Былы лідар славутага польскага прафсаюза «Салідарнасць», а пасля першы некамуністычны прэзідэнт Польшчы, 80-гадовы Лех Валэнса днямі наведаў Вашынгтон для таго, каб сустрэцца з прадстаўнікамі палітычных колаў Амерыкі і падзяліцца думкамі пра тое, што адбываецца ў Еўропе і свеце, паведамляе «Голас Амерыкі». У сваім выступленні ён не забыўся і пра Беларусь.
Звяртаючыся да кіраўнікоў краін — сябраў НАТА, былы польскі прэзідэнт прызнаўся, што
«адчувае пачуццё віны» за тое, што калі займаў вышэйшую дзяржаўную пасаду ў сваёй краіне, «не паспеў за сваю кадэнцыю дамагчыся пастановы аб уступленні Беларусі і Украіны ў НАТА», засяродзіўшыся толькі на сваёй роднай Польшчы.
«Расія насамрэч не любіла Польшчу нават больш, чым Украіну. І цяпер «наша месца» заняла Украіна. Мы павінны зрабіць усё магчымае, каб дапамагчы ўкраінцам. Гэта вельмі смелыя людзі. Яны змагаюцца за сваю і нашу свабоду. Расія была б радая нанесці ўдар па Амерыцы, але ў нейкім сэнсе гэтаму супрацьстаіць Украіна. І мы не павінны дазволіць сабе прайграць гэту сітуацыю.
Вы павінны працягваць аказваць вайсковую дапамогу, таму што яны страляюць адзін у аднаго. Аднак, яшчэ раз паўтару — выдзяляйце больш рэсурсаў на інфармацыйны супраціў», — падкрэсліў пры гэтым Лех Валенса.
Пры гэтым ён перакананы, што «думка пра тое, што Расія сёння безнадзейная — няправільная». На ягоную думку, «гістарычны вопыт паказвае, што адносіны паміж народамі мяняюцца».
«Першы доказ — мы (палякі) таксама ваявалі з Украінай. Стралялі адзін у аднаго. Паглядзіце, наколькі мы сябруем з Украінай сёння. Гэта можа адбыцца і з Расіяй, калі вы прыслухаецеся да маёй парады і прыслухайцеся да досведу «Салідарнасці».
Другі доказ — войны заўсёды былі і будуць. Дзве сусветныя вайны пачаліся ў Еўропе. А колькі рэвалюцый? Аднак паглядзіце, мы сёння прыбралі межы ў Еўропе. Кожны жыхар Еўропы можа працаваць у любой іншай еўрапейскай краіне. Наша пакаленне пачало гэты вялікі марш у гэтым кірунку. І Еўропа выраўнялася», — выказаў ён сваё меркаванне.
Пры гэтым праўда, будучы ўпэўнены, што Украіна гэтым разам зможа перамагчы, Валэнса ўсё ж лічыць, што «праз 20 гадоў Расія зноў падымецца і зноў нападзе».
Чытайце таксама:
Легендарны Лех Валэнса святкуе сёння 80-годдзе
«Вашы пакуты прынясуць плён» — Лех Валэнса звярнуўся да беларусаў
Валэнса — беларусам: Дамагацца хлеба трэба праз барацьбу за свабоду, а не наадварот
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна13
Каментары