаецца, я недастаткова сказаў пра гэта падчас працэсу, і хачу за гэта папрасіць прабачэння», — заявіў на судзе Бэнкман-Фрыд.
«Яны ўклалі ў гэта шмат сіл, а я ўсё гэта выкінуў на вецер, і гэта цісне мяне кожны дзень», — сказаў ён наконт сваіх калегаў па біржы.
Трое былых калегаў мільярдэра, выступаючы ў судзе ў якасці сведак, заявілі, што ён даручыў ім выкарыстоўваць сродкі кліентаў FTX для пакрыцця страт Alameda Research. Усе трое прызналі сябе вінаватымі ў махлярстве.
Падчас слухання адвакат Мукасей пастараўся зрабіць усё, каб яго падабароннага не ставілі ў адзін шэраг з такімі сумна вядомымі ашуканцамі, як Бернард Мэдаф.
«Сэм не быў бязлітасным серыйным забойцам фінансавага свету, які кожную раніцу адпраўляўся прычыняць шкоду людзям», — сказаў Мукасей, ахарактарызаваўшы свайго кліента як «недарэчнага батана-матэматыка», які ўпарта працаваў над тым, каб вярнуць кліентам грошы пасля краху FTX.
Сам Бэнкман-Фрыд у сваю абарону заявіў, што насамрэч дапусціў шэраг памылак, у прыватнасці, не стварыў спецыяльны аддзел па кіраванні рызыкамі, але пры гэтым ён катэгарычна адмаўляў, што меў намер каго-небудзь падмануць або скрасці грошы кліентаў.
Выпускнік Масачусецкага тэхналагічнага інстытута, Бэнкман-Фрыд падчас буму крыптавалют, па даных часопіса Forbes, зарабіў 26 млрд даляраў, калі яму не было і 30.
Ён быў верным паслядоўнікам руху эфектыўнага альтруізму, які заахвочвае таленавітых маладых людзей зарабляць шмат грошай і аддаваць іх на дабрачынныя мэты.
Ён таксама быў адным з найбуйнейшых донараў Дэмакратычнай партыі ЗША.
Аднак, па словах пракурораў, культываваны ім імідж адказнага чалавека быў закліканы хаваць шматгадовы крадзеж сродкаў кліентаў.
Двайнікі вядомых беларусаў. І не кажыце, што не задумваліся пра іх падабенства8
Каментары